Саудиска Арабија потпиша договор со АТП за нов тениски турнир

Саудиска Арабија го проширува своето влијание во тенисот со финансирање нов врвен машки турнир.

Настанот треба да дебитира на АТП-турнејата веќе во 2028 година, според соопштението што е објавено вчера. Тоа ќе биде 10-от Мастерс 1.000 - попрестижно натпреварување - во распоредот и прв додаден од дури 1990 година.

Новиот турнир го финансира „СУРЈ спортс инвестмент“ (SURJ Sports Investment), саудискиот спортски субјект поддржан од Јавниот инвестициски фонд. „Блумберг“ уште во мај првпат објави за преговорите меѓу СУРЈ и АТП.

Овој нов турнир, рангиран веднаш под четирите гранслем-турнири, пристигнува во предизвикувачки период за професионалниот тенис, при што играчите често зборуваат за физичкиот и менталниот напор предизвикан од бараната должина на сезоната.

„Дискусијата за календарот е чувствителна“, рече претседателот на АТП, Андреа Гауденци, во интервју во четвртокот. Гауденци додаде дека за новиот АТП-турнир поминал низ двегодишен процес на консултации со соодветни совети од играчи.

Со сезона што се протега од јануари до крајот на ноември, професионалниот тенис има еден од најдолгите распореди во спортот. Се очекува предложениот турнир да се одржи на почетокот на годината, избегнувајќи го саудиското лето, а да биде по Отвореното првенство на Австралија, но пред настаните „Саншајн дабл“ (Sunshine Double), односно двојниот турнир во Индијан Велс и Мајами во март.

Усогласување со ВТА

„Постои цел да се обидеме да се усогласиме со настаните на ВТА во февруари“, рече Гаудензи. Тој додаде дека може да има реорганизација на календарот за да се приспособи на предложениот саудиски замав. АТП до крајот на 2027 година ќе објави во која конкретна недела ќе се одржи новиот турнир.

Турнирот ќе трае една недела, во согласност со времетраењето на турнирите Мастерс во Монте Карло и Париз, според лице запознаено со плановите на турнирот. Во 2023 година турнејата започна со проширување на преостанатите турнири Мастерс 1.000 во двонеделен формат.

Во февруари 2024 година ПИФ (PIF) стана официјален партнер за именување на АТП. И женските и машките професионални тениски турнеи долго време имаат значајно присуство на Блискиот Исток, со турнири што се одржуваат во Доха, Дубаи и Абу Даби по Австралија опен.

Во 2023 година Саудиското Кралство започна петгодишен мандат како домаќин на настан познат како „Некст џен АТП фајналс“ (Next Gen ATP Finals), на кој најдобрите играчи до 21 година се натпреваруваат за титула со која завршува сезоната во Џеда, пристаништен град во Саудиска Арабија.

Ријад е домаќин и на „Сикс кингс слем“ (Six Kings Slam), нов настан во егзибициски стил, што започна лани. На овој настан учествуваат шест машки тениски ѕвезди, на кои им се гарантирани 1,5 милион долари за учество, а победникот добива дополнителни 4,5 милиони долари. Иако не е поврзан со АТП, „Сикс кингс слем“ нуди најголем паричен награден фонд во спортот.