Првото сако за мотоциклисти во светот што истовремено обезбедува деловен изглед и заштита е македонски производ. Ова уникатно парче облека е иновација на младиот претприемач Нино Карас, кој е страстен мотоциклист.
За него возењето на две тркала не е само начин за опуштање во слободното време туку и редовно превозно средство до работното место, но и до секој состанок или настан реализиран надвор од канцеларијата. Токму поради тоа тој губел драгоцени минути во секојдневниот избор на облека. Барајќи решение на интернет, сфатил дека иста мака делат милиони мотоциклисти низ светот, кои постојано мора да избираат меѓу изгледот и заштитата, па одлучил самиот да го реши овој проблем.
Од првичната идеја за креирање на ова заштитно сако до производството на првата серија поминале повеќе од две години, кои ги посветил на истражување и развој. На почетокот сè изгледало многу едноставно.
„Мислевме дека ќе вметнеме кевлар и штитници под едно класично сако и толку. Сфативме дека сме далеку од вистината. Целиот процес на прототипирање, дизајн и развој не беше воопшто едноставен. Од начинот на вклопување на заштитните компоненти до самиот дизајн моравме да креираме нешто досега невидено на светскиот пазар и направивме над 12 прототип итерации за да стигнеме до крајниот производ“, открива Карас, соосновач на „Брамел“ (Brummell), компанијата што ги има правата за оваа „патент пендинг“ (patent-pending) иновација.
Brummel
Во разговорот за „Блумберг Адрија“ тој детално раскажува од какви материјали е направен овој уникатен производ. За надворешниот дел е користена премиум волна, а однатре сакото целосно е зацврстено со еден од најпознатите заштитни материјали на пазарот (DuPont™ Kevlar®), кој, како што појаснува, при незгода и лизгање на асфалт не се кине и ја штити кожата на мотоциклистот. На лактите, рамената и грбот, пак, е инкорпорирано највисоко ниво на штитници SAS-TEC.
Сакото има посебни фалти на рамената, а сите материјали содржат еластин. Вграден е посебен систем за вентилација, кој овозможува пријатна температура при возењето, но и посебен безбедносен систем за закопчување, како и околувратник што го штити градниот кош на возачот за да го заштити од хипотермија. Карас вели дека ова е прво вакво парче облека што е тестирано и сертифицирано според најригорозната регулатива за мотоопрема, EN 17092, како ниво А за заштитна мотоопрема.
Сакото е работено во две фабрики во Македонија. Едната е специјализирана за производство на машки сакоа и тешка конфекција, а другата за производство на заштитна опрема. Тоа чини 649 долари, а за купувачите се достапни и различни додатоци, таканаречени „брамел скинс“ (Brummell Skins), со кои можат да го променат надворешниот изглед, без повторно да го купуваат целосниот комплет. Овие „скинови“ чинат 349 долари и се прикачуваат на заштитниот дел од сакото.
Brummel
Во моментов најмногу купувачи има од Америка, а го бараат и мотоциклисти од Австралија, Нов Зеланд и од повеќето европски земји. Освен онлајн, достапно е во две продавници во САД, но и во две македонски продавници (Sky Moto и Triumph Motorcycles).
Во целиот процес на истражување и развој, производство, тестирање и сертифицирање досега се вложени околу 300.000 евра. Очекувањата на инвеститорите се во следните неколку години „Брамел“ да стане водечка компанија за елегантна и заштитна мотоопрема во светот со илјадници задоволни купувачи.
„Досега немаме аплицирано за грантови и сите работи се финансирани од наши лични средства, како и од две инвестиции во вкупен износ од 200.000 евра, од ’Х Фактор акцелератор’ (Велес) и ’Фешн технолоџи’ (Fashion Technology Accelerator) од Милано. Најтешкиот пат веќе го изодевме, од аспект на дизајн, тестирање, производство и првична валидација и сега сме во процес на собирање средства за нашата нова рунда за комерцијализација на продуктот“, вели Карас.
Brummel
Од компанијата најавуваат и нови производи. Тие се пофалија дека веќе е завршен финалниот прототип на женско сако, кое планираат да го лансираат во следните неколку недели. Во моментов се работи и на дизајнирање и прототипирање на панталони со кои „Брамел“ ќе почне да го освојува пазарот кон крајот на септември.
На почетокот на годинава „Блумберг Адрија“ го избра Нино Карас во Топ 50 највлијателни луѓе во регионот во 2023 година. Тој е соосновач и на компанијата „Кодвел“ (CodeWell AI), која лани беше избрана за најбрзорастечки стартап во Македонија. Станува збор за платформа за креирање дигитални вработени за банкарската индустрија, кои автоматизираат 90 отсто од комуникациските процеси управувани од луѓе во компанијата, ја зголемуваат продажбата и ги намалуваат оперативните трошоци за 40 отсто.
По стотина реализирани продукти во полето на конверзациската вештачка интелегенција, лани Карас на македонската влада ѝ ја предаде Ада, дигитална асистентка со натпросечно знаење.
.webp){kind=icon}
