Цените и економијата го диктираат изборот: Македонија се префрла на половни возила

Автомобилите во Соединетите американски држави толку поскапеа што Американците можат да си дозволат подновување со седумгодишни кредити. Кредитите со ваква рочност до скоро беа многу ретки, но откако просечната цена на автомобилите достигна 50.000 долари, тие сочинуваат над 21 отсто од сите автомобилски кредити. Растат дури и осумгодишните кредити.

Пресметките во САД покажуваат дека поради царинските политики на претседателот Трамп, автомобилските компании ќе префрлат околу 80 отсто од зголемените трошоци врз купувачите – што изнесува околу 1.760 долари повеќе по автомобил.

Од друга страна, европскиот пазар на нови автомобили во јули забележа најголем раст во последните 15 месеци, бидејќи потрошувачите ја оставија настрана загриженоста за глобалната економија и вложуваа во целосно електрични и хибридни модели.

Регистрациите во јули пораснале за 5,9 отсто во споредба со истиот период лани – најголем пораст од април 2024 година – достигнувајќи 1,09 милиони возила, соопшти Европската асоцијација на производители на автомобили.

Во земјава без ценовни промени, увозот расте

Во земјава увозот расте, но за половните возила, кај новите податоците на Царинската управа покажуваат пад во однос на истиот период минатата година.

Бројките заклучно со август покажуваат дека за осум месеци се увезени возила колку во цела 2023 година. Најголем дел од увезените возила се половни патнички автомобили, близу 30.000. Ако ваквиот тренд продолжи, оваа година ќе биде рекордна за увоз на користени возила во земјава.

Намалувањето на увозот на нови возила се гледа и по бројот на први регистрации. Заклучно со јули годинава, според податоците што ги собира австриско-унгарската компанија „Цеауто“ (CEauto GmbH), која се фокусира на истражување и анализа на автомобилската индустрија во Централна и Источна Европа, во јули 2025 година во Македонија биле регистрирани 578 нови патнички автомобили. Во истиот период лани имало 647 регистрации на нови патнички автомобили.

Нови правила за увоз на половини возила

Цената на возилата од почетокот на оваа година е стабилна, а увозниците и на половини и на нови автомобили со кои разговаравме велат дека состојбата нема да се смени.

Ценовни промени не се очекуваат ниту со стапувањето на сила на измените за увозот на користени возила. Новите правила важат од почетокот на овој месец и се однесуваат на постапките за одобрување на тип на возило, единечно одобрување на возило, идентификација и оцена на техничката состојба и издавање на потврди за исполнетост на техничките барања за возилата.

Според дел од увозниците на половини возила, ќе се зголемат трошоците за хомологација за нови модели кои ги нема на нашиот пазар, но цената на потврдите за техничка усогласеност ќе се намалат. Овие потврди сега ќе ги издаваат овластените увозници во земјава, а не странски институции.

„Грубата пресметка вели дека 1,3 милиони евра годишно досега оделе за потврди за технички контроли кои не требало да се бараат и тоа најголемиот дел од средствата оделе кај странски компании на кои им се плаќало – процесот сега ќе се регулира преку овластените застапници, домашни македонски компании“, наведе Министерството.

Според нашите соговорници, сепак проблем може да се јави посебно за оние модели возила за кои официјалните увозници во земјава имаат политика да не издаваат потврди.

Од почетокот на месецот скратени се и роковите за одобрување во Бирото за метрологија, а цените на услугите од Биро се регулираат со нов правилник што не би требало да влијае на крајната цена на возилата.

Во моментов нема коментари за веста. Биди прв да коментира...

Остави коментар