Македонците возат дизелаши, државата „нè вози“ за електричните автомобили

Во земјава има 17 возила што се регистрирани а се произведени во 19 век. Три возила се произведени во 1900 година, покажуваат податоците на Министерството за внатрешни работи за регистрирани возила во текот на 2022 година.

И без овие олдтајмери, возниот парк во земјава е стар. Од вкупно 633.947 регистрирани возила, дури 419 се произведени во периодот од почетокот на 20 век до 1970 година. Над 145.000 возила произведени до крајот на минатиот век сè уште возат по македонските патишта.

Најголем број од регистрираните возила во земјава, близу 50.000 се произведени во 2007 година односно одговараат на стандардите еуро 4. Од почетокот на следната година почнуваат да важат стандардите еуро 7.

Евиденцијата на МВР покажува дека во земјава има и 660 возила произведени во текот на минатата, 2023 година.

Дизелот излегува од мода, ама не и во Македонија

Друг тренд што важи за македонските возачи е да купат возило од брендот „Фолксваген“ - „пасат“, „голф“, „поло“ - тоа се моделите што најчесто ги гледаме по улиците. И вториот најсакан бренд во земјава е германски „Опел“.

„Фолксваген“ во 2015 година најави дека ќе го намалува производството на дизел-возила. Сепак, таканаречениот дизелгејт на компанијата не се преслика на македонскиот пазар. Податоците за регистрирани возила на МВР за 2021 и 2022 година покажуваат дека сè уште над 60 отсто од возилата во земјава трошат дизел-гориво.

И во 2023 година трендот не бил поинаков. Од АД ОКТА, најголемиот снабдувач со горива во земјава, за „Блумберг Адрија“ велат дека дизелот доминира на домашниот пазар со удел од 63 отсто од вкупната количина на продадени горива, бензините се на второ место со удел од 10 отсто, додека ТНГ (течен нафтен гас) е на третото место со пет отсто.

„Всушност, согласно податоците објавени од страна на Државниот завод за статистика, во изминатите години забележан е видлив пораст во употребата на дизелот на пазарот на Република Северна Македонија“, велат од ОКТА.

За разлика од Македонија, во Словенија на пример трендот за купување дизелаши заврши уште во 2018 година. Според податоците со кои располага словенечката редакција на „Блумберг Адрија“, уделот на дизелот лани паднал на околу 17 отсто, споредено со над 33 отсто во 2020 година.

 

Растат субвенциите за купување електрични возила во регионот

Податоците за Словенија покажуваат и силен раст на употребата на електрични возила. Од три отсто во 2020 година, лани уделот се искачил на над 8 отсто. Државата го стимулира купувањето електрични возила и за таа намена годинава во буџетот има шест милиони евра за субвенции. Тие се движат од две до 6.500 евра по возило, во зависност од неговата вредност.

Во Хрватска, Фондот за заштита на животната средина и енергетска ефикасност годинава ќе одвои дури 15 милиони евра за поттикнување на граѓаните да купуваат енергетски ефикасни возила. Субвенциите изнесуваат од 2.500 евра за мотори и скутери, па и до 9.000 евра за електрични возила.

И другите земји од регионот имаат фонд за исплата на субвенции. Во Србија тој годинава ќе изнесува 1,5 милион евра. Ланските податоци за Босна и Херцеговина покажуваат дека купувањето еколошки возила државата го стимулирала со 500.000 евра, а во Црна Гора со 400.000 евра.

Македонија е единствена земја во регионот без субвенции за електрични возила

Според податоците на македонската Царинска управа, лани во земјава биле увезени 185 нови и 67 стари електрични возила. Но нивните сопственици од државата не добиваат никаква субвенција.

Државни субвенции нема да добијат ниту тие што годинава ќе купат електрично возило. Со години ваквата можност останува само на хартија.

Министерството за економија во 2019 година изработи измени на Законот за возила, во кој беше предвидено субвенционирање на вградување уред за погон на ТНГ, метан или друг вид алтернативно гориво во возилата, а имаше и програма за субвенционирање за купување возила на електричен погон.

Но предлогот на Министерството беше изменет во текот на процедурата во Собранието и од него беше отстранета програмата за субвенционирање за купување возила на електричен погон. Образложението за бришење на оваа програма е тоа што субвенции за истата намена може да се добијат доколку се купува ново возило, а притоа се одјави старото.

„По донесувањето на законот, Министерството за економија во согласност со наведените програми планираше средства за субвенции во буџетот за 2020, 2021, 2022 и 2023 година, во секоја фискална стратегија, но поради ковид-кризата, како и поради финансиската криза, при изгласувањето на буџетот овие средства не беа одобрувани“, велат од Министерството за економија за „Блумберг Адрија“.

Текстот е ажуриран со изјава од АД ОКТА.

Во пишувањето на текстот учествуваа и Наташа Стојановска, Сузана Пељто (Србија) и Урош Божин (Словенија)

Во моментов нема коментари за веста. Биди прв да коментира...

Остави коментар