Како часовниците „ричард мил“ станаа симбол на екстравагантно богатство

Часовникот „ричард мил“ (Richard Mille Co.) е моќен симбол на богатство за секој што е доволно упатен да ги препознае неговите познати контури.

Француската компанија произведува само околу 5.300 часовници годишно, а нивната просечна цена е 250.000 долари. Часовниците што се дизајнирани да издржат високи гравитациски сили ги носат спортисти на трки во Формула 1, на турнири во голф и на регати за јахти. Тие исто така ги красат зглобовите на музичари како Фарел Вилијамс и Ајс-Ти.

„Ричард Мил“ (РМ) се забележува лесно: многу од нив имаат облик на буре или заоблен правоаголник - често со проѕирни бројчаници, така што прецизно изработената сложена механика е изложена на поглед. Тие се дрски, оригинални и направени од врвни материјали, како што се титаниум и заштитена верзија на јаглеродни влакна. Како симбол на робусноста на часовникот, прстенот од завртки често останува видлив по должината на надворешниот прстен или рамката на часовникот. „Тие шрафови во минатото се користеле за да го држат куќиштето на место, но сега имаат повеќе естетска намена“, вели Крег Каргер, основач и сопственик на „Вирст ентузијаст“.

За нешто повеќе од две децении, „Ричард Мил“ дојде одникаде и се проби меѓу првите шест бренда на часовници по продажба, а во 2022 година приходите му се зголемија за 15 отсто, на 1,3 милијарда швајцарски франци (1,5 милијарда долари), според извештајот на „Морган Стенли“ за 2023 година За споредба, „Одемар Пиге“ - основана во 1875 година - произведува 50.000 часовници годишно по просечна цена од 51.000 долари по парче, со 2,27 милијарди долари годишен приход во 2022 година, се наведува во извештајот.

„Иако брендот ’Ричард Мил’, основан во 2001 година, немаше наследство, неговите основачи имаа многу јасна визија“, се наведува во извештајот на „Морган Стенли“. „Неговиот успех во последните две децении нема еквивалент во швајцарската индустрија за часовници“.

Ова лето беше преполно со настани и промоции на брендови, а „Ричард Мил“ одеднаш беше насекаде - барем меѓу богатите и впечатливите - и покрај тоа што неговите примероци се релативно ретки.

Компанијата сега официјално го става на продажба „РM УП-01 ферари“ – најтенкиот механички часовник на планетата – по цена од речиси два милиона долара. Прототип веќе носеше Фарел, портпаролот на брендот, на својата модна ревија „Луј Витон“ во Париз во јуни.

Зошто луѓето трошат толку многу на овие часовници? Да погледнеме како „Ричард Мил“ стана повеќе од само уште еден луксузен часовник.

Историјата на „Ричард Мил“

Коосновачот на брендот Ричард Мил ја започнал својата кариера во 1970-тите кај малиот француски производител на часовници „Финхор“ (кој беше апсорбиран од сега веќе непостојната француска групација „Матра“). По повеќе години во индустријата, „Мил“ сакал да се обиде самостојно во работата и да се позанимава со сѐ што не му се допаѓало кај обичните часовници - да направи нешто што ќе го размрда статус квото, вели Александар Мил, комерцијален директор на компанијата и син на Ричард. Постариот Мил црпел инспирација од тркачките машини на Ф1 и го поврзал идентитетот на брендот со спортските автомобили.

Тој се здружил со коосновачот Доминик Гуенат за да го создаде првиот часовник, „РМ 001 турбијон “, претставен во 2001 година. Од него биле произведени само 17 парчиња. Веднаш го привлекол вниманието, најмногу поради цената од 135.000 долари, но и поради употребените материјали, како што е титаниумот, лесен но цврст метал. Првиот часовник вклучувал динамометар, кој го мери вртежниот момент, и стрелка за индикаторот на вртежниот момент. Според компанијата, часовникот имал резервна енергија од 72 часа, во споредба со стандардните 48 часа.

Оливер Милер, основач на швајцарскиот „Лукс консалт“, се сеќава како тој часовник ја размрда индустријата.

