.webp){kind=icon}
„Ферари“ (Ferrari NV) се приближува кон својот прв целосно електричен суперавтомобил, откривајќи нова фабрика во Италија, каде што марката ќе ја гради следната генерација на своите популарни возила.
Локацијата во Маранело, изградена во изминатите неколку години и заштитена од очите на јавноста, ќе го прави првото електрично возило на „Ферари“ од крајот на 2025 година, заедно со хибридни модели и автомобили со мотори со внатрешно согорување.
Bloomberg Mercury
Со сјајни бели роботи што им помагаат на работниците облечени во црвени комбинезони, објектот од 200 милиони евра го претставува следното поглавје за производителот чии производствени капацитети со години рутински се распродаваат, создавајќи најголеми маржи во индустријата.
„Ферари“ ја претставува фабриката во време на предизвик за секторот за луксузни автомобили, кој работи на намалување на емисиите токму во моменти кога се намалува побарувачката за електрични возила. Главниот извршен директор Бенедето Виња вети дека ќе продолжи со електрификацијата, придржувајќи се до автомобилите со мотори со внатрешно согорување во годините што доаѓаат. Тоа е деликатна рамнотежа за производителот на автомобили, бидејќи помладите купувачи имаат тенденција да избираат електрични опции, но многу етаблирани клиенти не сакаат да се откажат од моќниот звук на моторот на „Ферари“.
Bloomberg Mercury
„Веруваме дека не постои едно решение за идните погонски единици“, изјави Виња за новинарите во Маранело во петокот. „Нашата стратегија е да продолжиме да инвестираме во сите три“.
Новата фабрика не е за зголемување на производството на „Ферари“, туку за поефикасно производство. Со ставање на сите производни процеси под еден покрив - од конструкција на електрични оски и пакување на батериите, до склопување на финалните возила - „Ферари“ има цел да ја заштити ексклузивноста на своите автомобили, а истовремено да оствари поголем профит од нивното производство.
Bloomberg Mercury
Минатата година „Ферари“ испорача 13.663 возила, што е само дел од околу 320.000 продадени од страна на „Порше“ (Porsche AG).
Bloomberg Mercury
Поранешниот извршен директор на производителот на чипови СТМ (STMicroelectronics NV), Виња, започна да ја обликува електричната транзиција на „Ферари“ веднаш откако ѝ се приклучи на компанијата пред речиси три години. За компанијата се сметаше дека влегува доцна во транзицијата - „Порше“ го нуди својот електричен „тајкан“ (Taican) од 2019 година - но претпазливиот пристап може да се исплати: бидејќи продажбата на електрични возила во Европа е бавна, компаниите како „Стелантис“ (Stellantis NV) и „Фолксваген“ (Volkswagen AG) ги намалуваат или ги рефокусираат своите проекти за електрични автомобили, додека „Мерцедес“ (Mercedes-Benz Group AG) се обврза дека ќе продава традиционални автомобили подолго од очекуваното.
Зборувајќи во интервју за телевизијата „Блумберг“, Виња одби да коментира колку ќе чини новиот целосно електричен суперавтомобил, велејќи дека компанијата ќе ги открие информациите за цените еден месец пред автомобилот да излезе во продажба.
Со површина од околу шест фудбалски игралишта северно од неговото историско седиште, новиот објект има ергономски работни станици, области за ладење и покрив со повеќе од 3.000 соларни панели. „Ферари“ ги мина последните две години обучувајќи ги своите работници за новите линии, учејќи ги хемија и вештини за склопување батерии.
Bloomberg Mercury
Главниот производствен простор блеска во бела боја, со примеси на заштитниот знак на брендот, црвено на скалите и столбовите. Ноќе фасадните светла прават фабриката да свети како фенер.
Bloomberg Mercury
Новата фабрика „ќе ни гарантира зголемена флексибилност во целата наша производствена линија“, рече Виња. „Нашиот етос ќе остане ист: квалитетот над квантитетот“.
