Најнови автомобили се возат во Луксембург, најстари во Естонија

Во 2022 година, бројот на електрични патнички автомобили само со батерии во земјите на ЕУ речиси достигна три милиони, што е зголемување од 55 проценти во споредба со 2021 година (1,9 милиони), соопшти Евростат.

Највисоката годишна стапка на пораст на електричните патнички автомобили на батерии во периодот 2013-2022 година е забележана помеѓу 2019 и 2020 година (+85 проценти), проследено со пораст во 2021 година во споредба со 2020 година (+78 проценти). Учеството на електричните автомобили само на батерии во вкупниот број патнички возила порасна од 0,02 проценти во 2013 година на 1,19 проценти во 2022 година.

„Вкупниот удел на електрични патнички автомобили со батерии се очекува значително да порасне во наредните години во пресрет на забраната на ЕУ за продажба на нови автомобили со мотори со согорување во 2035 година. Забраната е поврзана со Индикаторот за одржлив развој за намалување на емисиите на CO2 од новите патнички автомобили.“, наведува Евростат.

Кога станува збор за вкупниот број на патнички автомобили (кои работат на бензин или дизел, вклучително и хибриди и на сите видови алтернативна енергија, вклучувајќи возила само батерии), тој порасна во речиси сите членки на ЕУ во последните пет години, достигнувајќи вкупно речиси 253 милиони патнички автомобили во 2022 година (+14 проценти во споредба со 2013 година).

Најголем удел на нови патнички автомобили (стари две години или помалку) меѓу членките на ЕУ е регистриран во Луксембург (18 проценти од сите патнички автомобили во земјата), потоа Германија и Шведска (и двете по 15 проценти), Белгија, Ирска и Австрија (13 проценти). Во меѓувреме, најстари патнички автомобили (20 години или постари) се регистрирани во Естонија (34 проценти), Романија (31 проценти), Финска (30 проценти), Полска (29 проценти) и Португалија (26 проценти).

Во моментов нема коментари за веста. Биди прв да коментира...

Остави коментар