Природна или вештачка кожа во луксузните возила: што е подобро?

„Фолксваген“ (Volkswagen) неодамна започна соработка со германскиот стартап „Револтек“ (Revoltech GmbH) од Дармштат, објави компанијата пред неколку дена на својата официјална веб-страница, со цел да развие одржливи материјали базирани на индустриски коноп, кои би можеле да се користат како одржливи површински материјали во автомобилите на производителот од 2028 година. Материјалот направен од 100 отсто биобазиран коноп ги користи остатоците од регионалната индустрија за коноп и е алтернатива на природната кожа. Може да се произведува во постојни индустриски капацитети, а по искористувањето да се рециклира или компостира, се објаснува во официјалното соопштение на „Фолксваген“.

Пред тоа, во 2020 година, „Лендровер“ (Land Rover) воведе нова линија на материјали изработени од веганска кожа и алтернативи на кожа, развиени за да ги опреми своите теренски модели „ренџ ровер евоук“ (Range Rover Evoque), „ренџ ровер велар“ (Range Rover Velar) и „јагуар ај-пејс“ (Jaguar I-Pace).

Брендот го користи својот патентиран „еукалиптус меланџ“ (Eucalyptus Melange) - текстил направен од влакна од еукалиптус - кој користи значително помалку вода во споредба со традиционалните материјали како пластика и алкантара и може да се обои во која било боја од спектарот. Исто така користи издржлива мешавина од волна од текстилната компанија „Квадрат“ (Kvadrat), која остава чувство како мек волнен џемпер, како што претходно објави „Блумберг“ (Bloomberg).

Bentley

„Волво“ (Volvo), се наведува истиот текст, соопшти дека најмалку 25 отсто од пластичните површини во неговите возила ќе бидат направени од одржливи материјали, наместо од нафта, до 2025 година. „Тојота“ (Toyota Motor Corp.) произведува материјал за перниците за седење користејќи гликол од обновлива шеќерна трска наместо гликол добиен од нафта.

„Хјундаи“ (Hyundai Motor Co.) користи иситнета вулканска карпа за да ги обложи столбовите во неговите седани; „Форд“ (Ford Motor Co.) разви пена за седишта од соја; а „Фарадеј фјучр“ (Faraday Future) експериментираше со користење карпести влакна и памук од фрлена облека за внатрешната обвивка на своите автомобили.

Консултантската компанија „Гранд вју рисрч“ (Grand View Research) објави дека пазарот на синтетички материјали во автомобилската индустрија ќе достигне 66 милијарди долари до 2030 година. Компанијата предвидува дека пазарот ќе расте со сложена годишна стапка на раст (CAGR) од 7,87 отсто во периодот од 2024 до 2030 година. Растечката свест на потрошувачите за експлоатацијата на животните, потпомогната од програми од организации како што е ПЕТА (PETA), одигра клучна улога во зголемувањето на побарувачката за алтернативи на кожа. Исто така, растечкиот јаз меѓу понудата и побарувачката во индустријата за природна кожа е важен фактор за производителите да изберат синтетичка или вештачка кожа, се наведува во оваа студија.

Но што е со оние што не се откажуваат толку лесно од природната кожа? Во обид да продолжат да го користат најиздржливиот и најквалитетен материјал за седиштата во луксузните aвтомобили, компаниите се трудат да одржуваат одговорни практики и усогласеност со животната средина во кожарската индустрија.

Пред неколку дена „Бентли“ (Bentley) се приклучи на организацијата „Ледер начурали“ (Leather Naturally), која е посветена на промовирање на употребата на сертифицирана, соодветно набавена кожа како природен нуспроизвод на одговорна циркуларна економија. Станува збор за материјал направен од кожи што се нуспроизвод на прехранбената индустрија. Таквите материјали инаку би завршиле како отпад.

Bentley

Како следен чекор, луксузниот британски бренд ја претстави првата одржлива опција за кожа за своите клиенти, користејќи процес на потемнување на кожа што користи органски нуспроизвод од индустријата за маслиново масло. Кожата штавена со отпадна вода од маслинови мелници се произведува со помош на средства што се ослободени од штетни тешки метали, минерали и алдехиди.

Марк Станг, технички експерт за развој на кожа и боја во „Бентли моторс“ (Bentley Motors), според веб-страницата на компанијата, го изјавил следново:

„Кожата е безвременски луксузен материјал, кој отсекогаш ги симболизирал елеганцијата, издржливоста и квалитетот на рачно изработените ентериери на ’Бентли’. Таа има богата историја во нашите автомобили, која опфаќа децении, и го издржа тестот на времето. Употребата на најновите одржливи кожи им овозможува на нашите клиенти уште поширок избор и дополнително ја поддржува нашата водечка стратегија ’Бијонд 100’ (Beyond100)“. „Бијонд 100“ е стратегија што „Бентли“ ја објави во 2020 година, со цел да стане јаглеродно неутрална компанија до 2030 година.

 

 

Невладината организација „Ледер начурали“ дава детални податоци за употребата на кожата и влијанието врз животната средина, особено нагласувајќи дека употребата на кожа во моментов е најдобриот начин за рециклирање кожа и крзно од месната индустрија. „Не само што спасува околу 7,3 милиони тони отпад од глобалните депонии секоја година туку е доволно разновидна за да се користи во низа производи, од меки ракавици и удобни обувки до издржлив мебел и современа облека“, се објаснува на страницата. Кожата од говеда, овци, кози и свињи е нуспроизвод на месната индустрија, а 98 отсто од кожата се произведува од овие четири видови животни. Организацијата наведува дека фармерите не одгледуваат добиток за производство на кожа, бидејќи вредноста на кожата на бикот или кравата обично е само околу 1-2 отсто од вкупната вредност на животното. Стоката се одгледува за месо или млеко, додека кожата е нуспроизвод, кој мора да се претвори во некој друг производ со додадена вредност или да се користи за исхрана.

Bentley

Според „Уан фор ледер“ (One 4 Leather), организација посветена на издигање на свеста за одржливоста на кожата за автомобилски цели, „ако автомобилската индустрија целосно престане да користи кожа, 35 милиони кожи би завршиле на депонии, што ќе резултира со дополнителни емисии на 644 милиони килограми CO2 годишно“.

Според истиот извор, „ако побарувачката за автомобилска кожа порасне за само 10 отсто, тоа ќе спаси 3,5 милиони кожи од депониите. Тоа би значело заштеда на повеќе од 64 милиони килограми CO2, што би било доволно за опремување на 1,1 милион автомобилски ентериери. Убивањето животно за да се искористи само мал дел е страшно трошење ресурси и затоа тоа не се случува во кожарската индустрија“, објаснуваат тие. „Потрошувачката на месо далеку ја надмина кожарската индустрија и во овој момент кожата е едноставно нуспроизвод на прехранбената индустрија“. Детални информации, како и други аргументи за употреба на кожа во луксузни модели на врвни автомобили, може да се погледнат овде.

Големината на глобалниот пазар на автомобилска кожа се проценува на 33,35 милијарди американски долари во 2022 година и се предвидува да расте со сложена годишна стапка на раст (CAGR) од 6,43 отсто во периодот 2023-2030 година, според анализата на „Гранд вју рисрч“. Овој раст е поддржан од желбата на потрошувачите за висококвалитетни и стилски материјали за внатрешноста на луксузните возила.

Во моментов нема коментари за веста. Биди прв да коментира...

Остави коментар