Дали убавината без филери и филтри ќе стане нов тренд?

Најавата за рецесија секогаш предизвикува панични анализи на потрошувачките модели. На пример, помалку одење на фризер би можело да влијае на таканаречениот „индикатор за салони за убавина“ - „рецесиската фризура“ (recession hair) веќе стана тренд на Тикток (TikTok). Некои го анализираат „индексот на пиво“ за да видат дали скапите „домашно“ произведени пива на точење се заменуваат со поблаги пива наменети за масовна потрошувачка. Исто така, постои и неконвенционалниот но историски точен „индекс на стриптизети“ (stripper index) - индикатор за тоа кога егзотичните танчари чувствуваат рецесија поради помалку клиенти во клубовите.

Сепак, притисокот за промена на потрошувачките навики во услови на економска криза може да има и посветла страна. Можеби токму овој момент е решение за загриженоста на генерацијата зед (англ. gen Z) во врска со трендот за убавина: козметички инјекции. Тоа е скапа и сè пораспространета навика кај младите луѓе, кои сè уште уживаат во природните придобивки од младешката убавина.

Припадниците на генерацијата зед сè почесто се прашуваат дали вреди да се инвестира во ботокс Depositphotos

Меѓу 2019 и 2022 година бројот на лица на возраст од 18 и 19 години што примале невромодулаторни инјекции (како ботокс) се зголемил за 75 проценти, додека бројот на лица што користеле хијалуронски филери (како Juvéderm Ultra) скокнал за 71 процент, според извештајот од 2022 година на Американското здружение на пластични хирурзи - АСПС (American Society of Plastic Surgeons - ASPS). Тоа драстично зголемување донекаде се стабилизира во извештајот на АСПС за 2023 година - најновите достапни податоци - со промена од девет и осум проценти соодветно на процедурите во споредба со 2022 година. Возрасната група од 20 до 29 години, која исто така вклучува дел од генерацијата зед, покажа слични промени. Самите првични трошоци, но и тие за подоцнежна нега, односно одржувањето на овие процедури, не се воопшто евтини. Според лекарите од АСПС, во 2023 година потрошувачите плаќале во просек 435 долари за невромодулаторни инјекции и 715 долари за хијалуронски филери.

Како генерацијата зед стигна дотука?

Фактот дека тие беа првите што пораснаа во светот на социјалните мрежи и паметните телефони, секако, има влијание. Најстарите членови на оваа генерација се родени само една деценија пред да се појават овие технологии. Додека да тргнат во средно училиште, и социјалните мрежи и паметните телефони станаа секојдневие.

За споредба, како милениумка, се сеќавам дека Фејсбук (Facebook) стана јавно достапен дури во мојата последна година од средно училиште. Објавувавме смешни фотографии без никаква можност за нивно уредување - фотошопот беше резервиран за професионалци, кои поминуваа часови уредувајќи слики од слаби модели за во списанија. Не беше лесно да се биде милениумка што носи поголем конфекциски број на почетокот на 2000-тите - само помислете на искуствата на поп-пејачката и ријалити ѕвезда Џесика Симпсон. Сепак, се чини дека ни беше полесно отколку на генерацијата зед.

Ѕвездата Џесика Симпсон во мемоарите искрено пишува за своите проблеми и срамот што го чувствувала бидејќи по настапот во Далас во 2009 година ја прогласиле за дебела. Таа вели дека тогаш носела американски конфекциски број четири, што е еквивалент на европската конфекциска големина број 36 Depositphotos

Иако движењето за позитивност на телото (англ. body positivity) доби на популарност во културата и медиумите кога таа влезе во тинејџерските години, на социјалните медиуми тоа значително се истакнуваше од алгоритамот, подемот на инфлуенсерите и појавата на апликации како Фејстјун (FaceTune). Можноста за „разубавување“ на фотографиите се префрли од рацете на уредниците, кои обработуваа слики од познати личности и модели, во рацете на секој што има телефон.

Корисниците можеа да ги избришат „маните“ и да ги приспособат цртите на лицето за да одговараат на идеалите за убавина. Така се роди „инстаграм лице“ (англ. Instagram face) - термин измислен во 2019 година од писателката Џиjа Толентино во списанието „Њујоркер“ (The New Yorker), опишувајќи го изгледот како кожа без пори, истакнати јаболчици, мачкини очи, мал нос и полни усни.

Социјалните медиуми не се единствениот виновник за искривената слика за себе на генерацијата зед (и на другите). Предните камери на телефоните, популарноста на самосликот и постојаното огледување во малите прозорци на Зум (Zoom) и сличните видеоплатформи исто така придонесуваат за искривеното доживување на сопственото лице.

Денес „инстаграм лицето“ веќе излезе од дигиталниот свет. Таквото лице може да се види шетајќи по улиците на големите и помалите градови, а често се постигнува преку минимално инвазивни естетски процедури како што се инјекции и филери.

Сè повеќе млади мажи користат ботокс и хијалуронски филери Depositphotos

Дури и ако не дојде до рецесија, како што најавуваат медиумите, царинските давачки би можеле да влијаат на вкупната цена на овие процедури. На пример, шприцевите и иглите потребни за инјекции моментално подлежат на царинска давачка од дури 245 проценти кога се увезуваат од Кина. Тој трошок, логично, би се префрлил на потрошувачите.

Едно нешто што е во корист на помладите луѓе што ги користат овие третмани се порастот и омасовувањето на услугите, односно можноста за одложено плаќање (купи сега, плати подоцна). Компаниите што ја нудат оваа опција станаа омилени меѓу генерацијата зед за неесенцијални трошоци - од концерти до патувања - и лесно може да ја искористат можноста за дополнително промовирање на своите услуги во областа на естетската медицина. Една нова компанија, „Приви“ (PRIVI), е конкретно насочена кон пазарот на естетски инјекции, нудејќи флексибилни планови за отплата за козметички третмани.

Со овие опции за плаќање, дури и рецесијата можеби нема да биде доволна за да го предизвика очекуваниот финансиски притисок и да ги намали дискрециските трошоци. Напротив, одржувањето на изгледот може да се смета за неопходно и вредно за секоја цена - дури и акумулирање на долг, што е реалноста на моделот „купи сега, плати подоцна“.

Ако генерацијата зед ја изгуби финансиската моќ да го промени својот изглед, можеби ќе стане модерно и вирално да се прифати природниот процес на стареење. Со малку среќа, тоа ќе биде повеќе од минлив тренд.

Во моментов нема коментари за веста. Биди прв да коментира...

Остави коментар