Драстичен раст на извозот на возила од Кина има од почетокот на годинава, а тој е особено изразен кај електричните возила. Според податоците на Кинеската асоцијација на производители на автомобили, од јануари до април годинава од Кина биле извезени 1,37 милион возила, што е зголемување од 89,2 проценти на годишно ниво. Од вкупната бројка, 348.000 биле електрични возила, што е зголемување од 1,7 пати на годишно ниво. Ако се земе предвид дека континуирано расте и извозот на батерии за електрични возила, но и инвестициите на кинеските компании во капацитети за производство на вакви батерии, станува јасно дека Кина веќе е неколку чекори понапред во однос на конкурентите од Западот кога станува збор за пазарот на електрични возила.
ЕУ отвора истрага
„Блумберг“ неодамна објави дека Европската Унија отвора истрага за кинеските субвенции за електрични возила во обид да ја спречи поплавата на евтин увоз.
Прочитај повеќе
ЕК анализира дали Кина дава премногу субвенции за електрични автомобили
Во првите седум месеци од оваа година има драстично зголемување на продажбите на автомобили во Европа.
15.09.2023
„Фолксваген“ ќе отпушта работници од клучната фабрика за електрични возила
Слабиот економски раст и повисоките трошоци за енергија во Европа влијаеја на побарувачката за електрични возила.
14.09.2023
Кина ја критикува истрагата на ЕУ за електричните автомобили
Истрагата на Европа за спротивставување на Кина е дел од стратегијата на владите да го доближат производството до дома.
14.09.2023
Во Минхен, БМВ откри како гледа на иднината на автомобилите
Во Минхен бевме сведоци на најважното откритие на БМВ во последните години, можеби дури и децении.
04.09.2023
„Мерцедес“ го зголемува опсегот на своите електрични возила за да се соочи со „Тесла“
И прототипот на БМВ и идниот електричен автомобил на „Мерцедес“ треба да почнат да се произведуваат во средината на деценијата.
04.09.2023
Претседателката на Европската комисија, Урсула фон дер Лајен, рече дека глобалниот пазар е преполн со евтини кинески автомобили и дека блокот ќе возврати.
„Нивната цена се одржува вештачки ниска со огромни државни субвенции“, рече шефицата на извршната власт на ЕУ во својот годишен говор пред Европскиот парламент. „Ова го нарушува нашиот пазар“.
Цените на кинеските модели се околу 20 проценти пониски отколку на европските електрични возила, а се очекува дека кинеските автомобилски компании ќе контролираат 15 проценти од европскиот пазар до 2025 година. Европа наплаќа давачки од 10 проценти за автомобилите увезени од Кина, што е неспоредливо пониско отколку царината од 27,5 проценти што се наплаќа во САД.
Одмаздата може да биде погубна
Откако европските компании со години инвестираа многу во заеднички вложувања со кинески компании, Кина стана дом на мноштво производители на електрични возила поддржани од владините стимуланси и за индустријата и за купувачите. Со оглед на тоа што Кина е најголемиот пазар за „Фолксваген“ (Volkswagen AG) и другите германски производители на автомобили, влошувањето на односите со Пекинг може да биде ризично.
Кинези инвестираат во фабрики за батерии надвор од земјата
Како одговор на зголемената побарувачка и построгите политички ограничувања, кинеските производители на батерии ги засилуваат напорите за изградба на фабрики во странство, објави неодамна „Чајна дејли“. Во текстот, кој е пренесен на терминалот на „Блумберг“, се посочува соопштението на Министерството за индустрија на Индонезија од минатата недела, во кое се наведува дека е постигнат договор меѓу кинескиот производител на батерии „Готион“ (Gotion) и индонезиската „Анугра нео енерџи материјалс“ (Anugrah Neo Energy Materials) за изградба на фабрика за материјали што се користат во батериите за електрични возила.
Само неколку дена претходно, „Готион“ откри дека планира да вложи две милијарди долари во изградба на фабрика за производство на литиумски батерии за електрични возила во Илиноис, САД. Во меѓувреме, „Ив енерџи“ (Eve Energy), уште една кинеска компанија што произведува батерии, на почетокот на септември годинава потпиша договор за инвестиција од 150 милиони долари во заедничко вложување со „Дајмлер трак“ (Daimler Truck), „Електрифајд пауер“ (Electrified Power) и „Паккар“(Paccar), во фабрика за батерии во САД. Објектот вреден 2,64 милијарди долари ќе ги користи технологиите на кинеската компанија за развој на батерии за комерцијални возила.
Македонија е привлечна за автомобилските производители
Ако се земе предвид дека во изминативе години слободните економски зони во Македонија полека прераснаа во дом на производители на автомобилски делови од различни континенти, јасно е дека нашата земја би можела да привлече кинески инвестиции од овој сектор, при што како адути би ги истакнале близината на европскиот пазар, субвенциите и веќе искусната работна сила.
Уште во еден случај, подружница на кинеската „Санвода електроник“ (Sunwoda Electronic) инвестираше 261,6 милиони долари во изградба на фабрика во Унгарија што ќе произведува и продава батерии.
Претседателот на „Санвода“, Ванг Веи, соопшти дека проширувањето на меѓународните пазари преку локализирано производство ги доближува компаниите до клиентите, а со зголемената употреба на електричните возила во Европа и забраните за мотори со внатрешно согорување, постојат значителни можности за раст.
Ванг исто така истакна дека кинеските компании за батерии се соочуваат со предизвици од регулативите во Европа и во САД.
КАТЛ (CATL), најголемиот кинески производител на батерии, има две фабрики во странство: едната работи во Германија, а другата е во фаза на изградба во Унгарија. Тоа ќе биде најголемата фабрика за батерии во Европа кога ќе започне производството во 2025 година.
Според податоците на Министерството за индустрија и информатичка технологија, во првата половина од оваа година извозот на литиумски батерии од Кина се зголеми за 69 проценти на годишно ниво, со доминантно фокусирање на батериите за напојување.
Со помош на Кевин Вајтлоу, Албертина Торсоли и Алберто Нардели (Блумберг)
.webp){kind=icon}
