Македонија има највисоки давачки за автомобили, увозот урива рекорди

Растот на трошоците за живот не ги спречи граѓаните да купуваат автомобили. Бројките покажуваат раст на увозот на патнички моторни возила, поголема наплата на давачките за овој увоз од страна на државата, но и раст на автомобилските кредити.

Во услови на затегната монетарна политика, заострени услови за кредитирање и повисоки каматни стапки, автомобилските кредити бележат највисок раст. Во април, според најновите податоци на НБРМ, автомобилските кредити бележат раст од 1,5 отсто споредено со март. Годишниот раст на овој вид задолжувања е значително повисок споредно со другите кредитни продукти на банките.

Според податоците на Царинската управа, пак, годинава заклучно со март во земјава се внесени 18.295 патнички моторни возила. Во првиот квартал лани увозот бил за над 5.000 возила помал. Продолжува и трендот увозот на нови возила да расте побрзо од увозот на половни автомобили.

Зголемениот увоз ја зголеми и наплатата на државата. За три месеци наплатените давачки по основ на увоз на патнички моторни возила надминаа 34 милиони евра и се за над 8,3 милиони евра поголеми од истиот период лани.

Македонија има највисоки давачки во регионот

Од Царинската управа за „Блумберг Адрија“ велат дека во согласност со Законот за царинска тарифа, царинската стапка за увоз на патнички моторни возила изнесува 5 отсто од царинската основица.

„Таа ја претставува вкупната фактурна вредност плус додадени транспортни и други манипулативни трошоци. Во случај кога патничките моторни возила се со преференцијално потекло и има доказ за истото тоа (ЕУР1 или изјава во фактура), царинската стапка е нула“, велат од Царината.

Данокот на додадена вредност за возила изнесува 18 отсто, а се плаќа на царинската основица зголемена за износот на пресметаната царина.

„Притоа се наплаќа и надоместок за еколошка такса и данок на моторни возила во согласност со уредбата за начинот на пресметка на данокот на моторни возила и износите потребни за пресметка на данокот на моторни возила“, објаснуваат од Царинската управа.

Ваквите давачки, според неколку увозници на половини моторни возила со кои контактираше „Блумберг Адрија“, ја прават земјава најскапа во регионот. Македонија, според нив, има за околу 30 отсто повисоки давачки за увоз споредено со околните земји што не се членки на Европската Унија (Србија, Албанија и Косово).

Нашите соговорници, кои инсистираат на анонимност, велат дека проблемот е во процените на возилата што ги прави Царината. Имено, при царинење на возилото како основица не се зема вредноста наведена во фактурата, туку вредноста на возилото по каталог. Па така, според податоците за првиот квартал што ги добивме од Царинската управа, вредноста на увозот статистички изнесува 106 милиони евра, но неговата царинска вредност надминува 120 милиони евра.

Следен проблем, според нашите соговорници, е данокот на додадена вредност од 18 отсто, кој не се плаќа на фактурираната, туку на каталошката (царинската) вредност на возилото. На тој начин цената на увезено возило во вредност од околу 10.000 евра се зголемува и за 50 отсто.

Побаравме од увозниците да ни направат пресметка и за тоа колку ќе изнесуваат давачките за увоз на возило што на пример во Германија е купено за 15.000 евра.

Увозниците на возила велат дека оваа пресметка важи само ако фактурираната и царинската вредност се исти, што речиси никогаш не е случај. Вообичаено, возило купено за 15.000 евра по каталог чини околу 19.000 евра, што автоматски ги зголемува и сите други давачки.

Царинските постапки се брзи

Со воведувањето на зелениот канал за царинење на моторните возила во 2022 година, постапката стана брза и целосно електронска, објаснуваат од Царинската управа.

„Доколку царинската декларација за патничкото моторно возило е на зелен канал, автоматски се ослободува по истекот на 60 минути. Истото тоа е овозможено за декларации што се правилно пополнети и автоматски проверени, со електронски приложени сите документи и кои системот ги селектирал како неризични, односно зелени, кои не подлежат на дополнителни проверки и контроли и за кои се платени или обезбедени царинските давачки. Во моментот кога декларацијата е селектирана од системот на зелен канал започнува да тече тајмер нагоден на еден час, по кој истата таа автоматски добива статус дека се пушта во слободен промет“, велат оттаму.

Ако системот ги селектира царинските декларации како ризични, потребна е документарна или физичка контрола на стоката. Според Царинската управа, во такви ситуации времето за царинење зависи од времето на доставување дополнителни документи и докази во постапката за царинење.

Во моментов нема коментари за веста. Биди прв да коментира...

Остави коментар