Естетска хирургија во Македонија: Луксуз за Македонците, поволност за регионот

Естетската корекција стана неизоставен дел од современото општество, со значителен раст на побарувачката во последната деценија. Додека едни ја гледаат како начин за подобрување на физичкиот изглед и самодовербата, други ја критикуваат како феномен што ги промовира нереалните стандарди за убавина. Во Македонија трендот за естетска хирургија се движи континуирано во нагорна линија, но за разлика од соседните земји, како Србија или Хрватска на пример, помал број граѓани се решителни за таков вид на разубавување. Естетската корекција често се смета за луксуз, бидејќи не е медицински неопходна туку се прави по желба на самиот пациент за подобрување на физичкиот изглед, не подлежи на медицинско осигурување, а трошоците за овие третмани се високи за животниот стандард.

Цените за пластична хирургија се за нијанса пониски од цените во регионот Адрија 

Цените за пластична хирургија варираат од една до друга медицинска установа во земјава. Хируршкото зголемување гради, со пласирање импланти со силиконски гел, е најчестата корекција. Цената за оваа постапка се движи од 2.500 до 6.500 евра. Операцијата за зголемување на задникот во Универзитетската клиника за пластична и реконструктивна хирургија во Скопје чини 1.150 евра, додека во приватните клиники достигнува и до 3.000 евра. Најчеста корекција во земјава е операција на нос, а цената за оваа корекција е пониска од цените во земјите од регионот.

„Во однос на околните држави имаме за нијанса пониски цени. Естетската корекција на нос во Белград е со почетна цена од 2.500 евра и достигнува и до 5.000 евра, а кај нас цената се движи околу 2.000 евра. Морам да истакнам дека во естетската хирургија цената не е пресудниот фактор. Пациентите секогаш сакаат да одберат квалитет, за кој мерило се искуството, успешноста и, секако, минималниот ризик од компликации или успешност во справување со истите тие. Поради тоа пациентите секогаш најмногу ги интересира прикажувањето успешни случаи на претходно и потоа (before & after), многу повеќе отколку цената. Сите сакаат да бидат оперирани од ’најдобриот’, додека ретко кој сака да биде опериран од ’најевтиниот’“, вели за „Блумберг Адрија“ д-р Живорад Коцевски, специјалист по пластична, реконструктивна и естетска хирургија од клиниката „Жан Митрев“.

Приватна архива/Д-р Живорад Коцевски

Расте популарноста на нехируршките интервенции

Ботокси, филери, хемиски пилинг, криолиполиза (замрзнување на масното ткиво) и микронидлинг (стимулирање на природната продукција на колаген) се најчестиот избор на македонските граѓани што сакаат да го подобрат својот изглед без да се подложат на хируршки интервенции.

Цената на ботоксот се движи од 60 до 150 евра, во зависност од потрошените единици. Оваа интервенција најчесто се користи за намалување на брчките, како што се оние на челото, помеѓу веѓите и околу очите. Филерите, во чиј составот има хијалуронска киселина, се користи за пополнување брчки, зголемување на усните, обликување на вратот и за корекција на различни видови нерамнини на лицето. Цената започнува од 50 евра и достигнува до 100 евра. За овие две интервенции не е задолжително да се повторува постапката, но ефектите обично исчезнуваат по девет месеци, па често пациентите се одлучуваат да ја повторат корекцијата.

„Покрај женската популација, сега е трендот кај машката популација да направат ваков вид корекција, не за да бидат како кукли туку да имаат поубаво лице. Кај нас оваа корекција сè уште е луксуз за нашиот стандард, но како нација го следиме трендот што владее во западните земји. Ботоксот дефинитивно е најбарана корекција, а по него следуваат филерите. Во последно време поголема заинтересираност за овој вид естетска корекција имаме од популацијата што има над 40 години. Цените се различни во зависност од козметичкиот салон или здравствената установа“, вели за „Блумберг Адрија“ Весна Стојанова-Атанасовска, докторка по општа медицина.

Depositphotos

Македонија е мала држава, но има голем потенцијал за развој на естетската корекција

Брза адаптација и усогласување на трендовите и новитетите ќе придонесат Македонија да стане препознатлив центар за естетската корекција, сложни се докторите. Иако естетската хирургија повеќето ја гледаат како лесна хируршка гранка, која е профитабилна од економски аспект, сепак станува збор за пациенти.

„Да не заборавиме дека овде, освен домашните пациенти, гравитираат и оние од регионот. Голем број од моите пациенти доаѓаа од околните држави, како Косово и Албанија, но и од други држави, како Германија, Австрија, Англија, Италија, Австралија итн. Притоа можам да се пофалам дека не станува збор само за наши иселеници на работа во странство, туку странски државјани што се свесни за одличниот сооднос на професионалната услуга и цената. Целта е да понудиме најбезбедни третмани за нашите пациенти, со најмал потенцијал за постоперативни компликации“, вели Коцевски.

Турција прв избор за естетска корекција во регионот

Турција се има позиционирано како значајна дестинација за медицински туризам, особено за естетски процедури, што значително придонесува за економијата на земјата. Во 2023 година Турција заработила приближно 2,3 милијарди долари од здравствен туризам, што претставува значителен пораст во споредба со претходната година, кога заработката била 1,9 милијарда долари, според анализата на „Медцентар“ (MedCenterTurkey).

Турција привлекла околу 1,4 милион здравствени туристи во 2023 година. Најбарани естетски корекции во турските болници се затегнување на лицето, зголемување гради и корекција на нос, кои се значително поевтини во Турција отколку во САД или Обединетото Кралство. На пример, корекција на нос, која во САД може да чини околу 5.400 долари, во Турција се изведува за приближно 1.800 долари. Со развојот на трансплантацијата на коса, оваа земја стана лидер број еден во светот за оваа процедура, што реално повлече развој на медицинскиот туризам и Турција денес е препознаена како медицинска дестинација. Покрај трансплантацијата на коса, се случи подем и на другите гранки, како баријатричната хирургија, стоматологијата и естетската хирургија, што потоа резултираше со развој на целокупното здравство, но и на други гранки.

Овој растечки сектор не само што ги зголемува приходите од туризам туку го поттикнува и севкупниот економски раст на земјата, потврдувајќи го успехот на Турција како глобален центар за медицински и естетски туризам.

Во моментов нема коментари за веста. Биди прв да коментира...

Остави коментар