Македонците избираат половен автомобил, кинеските се пробиваат на пазарот

И додека и на глобално ниво се гледа стабилизација на пазарот на возила и на автомобилската индустрија, се чини таа смиреност се прелева и на домашниот пазар. По првичниот шок од растот на цените на автомобилите, кој во последните две години беше, слободно кажано, драматичен, граѓаните сепак не се откажуваат од купување автомобили. Се разбира, возилата не поевтинија и тоа нема да се случи набрзо или, ако се случи, нема да е значајно. „Блумберг Адрија“ ја анализираше во детали состојбата на автомобилската индустрија во регионот и во Европа, а нашата редакција го испита ставот на читателите. Прашавме дали би купиле автомобил и, ако купат, дали тоа би бил нов или половен. Се разбира, третина од испитаниците сметаат дека сега не е време за купување, затоа што цените се навистина високи, додека остатокот сепак би се одлучил да се поднови - но изборот првенствено е на половен автомобил.

Блумберг Адрија/Линкдин

Царинската управа на Македонија годинава нема објавено податок за увозот на возила. Последната статистика е до декември лани, а во целата 2023 година се увезени вкупно 47.500 возила. Меѓу нив нови патнички автомобили се 9.999, а употребувани се 33.213.

Од автосалоните за „Блумберг Адрија“ велат дека, и покрај цените, интересот за возила не е драстично намален, но сведочат дека секако поголем дел граѓани купуваат половен автомобил. Ние веќе пишувавме и дека возниот парк на државата има поприлична старост.

Пробив на кинеските автомобили во Македонија

Сепак она што охрабрува е што во земјава секако расте увозот на електрични автомобили. Статистиката не е сјајна, но трендот е растечки.

Но сега борбата се сели на сосема друга насока. На глобално ниво, „Тесла“ (Tesla) води ценовна војна, меѓу другите и со кинеските производители на електрични возила, додека европските потрошувачи купуваат, со солидна премија, на „домашниот“ односно европскиот пазар и покажуваат голем скептицизам кон конкурентите, особено оние од Кина. Во Македонија во последните три години се увезени едвај 150 кинески автомобили, а приближно толку се возат и низ улиците, најмногу од страна на такси-компаниите. Досега присутни и најзастапени се моделите ДФСК (DFSK). Пред еден месец свој салон во Скопје отвори и „Џили“ (Geely), бренд од кој веќе е продаден еден автомобил. „Интересот е голем, имаме закажувања на тест-возења, па наскоро очекуваме и нови продажби. Брендот е квалитетен, малку поскап од другите кинески брендови на нашиот пазар, но со доста конкурентна цена во однос на другите што не се кинески“, вели Сашо Кочов, бренд-менаџер на „Џили“ - „Делфино мобилити груп“.

Geely

Тој вели дека во иднина на пазарот ќе бидат присутни над десет кинески бренда.