Хибридот „ламборгини ревуелто“ од 604.000 долари е врвен предатор

Првпат седнав во „ламборгини ревуелто“ (Lamborghini Revuelto) од 604.363 американски долари возејќи го од мојот дом во Холивуд, на 547 километри северно, до Кармелo, Калифорнија, и оттогаш станав опседнатa со тивкиот електричен режим на автомобилот. Тоа е вистинската вредност на минималното електрично возење во ова хибридно чудовиште. Кога заминувате или пристигнувате на некоја дестинација, можете да се врткате наоколу без грмењето на моторот што ќе ги извести сите за вашето присуство. Тоа е стандардниот режим кога ќе го вклучите автомобилот, ако батеријата е наполнета. Се искрадов од дворот, без да ги иритирам соседите во околните куќи, каде што звукот одекнува дури и при најтивките разговори од терасите. Ме обзеде некакво победничко чувство.

Работата не заврши тука. На секоја бензинска пумпа, а ги имаше неколку бидејќи овој автомобил троши многу бензин, на сончевата маршрута низ полињата во Калифорнија, сите момци лежерно позираа чекајќи да слушнат како моторот ќе згрми. Кога ќе заминев во целосна тишина, само ќе се погледнеа некако збунето. Збогум, момци!

Кога стигнав до Кармело, фактот дека можам да го притиснам копчето за вклучување и тивко да се истркалам во студената утринска магла ме мотивираше да го поставам алармот на мојот телефон порано од вообичаено. Тоа го правев сите четири дена додека возев црно „ламборгини ревуелто“ за време на Неделата на автомобили во Монтереј, годишниот собир што се одржува во Биг Сур секој август, каде што автомобилските ентузијасти се собираат за да продаваат и изложуваат нови и користени возила.

Со каросерија што изгледа како комбинација од ловец, лилјак и лош став, „ревуелто“ докажува дека електричната технологија може да го подобри искуството во возењето без да го намали уживањето. Тоа е врвен предатор, предводник на линијата што целосно го отелотворува возбудливиот потенцијал на хибридната технологија за оваа италијанска марка стара 61 година.

Автомобилите од фабриката „Ламборгини СпА“ (Lamborghini SpA), меѓу сите компании, се чини дека го најдоа вистинскиот баланс помеѓу електричните и моторите со внатрешно согорување за своите клиенти, пред многу поголемите конкуренти. Новите модели на нивните хибриди се продаваат добро, додека „Порше“ (Porsche AG), „Мерцедес-Бенц“ (Mercedes-Benz Group AG), „Стелантис“ (Stellantis NV) и други забележаа разочарувачки пад во продажбата на електрични возила, што ги натера да ги ревидираат своите планови. Автомобилската индустрија не е како што треба, пишува мојот колега Крег Трудел од Велика Британија. „Форд“ (Ford Motor Co.) штотуку откажа цела линија на теренци.

Lamborghini press photos

„Ние во фабриката ’Ламборгини’ ќе го хибридизираме секое возило во нашата флота, но ќе се спротивставиме на целосната транзиција кон електрични автомобили колку што можеме“, вели претседателот и извршен директор Стефан Винкелман. Топ модел на нивните нови хибриди е „ламборгини ревуелто“, претставен во 2023 година. Почна да се продава минатиот месец.

„Ревуелто“ комбинира атмосферски В-12 мотор со 814 коњски сили и три електрични мотори за вкупна моќност од 1.001 коњска сила. Тоа е повеќе од што било друго што „Ламборгини“ го произведува;  го надминува и „ферари СФ90 страдале“ (Ferrari SF90 Stradale) со 986 ​​коњски сили, за оние што водат статистика за суперавтомобили.

Lamborghini press photos

Ова е хибрид што можете да го вклучите во полнач ако сакате, но не морате. Полесно е само да го префрлите прекинувачот на воланот за автоматско полнење на батериите што го напојуваат режимот на електричен погон додека возите. Го направив тоа во режим „градска“ додека возев по автопатот Интерстејт 5 кон свежината на полуостровот Монтереј. Батеријата, која обезбедува околу 10 километри возење само на електричен погон, се наполни сама за неколку минути. Со задоволство следев на инструмент-таблата како индикаторот за полнење расте, знаејќи дека ќе имам доволно енергија да се вратам во бесшумен режим на возење кога и да посакам.

