„Дали вашето височество се чувствува повеќе како сребрена личност или златна личност? Годината е 1951, а прашањето е упатено до принцезата Маргарет во врска со фустанот што Кристијан Диор го подготвува за прославата на нејзиниот 21. роденден. Како што се очекуваше, принцезата избира злато, но креативниот одговор е неочекуван: наместо златни нишки, Диор користи рафија, дрво покриенo со слама, светкави школки од бисер и имитација на скапоцени камења и везови за да ја комплетира легендарната креација достапна за светската јавност како дел од постојаната изложба на Лондонскиот музеј на костими од 1968 година.
И сега, повеќе од 70 години по овој момент што го одбележи пробивот на „Диор“ на модната сцена надвор од границите на Франција, групацијата ЛВМХ (LVMH,) сопственик на империјата „Диор“, освојува нови простори.
Претседателот на групацијата Бернард Арно, кој, како што неодамна објавивме, го надмина Илон Маск со богатство од 210 милиони, го започна својот пробив во светот на луксузот во 1984 година, со преземањето на „Бусак Сан Фрер“ (Boussac Saint-Freres), релативно непозната текстилна групација во банкрот, која, сепак, поседуваше уникатен скапоцен камен во своето портфолио: Кристијан Диор. Во текот на следните три децении и преку неколку стратегиски аквизиции, Арно ја позиционира ЛВМХ во епицентарот на луксузот, продавајќи познати брендови на пијалаци, облека, чанти и накит во 5.600 продавници низ светот.
Depositphotos
Уште во 1992 година тој почувствува дека Кина ќе стане клучен пазар и ја отвори првата продавница на „Луј Витон“ во Пекинг. За неодамнешниот успех, со кој Арно и официјално стана најбогат човек на светот, придонесоа токму присуството на кинескиот пазар и побарувачката на купувачите за скапа стока.
Со одлуката за премиера на својата колекција за есен 2023 година во Мумбај неодамна, „Диор“ е првата глобална модна куќа што ја претстави новата колекција во Индија.
Ваквата одлука не е нова за „Диор“, кој веќе покажа колекции на непознати локации со светски познати топоними како заднина: да се потсетиме на минатогодишната есенска колекција за мажи, која беше прикажана со пирамидите во Гиза како заднина.
Изборот на Портите на Индија (името за градот Мумбај, но и на монументалната градба преку која од пристаништето се влегува во градот) како сценска платформа за модната ревија симболично ја навестува стратегиската амбиција на куќата да го освои брзорастечкиот пазар, кој, според истражувањето на Оксфам, веќе сега е база на дури 119 милијардери.
Впечатливата модна ревија во форма на здолништа и болеро инспирирани од сари, како и живи свилени креации исткаени со егзотични мотиви и живи бои на Индија, веќе истиот ден даде повеќе од впечатлив резултат за ЛВМХ, групацијата што го поседува брендот: „Диор“ бележи рекорден раст на акциите за еден процент во еден ден до 838,7 евра (913 долари), известува Малавика Каур Макол од „Блумберг“.
Bloomberg
„Тоа е неискористен пазар со растечка средна класа и куповна моќ и сè повеќе милионери“, објаснува Дебора Аиткен, виша аналитичарка во „Блумберг интелиџенс“ (Bloomberg Intelligence). „Кога ќе го споменете ’Диор’, директна асоцијација се парфемите и шминката, кои се исклучително силни и кои претставуваат почетна позиција за влез во светот на луксузот за многу потрошувачи“, вели Аиткен. „Тоа е енергично воведување на нов дизајн, нови технологии во светот на луксузните производи, што ѝ треба на Индија“, додава таа.
Bloomberg
Еден од начините на кои „Диор“ се поврза со локалната економија е секако соработката со работилниците „Чанакија“, познати по светскиот извоз на рачно извезени парчиња.
Работилниците „Чанакија“ веќе соработуваат со брендови како „Версаче“, „Валентино“, „Балмејн“, „Сен Лорен“, „Баленсијага“, „Монклер“, а дел од нивните орнаменти носеше и Мадона. Соработката со „Диор“ доби уште посериозни размери во 2016 година, кога за креативна директорка беше назначена Мариза Грација Чиури, која беше менторка на проектот за едукација на жените, во кој над 1.000 од нив добија можност да најдат вработување или да основаат сопствена работилница, активности што дотогаш беа резервирани исклучиво за мажи. Првата жена на чело на оваа модна куќа е позната по своето феминистичко однесување, редефинирањето на женственоста што ја „кроеја“ нејзините машки претходници, но и по тоа што трикратно го зголеми профитот на вториот најголемиот бренд во портфолиото на групацијата.
.webp){kind=icon}
