Ги врати во мода „адидас самба“, па сега ќе биде нова дизајнерка на „Хермес“

Во интервју за списанието „Систем“ (System) од 2019 година, Грејс Вејлс Бонер го пофали дизајнерот за машка мода Раф Симонс, нарекувајќи го „многу доследен“, додавајќи дека е „навистина убаво да се види тоа во денешно време“.

Квалитетот што Вејлс Бонер го цени исто така е високо вреднуван во „Хермес“ (Hermès), француската луксузна куќа со традиција од 188 години, позната по својот строг и прецизен пристап. Минатиот недела „Хермес“ ја именува Вејлс Бонер за нова креативна директорка на машката конфекциска колекција, со што стана единствената црна жена што води дизајн во некоја голема европска луксузна куќа.

Ова именување му носи на „Хермес“ 35-годишна дизајнерка позната по уникатната комбинација на врвна кројачка вештина, широко културолошко истражување и голем број награди.

„Со Вејлс Бонер, ‘Хермес’ добива креативен талент што знае да ги комбинира највисоките стандарди на западниот луксуз – вклучувајќи најпрецизна внимателност кон занаетот и квалитетот – со различни културни влијанија, било од Африка, Индија или Карибите“, вели Серџ Карејра, професор по мода и луксуз на „Сајнсес По“ (Sciences Po) во Париз. „Таа има идеја за убавината што е исклучително современа и уникатна, со нагласена внимателност кон деталите.“

Вејлс Бонер ја наследува Вероник Нишани (71), која оваа функција ја извршуваше 37 години и која ќе ја претстави својата последна машка колекција во јануари, соопшти „Хермес“. Именувањето на Вејлс Бонер е дел од поширокиот бран на промени на креативни таленти во најголемите светски луксузни куќи. Само во последната година нови дизајнери дојдоа во „Селин“ (Celine), „Кристијан Диор котур“ (Christian Dior Couture), „Шанел“ (Chanel), „Гучи“ (Gucci), „Лов“ (Loewe), „Баленсијага“ (Balenciaga), „Ботега Венета“ (Bottega Veneta) и „Фенди“ (Fendi), што често доаѓа со генерациски промени.

За „Хермес“, именувањето на Вејлс Бонер е донекаде исклучок. За разлика од другите модни брендови, кои често ангажираат познати дизајнери, „Хермес“ традиционално негува силна уметничка култура одвнатре, со многу малку креативни директори чии репутации го надминуваат самиот бренд.

„Нејзиниот пристап кон современата мода, занаетот и културата ќе придонесе за обликување на стилот на машката мода на ‘Хермес’“, изјави Пјер-Алекси Дима, наследник на семејството „Хермес“ одговорен за уметничкиот правец на брендот.

Вејлс Бонер, родена во Лондон од мајка Англичанка и татко од Јамајка, е основачка на истоимен бренд и една од клучните фигури зад успехот на ретропатиките „адидас самба“. Нејзиниот подем на глобалната модна сцена беше метеорски.

Веднаш по дипломирањето во 2014 година на престижниот лондонски ЦСМ (Central Saint Martins), ја започнала својата машка линија „Вејлс Бонер“ (Wales Bonner), брзо привлекувајќи признанија за својот труд.

Грејс Вејлс Бонер е една од главните креативни сили зад огромниот успех на ретропатиките „адидас самба“  Bloomberg

Таа освоила награда за надежна дизајнерка во машката мода (Emerging Menswear Designer) на БФА (British Fashion Awards) во 2015 година, потоа награда на ЛВМХ (LVMH Young Designer Prize) во 2016-та, а во 2019 година и од угледниот „Вог“ (British Fashion Council/Vogue Designer Fashion Fund). Истата година ја курирала изложбата во лондонската галерија „Серпентин“ (Serpentine Gallery), која истражува ритуали и религиски практики на афрокарипските култури. Таа дизајнирала и облека за возачот на Формула 1 Луис Хамилтон, која ја носел на „Мет гала“ (Met Gala).

Нејзината линија, како што е наведено на официјалната страница на брендот, „претставува уникатна идеја за културен луксуз што го комбинира европското наследство со афроатлантскиот дух“, со акцент на „духовита кројачка уметност“.

Во јануари 2020 година ја претставила колекцијата со „Адидас“ (Adidas) на Модната недела во Лондон (London Fashion Week), истражувајќи ги „супкултурите на 1970-тите години од перспектива на карипската младина во Лондон“. Таа воведе нови живописни стилови и посебно редизајнирани црни патики „самба“ со продолжен јазик. Тие првично се продаваа за околу 180 долари, а денес на платформата „Сток екс“ (StockX) достигнуваат цена од 1.176 долари.

Популарноста на патиките „самба“ од почетокот на 2023 година продолжува да расте, благодарение на новите верзии со животински принтови и метален сјај дизајнирани од неа.

„Таа е моментално најпопуларната дизајнерка во луксузната индустрија“, изјави лани извршниот директор на „Адидас“, Бјорн Гулден. „Сите сакаат да соработуваат со неа, а нејзината верност кон нас е исклучителна.“

Сè уште не е познато што ќе се случи со нејзината соработка со „Адидас“, ниту дали ќе продолжи со својот бренд откако ќе ја преземе функцијата во „Хермес“. Првата ревија за „Хермес“ ќе се одржи во јануари 2027 година. Колекцијата што традиционално се прикажува во јуни, за време на Париската недела на машка мода, дотогаш ќе биде надгледувана од креативното студио на брендот.

Вејлс Бонер нема да биде единствената дизајнерка во „Хермес“ - женската линија веќе над 10 години ја води Надеж Ванхе. Иако најголемиот сегмент на „Хермес“ и понатаму е производството на кожени производи и седларство, одделот за конфекциска мода во последните години постигнува неочекуван успех.