Нов Зеланд го укинува данокот за бензин, ќе се плаќаат само патарини

Нов Зеланд објави планови за радикална реформа на начинот на кој плаќа за патиштата, вртејќи им го грбот на даноците за бензин, кои беа воведени пред речиси еден век.

Владата ќе го укине данокот и ќе го замени со надоместоци за корисниците на патиштата за сите лесни возила, изјави денеска во Велингтон министерот за транспорт Крис Бишоп. Законодавството ќе биде воведено во 2026 година за да се овозможи новиот систем да биде готов во 2027 година, но не е одреден точниот датум на имплементација, рече тој.

Даноците за гориво моментално се околу 0,70 новозеландски долари (0,41 американски долар) за литар - што претставува повеќе од една четвртина од цената на бензинот - а се собираат од 1927 година како средство за финансирање на одржувањето и модернизацијата на патиштата. Сепак, дизел и електричните возила веќе плаќаат надоместоци за користење на патиштата, додека бензинските автомобили станаа поефикасни во однос на потрошувачката на гориво, што значи дека приходите собрани од данокот се во опаѓање.

„Односот помеѓу потрошувачката на бензин и користењето на патиштата брзо се распаѓа“, рече Бишоп. „Како што се менува нашиот возен парк така мора да се менува и начинот на кој ги финансираме нашите патишта. Не е фер тие што возат помалку и кои не можат да си дозволат автомобил со ефикасна потрошувачка на гориво да плаќаат повеќе од луѓето што можат да си дозволат таков автомобил и возат почесто“.

Според планот на владата, на крајот сите возила ќе плаќаат врз основа на фактичкото користење на патот, без оглед на видот на горивото, рече тој. Но, прво, сегашниот систем за наплата на надоместоци за користење на патиштата треба да се реформира за да се овозможи испорака на соодветна приспособена услуга за возачите, вклучувајќи електронски уреди, кои сè повеќе се вградуваат во современите возила.

„Промените ќе поддржат систем што е поедноставен за користење, технолошки овозможен, со повеќекратни малопродажни опции достапни за возачите“, рече Бишоп. „На крајот, плаќањето за користење на патиштата би требало да биде како плаќање сметка за струја преку интернет или претплата на Нетфликс. Едноставно и лесно“.