Иновативна облека наменета за лицата со попреченост наскоро ќе почне да се произведува во Македонија. Станува збор за дизајнирани парчиња што на овие граѓани треба значително да им го олеснат процесот на облекување. Брендот ZEN* е најавен како одржлива и функционална „мода од иднината“, а сопственикот Гере Трипков, и самиот лице со хендикеп, најавува сериозен бизнис-модел со кој планира да го освои глобалниот пазар.
„Лицата со попреченост како општествена заедница што сочинува 15-20 проценти од светската популација се справуваат со секојдневни предизвици и проблеми, а еден од нив е немањето пристапност на пазарот на гардероба до облека што одговара на нивните конкретни потреби“, вели Трипков, кој е магистер по меѓународни односи.
Според негови сознанија, едвај 50 компании на светско ниво се занимаваат со производство на колекции готови за носење (облека произведена во стандардни големини) што се наменети за лица со попреченост. Тој е првиот во регионот Адрија што иницира производство во оваа гранка од текстилната индустрија, која, како што вели, врти шест милијарди евра во просек на годишно ниво.
Адаптираната облека од брендот ZEN* вклучува јакна, панталони, фустан и кошула. Приоритет во дизајнерските решенија била употребата на самозатворачки оригинални механизми наместо класични копчиња и патенти, кои најчесто се користат, а се најмалку функционални за лицата со попреченост. Освен удобност, овие парчиња треба да овозможат безбедност, провевност и сензорна пријатност.
Конект
„Нашата намера е дотерувањето на потенцијалните клиенти од фрустрирачка активност да се преточи во процес што ќе претставува уживање и ново ниво на лајфстајл“, нагласува Трипков.
Производството на ваков тип облека чини многу повеќе од она што сезонски го создаваат комерцијалните брендови. Цените ќе бидат дефинирани според изборот на додатоци што одговорат на потребите на потрошувачот и кои ќе бидат додадени кон основниот производ.
„Цената на кошулата, на пример, е проектирано да започнува од 79 евра, а финалниот износ ќе зависи од инкорпорираните додатоци што купувачот ќе ги одбере во согласност со сопствените потреби. Овој концепт е дефиниран како модуларна мода“, појаснува тој.
Како претставник на заедницата на лица со попреченост и познавач на нивните уникатни потреби, но и како поранешен модел со интернационална кариера, кој десет години работел за брендови од Америка, Европа и Азија, Трипков го предводи креативниот тим задолжен за дизајн и развој. Во екипата се вклучени и етаблираната модна креаторка Евгенија Зафировска-Трајкова и младата дизајнерка Сара Величковска.
Проектот е замислен како безвременска колекција, која освен за лицата со попреченост ќе биде наменета и за сите свесни потрошувачи што поддржуваат одржлива мода и еколошки начин на живот. Компанијата планира и едукациска програма за регрутирање млади таленти во текстилната и модната индустрија.
Equality
Брендот ZEN* Трипков го иницира преку „Иквалити“ (Equality), здружение за афирмација на правата на лицата со попреченост чиј основач е тој. Во 2021 година овој проект беше награден со признанието „Социјално претприемаштво“ од Фондот за иновации. Од овие средства бил покриен само дел од проектираниот иницијален буџет од 34.000 евра, а значаен дел од вложените пари се лични средства, од буџети обезбедени од страна на неговата невладина организација и преку активности за здружено финансирање (crowdfunding).
„Во најскоро време предвидувам целосно да го заокружиме тековниот инвестициски циклус, во неколку наврати пролонгиран пред сè поради попопуларниот тренд за инвестирање во стартапи од ‘безбедни и препознаени области’. По завршувањето на оваа фаза и склучувањето стратегиски договор со заинтересираните инвеститори, кои веќе ги има неколку, конечно ќе почнеме со производство и со официјална светска промоција на брендот“, вели Трипков.
Како бренд што претендира да биде препознаен во полето на истражувањето и развојот, неговите проекции се социјалното претпријатие „ЗЕН футурус-Скопје“ да има стабилен годишен раст од 15 отсто во првите пет години, а во наредните пет да влезе меѓу петте најиновативни компании во производството на адаптирана облека и додатоци во светот.
Прототипите на ZEN* веќе беа претставени на повеќе настани и саеми во Европа, меѓу кои „Премиер вижн“ (Premier Vision) во Париз, „Техтекс“ (TechTex) во Франкфурт и „Виена УП“ (ViennaUP) во Виена.
Компанијата го иницираше и проектот ZEN* Soirée за лицата со попреченост од социјално ранливи категории, кои не се финансиски моќни да набават адаптирана облека. Преку донации се обезбедени 3.500 евра, кои ќе бидат наменети за изработка на некомерцијална колекција од сто модни парчиња што ќе им бидат донирани на овие граѓани. Настанот е замислен како модно шоу и е закажан на 25 септември во Музејот на современата уметност во Скопје.
.webp){kind=icon}
