Трендовите на пазарот на јога ќе надминат 65 милијарди долари до 2027 година

Јога, древен индиски метод за саморазвој, посетувале дури 300 милиони луѓе низ светот во 2022 година, а 80 отсто од нив се жени. На глобално ниво, јогата е меѓу првите десет физички активности, според истражувањето на студиото за јога „Анвајнд“ (Unwind), и со текот на времето стана синоним не само за релаксација и општа благосостојба туку и за стил, мода и начин на живот.

Овде не мислиме само на студија со шарени ентериери и детали од кои зрачи атмосферата на Азија, додека секој учесник мирно кажува намасте на крајот од часот во знак на благодарност кон животот, туку и на признавањето на јогата како вредна во ерата на модата и другите трендови.

Глобалниот избор секако е поширок од регионалниот, бидејќи има и поголема побарувачка за јога, при што желбите и барањата на љубителите на оваа дисциплина секојдневно растат. Но во Србија ќе најдете и квалитетна облека и опрема за јога, не само во специјализирани објекти туку и во продавниците за брза мода како „Ојшо“ (OYSHO), „Декатлон“ (Decathlon), „Вомен сикрет“ (Women'secret), „Калцедонија“ (Calzedonia). Нема сомнеж дека и јогата стана моден израз.

Податоците од „Статиста“ покажуваат дека глобалниот пазар за облека за јога ќе вреди 39.910 милиони долари во 2028 година, што е значително зголемување од сегашните 28.925 милиони долари.

Некои други истражувања што се занимаваа со потесната слика, односно Европа, сугерираат дека е забележлив значаен нагорен пат на јогата како бизнис, со годишна стапка на раст од 6,2 отсто помеѓу 2020 и 2024 година, односно од почетокот на пандемијата на ковид-19.

Ако го набљудуваме целокупниот раст на овој пазар (не само модниот агол), тогаш предвидувањата се следни: со раст на онлајн часовите по јога за 25 проценти, придружната опрема, јогата како бизнис, облеката и сѐ друго, овој пазар би можел да достигне вредност од 66,2 милијарди долари до 2027 година, со комбинирана годишна стапка на раст од 9,6 отсто во периодот од 2021 до 2027 година.

Depositphotos

Овие резултати укажуваат на неколку работи:

• Интересот за јогата поради расте потенцијалното чувство на благосостојба што може да се доживее, особено кај милениумците, кои се исто така една од најсилните демографски групи во однос на потрошувачката моќ.
• Се очекува раст во производството на опрема (реквизити) за јога, потоа облека и модни детали, како и потенцијално подобрување во секторот на недвижности (преку издавање комерцијални простори што претрпеа негативни последици од коронавирусот).
• Европска земја што од 2020 година е водечка по бројот на т.н. инфлуенсери за јога е Франција: платформата „Хајпаудитор“ (HipeAuditor) вели дека во таа земја има раст од 230 проценти. Следува Шпанија со раст од 221 отсто, а по неа е Италија со раст од 110 отсто.
• Гледано на глобално ниво, во 2020 година Австралија забележа раст на бројот на инфлуенсери за јога од 127 проценти, а САД од 50 проценти.

Тивок влез на голема врата

Можеби нема да практикувате јога, но тоа не значи дека не сте „дел од неа“. Доколку сакате удобност или комбинирање различни стилови, односно ги следите модните трендови - особено есенските, тогаш веројатно имате барем еден пар „панталони за јога“ во вашата гардероба, за кои мислите дека се класични хеланки.

Дали навистина има разлика меѓу нив? На тоа прашање, експертите веројатно би одговориле: „Уште прашуваш!?“

Имено, стилот „атлежр“ (athleisure) практично експлодира во последните години, а со тоа и асортиманот на производи. Кога зборуваме за долниот дел, тоа се тренерки, хеланки, панталони за јога. Најголемата забуна владее меѓу второто и третото, не само во однос на естетиката туку и на функционалноста.

Панталоните за јога првпат станаа популарни во 2000-тите и обично беа црни или сиви, со проширени долни делови и дебел појас. Повеќето милениумци ги паметат од часовите за вежбање, а потоа некои од модните икони - Кендал Џенер, Лори Харви или Хејли Бибер - им дадоа нов живот; може да се рече дека тие го ребрендираа поимот панталони за јога.

Сега ги среќаваме во најразлични бои и со неколку вида кроеви, имаат различно скроени појаси, а стилистката Александра Ривера вели дека добива многу барања за ова модно парче, пред сѐ поради неговата удобност.

Во споредба со панталоните за јога, хеланките генерално имаат потесен долен појас и се направени од потенок материјал. Тие се „строго“ блиску до телото и беа особено популарни во 1990-тите како облека за вежбање, а дури во 2010 година жените почнаа да ги носат надвор од вежбалница како облека на отворено. Исто така треба да се нагласи дека се исечени директно на краевите, ретко ќе видите класични хеланки како ѕвонарки, кои сега повторно се во тренд.

Иднината на „атлежр“?

Со оглед на популарноста на панталоните за јога, природно се поставува прашањето дали тие со текот на времето ќе ги заменат хеланките во модниот свет, како поудобна и уште попривлечна естетска форма?

Експертите велат: „Веројатно не“.

„Иако се многу популарни, продажбата на обичните хеланки е сè уште силна и тие се најголемата област за раст во ’Ротс’ (Roots)“, посочува Каруна Шајнфелд, раководителка за организацијата на производи во оваа онлајн продавница.

„Жените ги носат насекаде и ги комбинираат со сѐ, па станаа дел од секојдневната гардероба, без разлика дали во студио за вежбање или надвор.