„Цената беше толку неверојатно висока што многу луѓе беа шокирани и го прашаа г. Мил: ’Зошто би продавале поскапо дури и од ’Патек Филип’, кој сè уште се смета за ’ролс-ројс’ во часовничарството?’ А тој одговори: ’Многу лесно, бидејќи не се натпреваруваме со ’Патек Филип’ ниту со некој друг’. Тоа е многу смела изјава“.

Деновиве истиот мал број произведени часовници, дизајнот и високите цени го направија статусен симбол. Брендот стана познат како „ракување на милијардерите“, вели Ерик Винд, шеф на компанијата „Винд винтиџ“ од Палм Бич, Флорида.

Фокус на издржливоста, функционалноста и дизајнот

Кога Ричард Мил ја основал компанијата, тој одел на конгреси и го фрлал часовникот на тротоар за да покаже дека нема да се скрши. „Неговата цел беше да создаде модерен часовник што  е издржлив, нешто што може да издржи сѐ“, вели Александар Мил. Часовниците се тестирани рачно и машински, подложени на мали и големи удари, како и на ултравиолетови тестови и тестови на влага, велат од компанијата.

Тестирањето може да биде „едноставно брутално“, според една од книгите на брендот, „Монографи II“. „Прототипите на часовниците ќе бидат нападнати од сите страни, удирани од ’козја нога’ – голема глава на чекан на нишало што се користи за удирање на куќиштето на часовникот од сите агли и во сите позиции“.

„Функцијата и убавината работат заедно. Кога го ставате на вашиот зглоб, совршено ви прилега“,вели Александар. „Можете да го видите секој дел од часовникот“.

Ричард Мил и Гуенат исто така сакале нивните производи да бидат навистина корисни за спортистите. На пример, часовникот „РM 055 буба вотсон“ има сензор за G-сила, кој може да ја мери силата на замавнување на голферот.

Зошто се толку високи цените на часовниците РМ?

Продавница на брендот „Ричард Мил“ во Њујорк/Bloomberg

Од една страна, „ричард мил“ е исклучително квалитетен часовник. Производството вклучува изработка на ситни механички прецизни движења - основниот мотор на часовникот - со висококвалитетна завршна обработка и материјали. И се произведува во мали серии, така што часовничарот не може да ги искористи предностите на обемот. Од друга страна, истото тоа може да се каже и за часовниците што чинат само делче од таа цена.

„Некои луѓе велат: ’Ох, знаете, ’ричард мил’ е прескап, тоа е глупост“, вели Милер. „Не се согласувам со тоа. Станува збор за врвна изработка на часовници. Тоа е иновативно“.

Компанијата склучи договори за употреба на некои заштитени материјали, како што е тенкослојниот карбон TPT, произведен од швајцарскиот бренд „Норт тин пли технолоџи“. Меѓу производителите на часовници, „Ричард Мил“ има ексклузивни права на материјалот, кој има слоеви од јаглеродни влакна, што го прави лесен и цврст, велат од компанијата.

Дали вреди? Зарем тоа не е егзистенцијално прашање за секој луксузен производ? По дефиниција, тоа е вредно затоа што луѓето плаќаат за тоа.

Специјални серии РМ

Новите производи на „Ричард Мил“ не се само нови часовници; често тоа се специјални изданија или новитети, создадени во соработка со славни личности или спортски организации што  му даваат публицитет.

Во 2014 година компанијата го претстави „РМ 57-01 турбијон џеки чен“, со рачно насликан змеј што се обвиткува околу бројчаникот. Комплексноста на часовникот е заштитена со круна за ограничување на вртежниот момент за да се спречи прекумерно навивање на часовникот, а серијата беше ограничена на 15 парчиња. Друг пример на мала серија од 30 парчиња, „РМ 19-02 турбијон флер“, беше претставен во 2015 година. Цветот магнолија на лицето на часовникот, кој претставува долговечност, се отвора и затвора во ритмички циклус.

А во 2017 година компанијата го произведе „РМ 50-03“. Тие тврдеа дека тоа е најлесниот механички хронограф во светот, а е направен во соработка со Ф1-тимот на Мекларен.

„Кога претставувате новитети во многу, многу мали количества, луѓето стануваат уште полуди по новитетите“, вели Милер. „Вие создавате поголема побарувачка. И тоа функционира. Богатите луѓе многу се наивни: ако ги наведете да веруваат дека не можат да купат нешто, тоа ќе им ја зголеми желбата да го добијат тоа нешто“.

