Кој вози „ламборгини урус“, највредното возило во Македонија годинава

Шест возила „мерцедес-бенц“ се најдоа на листата најскапи автомобили што годинава биле увезени во Македонија. Податоците што ги добивме од Царинската управа на Македонија сепак покажуваат дека најскапиот увезен автомобил е едно „ламборгини урус“, чија вредност изнесува околу 350.000 евра. На оваа топ 10 листа се наоѓаат и три возила „порше“. Инаку, осум од овие возила се нови, додека само две се употребувани. „Блумберг бизнисвик Адрија“ анализираше и кои се најскапите автомобили во сите пет земји во регионот.

Најскапото „ламборгини“ во земјава било внесено како половно возило, што значи дека ако автомобилот бил нов, ќе чинел и повеќе. По цена на чинење, следното најскапо возило увезено во текот на годинава е ново и е од марката „мерцедес-бенц Г63 АМГ“, со вредност од речиси 14 милиони денари, а е произведено минатата година. Третото увезено возило со највисока вредност е од марката „порше 911 турбо С“ од 2023 година, со цена на чинење од 10,7 милиони денари.

Во меѓувреме, статистиката покажува мал пад на увозот на автомобили во август годинава во споредба со претходниот месец, но август традиционално се смета за полош месец за продажба. На годишно ниво, сепак, има раст на бројот на увезени автомобили. Од јануари до август во земјава биле внесени над 28.800 возила.

А во Македонија купувањето скап автомобил значително го поскапува данокот за моторни возила, кој изнесува најмногу 20 отсто за возила чија вредност е поголема од 50.000 евра. Основица за пресметување на данокот е износот на просечната емисија на јаглерод диоксид (CO2) изразена во грамови по километар во зависност од видот на погонското гориво и царинската вредност на моторното возило утврдена во согласност со царинските прописи, зголемена за износот на царината. Во царинската вредност се вклучуваат и транспортните трошоци и трошоците за осигурување, доколку ги има.

Во август годинава пазарот на автомобили во Европската Унија (ЕУ) порасна за 21 отсто, достигнувајќи 787.626 регистрирани возила. Најновиот извештај на Европската асоцијација на производители на автомобили (АЦЕА) покажува дека ова е тринаесетти последователен месец на раст.

Двоцифрениот пораст покажува дека пазарот на ЕУ закрепнува од минатогодишниот недостиг од компоненти. Двоцифрен процентуален раст е забележан на повеќето пазари, вклучувајќи ги и трите најголеми: Германија (+37,3 отсто), Франција (+24,3 отсто) и Италија (+11,9 отсто).