Со 9.500 вртежи во минута, автомобилот ќе експлодира со огромен татнеж кога ќе го вклучите тој мотор. Неговиот осумстепен менувач со двоен куплунг работи беспрекорно преку четири режими на возење, кои можат да ја комбинираат хибридната сила со внатрешното согорување, плус да овозможат погон на четири тркала по потреба. Или, пак, може да се префрли на режимите „страда“, „спорт“ и „корса“, кои ја ослободуваат неговата манијакална целосна потенција на бензин. Хибридниот режим е добар до 150 км/ч. „Ламборгини“ вели дека максималната брзина е 350 км/ч., но не би знаела со сигурност, му реков на сообраќаецот. Возев многу под таа брзина кога ме запревте, му реков, колку да се најдеме во муабет.

Тука нема изненадувања. Задната видливост е намалена поради наклонот на покривот и големите аеродинамички детали од страните на автомобилот. Во секој случај, треба да гледате напред кон патот, нели?

Потрошувачката на гориво е страшна. Електричните мотори не се овде за да ја подобрат ефикасноста на горивото: тие се тука за да ги исполнат барањата за емисии и за еколошки имиџ. Автомобилот троши 10,2 литри на 100 км еквивалентно во хибриден режим, без тоа троши 19,6 литри во комбинирано градско возење и на отворен пат.

Lamborghini press photos

Го наполнив резервоарот двапати возејќи на север, а потоа уште најмалку двапати во текот на неделата. Проблемот не беше само високата цена на горивото. Се сомневам дека некој што ќе потроши повеќе од половина милион долари на овој автомобил, плус 4.500 долари данок на потрошувачка на гориво, ќе биде загрижен за буџетските ограничувања. Поголем проблем беше времето поминато на пумпата.

Уште едно неочекувано изненадување: Овој низок автомобил практично може да се користи само благодарение на автоматскиот подигнувач на шасијата, кој со притискање мало тркалезно копче на воланот го крева предниот дел на автомобилот за неколку сантиметри, што е доволно за да ве извлече од тешки ситуации, како, на пример, излегување од низок автомобил пред некој ресторан.

Сепак, дури и оваа пригодна помошна функција не може да го ублажи чувството на анксиозност што го развивате кога маневрирате со нешто толку долго, ниско и скапо во тесни простори. Повторно, за сопственикот на таква машина, не очекувам проблем да биде трошокот за замена на еден од бандажите (5.500 долари за сите четири, што не е скапо во споредба со многу резервни бандажи за старите автомобили „порше“), туку изгубеното време додека возилото е во сервис, наместо да се вози во полн сјај.

Други поплаки што се акумулираа во текот на неделата: двете контроли на трепкачите беа збиени заедно на левата страна на воланот, наместо да бидат поставени по една на секоја страна, како кај „Ферари“. Тоа  го направи користењето на трепкачите непријатно и нелогично со палците. А вратите „на ножици“, познати како врати „ламбо“ би требало полесно да се отвораат и затвораат.

„Ламборгини“ никогаш не бил познат по своите ентериери. Има простор за подобрување и овде, со екранот на допир во центарот на инструмент-таблата, кој беше наведнат под таков агол што речиси секогаш сјае на сонце и привлекува отпечатоци од прсти како магнет. Блутутот се поврза автоматски само последниот ден, додека го имав автомобилот на располагање, а сè уште не сум сигурна како се случи тоа.

Некои автомобили се подобри од другите, а неверојатниот „ламборгини ревуелто“ е токму тоа. Овој автомобил е бесрамно брз, како вселенски брод дизајниран за специјални пригоди и со соодветна цена. Ако го купите, набавете си и радар детектор, додека можете. Ќе ви помогне да избегнете казна за брзо возење. Јас го научив тоа на потешкиот начин.

Во моментов нема коментари за веста. Биди прв да коментира...

Остави коментар