Кој носи часовници „ричард мил“?

Компанијата има развиено партнерства со доминантни играчи во спортот, вклучувајќи го и партнерството од 2010 година со Рафаел Надал. Возачот на Формула 1 за тимот на Ферари, Чарлс Леклерк носи исклучиво часовници „ричард мил“; забележан е со моделите „РМ 35-01 рафаел надал“, „РM 35-03 рафаел надал“ и други. Меѓу другите претставници на брендот се голферките Кристи Кер и Дијана Луна, скијачите Алексис Пинтураулт и Јоханес Тингнес Бо, како и јавачите Карлос Хенк Гереиро и Флоре Жиро.

Потоа, тука се актери како Мишел Јео, на чиј зглоб се „РМ 051“ и „РM 51-01 турбијон“, па дури и ликови од серии - како што е Кендал Рој од „Следоред“ (Succession), кој во четвртата сезона почна да носи „РM 67-01“, кога мораше да се соочи со најголемата игра на моќта во својот живот.

Кога извршниот директор на компанијата за спортска опрема „Фанатикс“, Мајкл Рубин, ја организираше својата годишна бела забава на 3 јули во Хемптонс, таму беа забележани часовници „ричард мил“ вредни стотици илјади долари и повеќе. Раперот Тревис Скот носеше „РM 69“, НБА-ѕвездата Џејмс Харден носеше „РM 40-01“, додека раперот Френч Монтана покажа „РM 35-02“.

Организирање на сите вистински забави

Дел од џетсет-привлечноста на „Ричард Мил“ е тоа што кога купувате еден од тие часовници, се согласувате со одреден начин на живот. Брендот се труди на своите најдобри клиенти да им понуди белег на тој живот и да ги поврзе со настани што ја носат таа привлечност. Тие се за „дружење со семејството и пријателите“, кога треба „да одвоите време да разговарате низ меѓучовечката поврзаност и подобро да се запознаете“, вели Александар Мил.

Еден таков настан е новиот куп „Ричард Мил“, регата за чамци изградени пред 1939 година - или реплики на чамци од таа доба. Ричард Мил, еден од основачите на купот, има старински брод, кој пловеше на трката што се возеше од 10 до 25 јуни и на која учествуваа 15 јахти. Започна во Фалмут, Англија, а заврши во Авр, Франција.

Во чамците беше вклучен „монобим IV“, долг 35 метри (115 стапки). Во 1950 година го купил принцот Рение од Монако, кој го користел за својот меден месец со Грејс Кели. Ричард Мил повлече паралели помеѓу чамците и своите производи. Овие јахти, изградени од благородни материјали, имаат душа“, истакна Мил на веб-страницата на компанијата. „Постојат огромни сличности меѓу овие бродови и нашите часовници. Точно, тие не се од иста доба, но тие се родени од истиот филозофски пристап“.

Од раните денови на компанијата, Ричард Мил е главен спонзор и официјален мерач на време на „Ле манс класик“, трка со спортски автомобили во Франција, која се фокусира на старински автомобили. Годинешниот часовник во чест на трката, „РM 72-01 ле манс класик“, е во зелено-белите бои на настанот. Часовниците во ограничена серија од 150 парчиња чинат 335.000 долари по парче.

Ричард Мил исто така го спонзорира и Релито на принцезата, годишен настан за мотоспорт, кој се одржа во јуни во Франција; наменет за женски колекционери на автомобили. Живописната маршрута ги водеше возачите по француската ривиера, почнувајќи од плоштадот „Вандом“ во Париз и завршувајќи во Ница.

Во меѓувреме, „Д бриџ“, кој се одржува секоја година во Хемптонс, претставува љубовно писмо за старинските автомобили. На настанот, кој ќе се одржи на 23 септември, ќе присуствуваат само поканети гости, а поканите одат кај луѓе како што се партнерите на брендот и нивни гости, оние што имаат автомобил на изложба и специјални колекционери - клучна публика за часовничарот. Коосновачката на „Бриџ“, Шамин Абас, истакна дека „Ричард Мил“ е „многу вклучен во настанот“.

 

- Напишано со помош на Енди Хофман.