„Тојота“ ја зголеми својата прогноза за оперативниот профит за 50 отсто откако објави рекордна квартална заработка, благодарение на послабиот јен што ги зголеми приходите кои се должат на силната глобална побарувачка за возила и подобрувањето на синџирите на снабдување.
Акциите се зголемија за 4,7 отсто во средата, поттикнати од најавата на производителот на автомобили дека ќе откупи дури 100 милијарди јени (660 милиони долари), или 0,44 отсто од сопствените акции. Оперативниот профит треба да достигне 4,5 трилиони јени за фискалната година до март, што е повеќе од претходните насоки од 3 трилиони јени, се вели во соопштението на компанијата.
Групацијата „Тојота“ продаде невидени 5,6 милиони возила во периодот април-септември, и со тоа ја направи можна целта од 11.4 милиони единици во оваа фискална година и останувајќи број 1 во светот производител на автомобили. Резултатите покажуваат дека побарувачката за нејзините хибридни и горивни ќелии сè уште е силна, иако кинеската „БИД“, „Тесла“ и други го преземаат водството во префрлањето на електрична енергија.
„Тоа е многу добар резултат, многу повисок отколку што очекувавме“, рече Кристофер Рихтер, виш аналитичар во „ЦЛСА Секјуритис Џапан“. „Ние сме во фаза на закрепнување на пазарот на автомобили по три години од пандемијата и недостигот на чипови“.
За трите месеци кои завршија во септември, добивката е рекордни 1,44 трилиони јени, што ја надминува просечната проценка на аналитичарите за 1,1 трилиони јени. Нето-продажбата се зголеми за 24 отсто до 11,4 трилиони јени. Акциите на „Тојота“ пораснаа за 50 отсто оваа година.
„Тојота“ ја намали својата цел за продажба на електрични возила за тековната фискална година на 123.000 единици од 202.000 единици. 58.984 беа продадени во првото полугодие кое заврши во септември, главно надвор од Јапонија.
Компанијата ги засилува напорите за производство на електрични возила со тоа што вчера најави дека инвестира уште 8 милијарди долари во фабрика во Северна Каролина која ќе произведува батерии за целосно електрични и плаг-ин хибридни модели.
Минатиот месец, „Тојота“ ги објави плановите за производство на цврсти батерии за електрични возила со „Идемитсу Косан“, компанија за рафинирање на нафта и петрохемија. Партнерството ќе се фокусира на развој на технологија која би можела да ја подобри моќноста на батериите и времето на полнење и да помогне да се воспостави синџир на снабдување за масовно производство.
Кога Коџи Сато беше именуван за главен извршен директор на Тојота претходно оваа година, тој вети дека ќе продава 1,5 милиони електрични возила со батерии годишно до 2026 година и 3,5 милиони до 2030 година. Минатата недела на саемот за мобилност во Јапонија, тој претстави два концепти за автомобили како најава за поставата на електрични возила што „Тојота“ вети дека ќе ги лансира во 2026 година.
Девизните добивки го зголемија оперативниот приход за 260 милијарди јени од април-септември и се на пат да ги зголемат прогнозите за целата година за 1,18 трилиони јени, објави „Тојота“. Производителот на автомобили сега претпоставува девизен курс од 141 јени за долар, наместо претходното ниво од 125 јени.
„Планот е да се надомести загубеното тло во Кина со таргетирање на големите пазари како Јапонија и САД“, рече вишиот аналитичар на „Блумберг Интелиџенс“, Тацуо Јошида.
Во Кина, продажбата на возилата на „Тојота“ и „Лексус“ стагнира бидејќи купувачите на автомобили се префрлаат на електрични возила, тренд што е забележан и кај другите некинески марки на пазарот.
„Продолжуваме со планот да го зачуваме нашиот удел во Кина“, рече главниот финансиски директор Јоичи Мијазаки во средата. „Наместо да бидеме вовлечени во ценовна војна, сакаме да се натпреваруваме со зголемување на производството“.
.webp){kind=icon}
