„Гучи“ очекува розова иднина со „Валентино“

„Керинг СА“, сопственик на луксузниот бренд „Гучи“, купи 30 отсто од акциите на брендот „Валентино“ за 1,7 милијарда евра (1,9 милијарда долари) во готовина. Договорот со катарскиот фонд „Мејхола“ (Mayhoola) вклучува опција за купување на преостанатите 70 проценти од капиталот на „Валентино“ до 2028 година, соопшти сопственикот на „Гучи“. Овој деловен потег е дел од поширокото стратегиско партнерство, што би значело дека фондот би можел да стане значаен акционер во „Керинг“ и да донесе други предности.

Имено, има само малку значајни луксузни брендови што се неоптоварени со семејна сопственост. „Валентино“ е култен италијански луксузен бренд со силни корени во високата мода. Тоа може да објасни зошто „Керинг“ беше подготвен да плати голема сума за брендот најпознат по интензивната розова боја на колекцијата што креативниот директор Пјерпаоло Пичоли ја претстави во март 2022 година.

Во трансакцијата „Валентино“ беше проценет на 5,7 милијарди евра, при што компанијата оствари продажба од 1,4 милијарда евра во 2022 година и добивка пред камати, даноци и амортизација (ЕБИТДА) од 350 милиони евра. Тоа укажува на мултиплицирање на аквизицијата од околу 16 пати по остварена ЕБИТДА, слична сума на онаа што „Монклер Спа“ (Moncler SpA) ја плати за брендот „Стоун Ајленд“ (Stone Island) во 2020 година.

Преземањето е дел од стратегијата на „Керинг“ да ја намали зависноста од „Гучи“, која сочинуваше половина од продажбата на групацијата и две третини од нејзината оперативна добивка минатата година. Сепак, „Гучи“ неодамна имаше слаби резултати, со раст на продажбата од само еден процент во вториот квартал, далеку под растот од 21 отсто забележан од одделот за мода и кожени производи на ЛВМХ (LVMH).

Bloomberg Mercury

„Керинг“ исто така има силно искуство кога станува збор за освежувањето на модните брендови, како што се „Сен Лорен“, „Ботега Венета“ и „Баленсијага“ (барем пред рекламниот скандал минатата година). Компанијата впрочем многу добро го познава менаџментот на „Валентино“. Сабато де Сарно, новиот дизајнер на „Гучи“, премина во „Гучи“ директно од последниот ангажман што му беше во „Валентино“, а извршниот директор на „Валентино“, Јакопо Вентурини, порано беше главен комерцијален директор на „Гучи“. Тој беше заслужен за една третина од ренесансата на „Гучи“ пред осум години, секако заедно со извршниот директор на „Гучи“ во заминување Марко Бизари и поранешниот дизајнер Алесандро Микеле.

Од друга страна, „Валентино“ ќе има корист од припадноста на една од најголемите луксузни групи во светот. Најголемите играчи имаат ресурси да инвестираат во најимпресивните маркетинг-кампањи, најдобрите продавници и престижни дизајнери, што ја отежнува позицијата на компаниите со средна големина во тој сектор.

„Керинг“ и „Мејхола“ ќе работат и на други деловни можности, како на пример очила и парфеми. Во овој договор засега не е вклучена француската модна куќа „Балмен“ (Balmain), која исто така му припаѓа на катарскиот инвеститор. Сепак, тоа останува една од можните опции за во иднина.

Малку е изненадувачки што „Керинг“ одлучи да направи дополнителна инвестиција во модата, особено што „Валентино“ не заостанува премногу зад „Сен Лорен“. Компанијата навистина треба да стекне дополнителни ресурси во индустријата за убавина, каде што неодамна ја купи луксузната куќа за парфеми „Крид“ (Creed), или во накитот, каде што моментално има помало присуство, иако тоа е делумно ограничено од достапноста на соодветни ресурси.

И додека „Валентино“ уживаше во моментите на успех, тој сè уште не го исполни својот целосен потенцијал. Тоа значи дека има простор за раст, што бара многу работа, а „Керинг“ е веќе доста зафатен со работа на другите свои брендови. Придобивката на „Валентино“ може да биде во позначајно позиционирање и во постигнување поголема видливост. „Керинг“ веќе е на тој пат со „Гучи“ додека истовремено се обидува да го врати ефектот со „Баленсијага“.

Во зависност од тоа колку ќе биде вклучен „Керинг“ во самиот менаџмент - да има место во одборот на директори и да сака да ги забрза растот и развојот на брендот - менаџментот може да биде преоптоварен. Компанијата неодамна најави промени во врвот на раководството, вклучувајќи го и заминувањето на Бизари од „Гучи“.

И додека „Керинг“ има силна билансна позиција по три години раст во луксузниот сектор, со инвестицијата од 3,5 милијарди евра за преземање на „Крид“ (Creed), нето-долгот, без обврските за закуп, веројатно ќе надмине 3,9 милијарди евра, колку што изнесуваше на 30 јуни.

Bloomberg Mercury

Сепак, вреди да се запамети дека „Керинг“ е мајстор за враќање на привлечноста на модните брендови. Во светот на висококвалитетните производи, откако брендот ќе биде преземен од индустриски гигант, тој ретко се појавува повторно сам. Значи, ако „Керинг“ успее да го подобри „Валентино“, тоа ќе биде „живот во розово“!

Во моментов нема коментари за веста. Биди прв да коментира...

Остави коментар