Полскиот проект за производство на електрични возила виси на конец

Напорот на Полска да основа сопствен бренд за електрични автомобили е без успех, а главниот извршен директор на проектот, кој е поддржан од државата, предупредува дека нивниот кинески партнер може да се повлече поради недостиг од финансии.

„Електромобилити“ (ElectroMobility Poland SA), која до денес собра околу 580 милиони злоти (133 милиони евра) од државата и компаниите под државна контрола, мора да собере уште две-три милијарди евра за да ги започне работите во врска со иницијативата за производство на автомобили. Има договор за лиценцирање технологија од кинеската групација „Џеџјианг Гили“ (Zhejiang Geely Holding Group Co).

Но важноста на тој договор, постигнат пред точно две години, му е при крај, посочува заменикот на главниот извршен директор Лукаш Маличенко. Доцнењето во обезбедувањето средства од Европската Унија (ЕУ) и конкуренцијата од другите земји во блокот што се борат за кинески инвестиции може да ја уништат шансата за партнерство, рече тој во интервју.

„Гледам голем ризик во однос на тоа што доцнењето на процесот на финансирање може да доведе до потреба од ревизија на нашето партнерство, па дури и до барање друг партнер. Тоа би било голема загуба и пропуштена голема можност“, рече Маличенко.
Претставниците на „Гили“ одбија да коментираат.

„Електромобилити“ ги влече своите корени од поранешниот националистички премиер Матеуш Моравјецки, кој пред осум години прогнозираше дека на полските патишта до 2025 година ќе има еден милион електрични возила, а сакаше многу од нив да бидат произведени од домашна компанија. Моравјецки ја напушти функцијата минатата година, а земјата нема да биде ни блиску до бројката на електрични возила што тој ја замисли, бидејќи во моментов во Полска се возат нешто повеќе од 74.000 возила на електричен погон.

Маличенко рече дека ако „Електромобилити“ успее да обезбеди средства годинава, ќе може да започне со изградба на фабрика во јужниот полски регион Шлезија, кој е богат со јаглен, и тоа уште во првиот квартал од идната година, а со производство да започне околу две години подоцна. Фабриката би имала капацитет да произведува 150.000 возила годишно.

Тие возила ќе се продаваат под брендот „Изера“ (Izera), а можеби и под брендови по избор на нејзиниот партнер. Со цел да опфатат повеќе потрошувачи, покрај електричните возила, „Електромобилити“ може да произведува и хибриди.

Полскиот проект ќе се усогласи со напорите на кинеските производители на автомобили да го локализираат производството во ЕУ за да се избегнат повисоките царини воведени минатиот месец. Од друга страна, Пекинг изврши притисок врз производителите на автомобили да го прекинат проширувањето во блокот додека траат преговорите за давачките, објави „Блумберг њуз“ (Bloomberg News) минатиот месец, цитирајќи луѓе запознаени со ова прашање.

Се чини дека ова веќе има ефект. „Мани.пл“ (Money.pl) неделава објави дека „Џеџјианг липмотор“ (Zhejiang Leapmotor Technology Co.) и „Стелантис“ (Stellantis NV) го прекинале проектот за заедничкото вложување за производство на електрични градски автомобили во Полска. Државната агенција за надворешна трговија и инвестиции (ПАИХ) преку својата интернет-страница извести дека потегот е резултат на одлуката на кинеското Министерство за економија.

Маличенко рече дека кредиторите во текот на првичните разговори не сигнализирале дека проектот „Електромобилити“ е премногу ризичен или дека не може да продолжи. Минатиот месец „Енергетика24.пл“ (Energetyka24.pl) објави дека „Гили“ може да се одлучи да инвестира во фабрика во Шпанија бидејќи полскиот проект трае предолго.

„Мора да запомниме дека иако успеавме да обезбедиме конкурентна технологија, постои трка за заземање соодветно место на европскиот пазар. Натамошните одложувања и за нас и за нашиот партнер едноставно се изгубена можност за водење бизнис“, рече Маличенко.

Во моментов нема коментари за веста. Биди прв да коментира...

Остави коментар