Каков автомобил можете да купите за 20.000 евра?

Минатиот месец во Европа биле регистрирани над милион нови возила. Тоа е раст од 14 отсто во однос на октомври лани. Паралелно, според податоците на Европската асоцијација на производители на автомобили, продажбата на патнички автомобили во Европа во октомври се зголеми 15-ти последователен месец. Растот продолжува во услови кога инфлацијата и повисоките трошоци за задолжување влијаат на побарувачката.

Во светски рамки, рекордер по продажба на автомобили годинава е јапонскиот производител „Тојота“. Групацијата продаде 5,6 милиони возила во периодот април-септември, а со тоа ја направи можна целта од 11,4 милиони единици во оваа фискална година и остана најдобар производител на автомобили во светот.

Како резултат на таквите продажби, акциите на компанијата годинава континуирано растат и од март до ноември нивната цена се зголеми за над 60 отсто.

Раст на цената на акцијата на „Тојота“/Bloomberg Terminal

Во земјава „Тојота“ се вбројува во топ три најголеми продавачи. Освен моделите на јапонскиот производител, во првата тројка влегуваат и моделите на „Киа“ и на „Шкода“.

Најголем број модели чинат околу 18.000 евра

Токму овие три модели се најдоа и на топ листата на „Блумберг Адрија“. Баравме нови автомобили со максимална вредност до 20.000 евра. Таа сума пред почетокот на истражувањето се чинеше сосема доволна, но потрагата по автомобил се покажа тешка.

„Во изминатиот период цените на автомобилите се зголемиле и до 30 отсто“, рече неодамна за телевизијата „Блумберг Адрија“ Светлана Пљакоска, сопственичка на „Олимпија моторс“. Во наредниот период таа очекува стабилизација на цените, а тоа значи мал раст на годишно ниво.

„Сметам дека ќе има економско покачување на цените од 2 до 5 проценти на годишно ниво, што дефинитивно ќе биде стабилност понатаму. Зборувам за новите и за користените автомобили“, рече Пљакоска.

Па, така, нашата потрага по нов автомобил до 20.000 евра покажа дека најевтиниот автомобил чини 14.690 евра, но во моментов тоа е акциска цена.

Издвојуваме што можете да купите за таа сума во моментов.

1. „Тојота ајго“ е 14.690 евра.

Тојота ајго - веб-страница на „Тојота автоцентар“

2. „Ситроен“ – од овој бренд во продажба има неколку модели со цена од 14.990 до 20.990 евра.

Ситроен Ц3 - веб-страница на „Ситроен Македонија“

3. „Шкода“ – три модели од овој бренд („фабија“, „скала“ и „камиг“) се со цени од 16.488 до 18.840 евра.

Шкода камиг - веб-страница на „Порше Македонија“

4. Со слична сума може да се купи и „сеат ибица“, бензинец (18.276 евра).

Сеат ибица - веб-страница на „Сеат Македонија“

5. Цената на „фиат 500“ се движи од 16.990 до 18.900 евра.

Фиат 500 - веб-страница на „Фиат Македонија“

 

6. Меѓу најпродаваните и годинава се автомобилите на „Киа“. Во моментов два модела се со цена под 20.000 евра - „киа рио концепт“ е 16.650 евра и „стоник концепт“ е 19.200 евра.

Киа рио концепт - веб-страница на „Киа Македонија“

7. Еден од најчестите автомобили по скопските улици е дефинитивно „опел“, а новата „корса“ сега се продава по цена од 18.410 евра.

Опел корса - веб-страница на „Опел Македонија“

8. Слична цена има и „рено клио“ – 18.790 евра.

Рено клио - веб-страница на „Рено Македонија“

9. Поголем избор на автомобили до понудената сума има од брендот „Хјундаи“. Тие се движат од 15.900 до 20.000 евра.

Хјундаи i10 - веб-страница на „Хјундаи Македонија“

10 „Дачија“ на македонскиот пазар во моментов нуди три модели до 20.000 евра, и тоа „дастер“, „сандеро“ и „логан“.

Дачија дастер - веб-страница на „Дачија Македонија“

Слаб интерес за автомобилски кредити

Високата инфлација, која придонесе за затегнување на монетарната политика преку зголемувањето на трошоците за кредитирање, не влијаеше на вкупните автомобилски кредити. Според податоците на Народната банка, во октомври годинава 382 милиона денари (6,2 милиони евра) биле автомобилски кредити. Споредено со септември, забележан е раст од 0,8 отсто, а во однос на октомври лани растот изнесува 13,2 отсто.