Сега е вистинско време за половен златен „ролекс“

Сега е добро време за колекционерите на луксузни часовници да купат половен „ролекс дејтона ојстерфлекс“ (Rolex Daytona Oysterflex). Особено ако можат да пронајдат модел од жолто злато.

Цената на тој модел падна за четири проценти од април, според Bloomberg Subdial Index, следејќи го падот на пазарот на злато, кој започна кога САД и Израел почнаа војна против Иран.

Вкупните цени на 13 модели со куќиште од злато што се наоѓаат во индексот, кој ги следи 50-те часовници со најголем промет според вредноста на трансакциите, главно се непроменети од април. Тоа претставува значително забавување во однос на 2025 година, кога тие 13 модели забележаа просечен раст од речиси 9 отсто, додека цените на златото силно растеа.

Растот на половните часовници со златно куќиште забавува

Флуктуациите на цените на златото „секако стануваат сè поголем проблем кога трошоците за благородните метали растат толку брзо и во толкава мера како што беше случај во последните неколку години“, изјави Оливе Милер, основач на компанијата „Лукс консалт“ (LuxeConsult), советодавна фирма специјализирана за оваа индустрија.

„Тука се и новите производствени процеси што овозможуваат значителни заштеди во количествата на потребното злато, благодарение на изработката на шупливи компоненти“, изјави Милер.

Сепак, новите показатели потврдуваат дека пазарот на половни часовници и понатаму во голема мера зависи од перформансите на избрани клучни модели. Индексот покажува дека вредноста на десетте најбарани часовници - од кои пет се златни модели на компаниите „Ролекс“ (Rolex) и „Патек Филип“ (Patek Philippe) - пораснала за нешто повеќе од два процента од април.

Тоа укажува дека пазарот го движат најпосакуваните модели, а не само движењето на цената на златото.

„Култните брендови и историските модели, со врвна изработка и квалитет - токму тие го предводат пазарот“, изјави Александар Нусбахер, директор за податоци во компанијата „Сабдајл“ (Subdial), платформа за купување и продажба на часовници.

Цената на златото падна за повеќе од една петтина откако започна конфликтот на Блискиот Исток во февруари, откако бранот на реализација на профитот го заврши тригодишниот растечки пазар и минатиот месец го турна овој благороден метал во надолен пазар.