Пет пицерии од регионот се најдоа на листата на најдобри европски пицерии што секоја година ја објавува порталот „50 Топ пица“ (50 Top Pizza). Највисокото место во регионот го зазеде една хрватска пицерија, но на листата се најдоа и една македонска, една словенечка и две српски пицерии. Италија секако е исклучена од листата.
Хрватска
Најдобрата пица во регионот, според овој портал, може да се проба во Загреб, во „Франко пица и бар“ (Franko's Pizza i Bar“), пицерија што се најде на високото 14-то место, што е голем скок бидејќи лани беше на 43-то место.
„Во последниве години Загреб стана град во кој квалитетната пица има улога во гастрономската сцена на земјата, секако благодарение на ’Франко пица’ и нејзините висококвалитетни производи. Филовите се движат од традиционални до поимагинативни, а свинското калцоне навистина нè импресионира. Исто така нè импресионира и класичната маргарита, бидејќи само затоа што рецептот е едноставен не значи дека е и лесен, а овде е направен совршено. Цените се просечни за градот, но квалитетот е супериорен. Ова е суштинска станица за љубителите на пица што се во Загреб или минуваат низ него“, наведуваат тие.
Инаку, оваа пицерија беше истакната како пица со најдобар перформанс во 2024 година и ѝ беше доделена наградата „робо“ (Robo Award).
Македонија
Следната пицерија на листата е во Скопје. „Мато наполетано“ од Скопје годинава е 16-ти на листата, а лани беше на 25-то место.
„Уживајте во автентичната италијанска кујна во менито, кое вклучува оброци од појадок до вечера, вклучувајќи и аперитиви, ручек и закуски, сето тоа во прекрасен амбиент. Тоа е суштината на ресторанот и пицерија „ Мато наполетано“ (Matto Napoletano), кое, нешто повеќе од две години од неговото отворање, претставува врвно место за уживање во италијанската кулинарска традиција. Пицата е во современ неаполски стил: мека, со изразена кора, прелеана со најфините состојки од италијанската кујна, вклучувајќи пршута, салама, млечни производи и сирења, кои се меѓу омилените производи. Овие вкусови исто така одат добро со нашите најпознати коктели или стануваат вкусно дополнување за солени кроасани. Листата на вина е забележлива и добро организирана, фокусирана на брендови од цела Италија. Персоналот се движи со прецизност и умешност помеѓу елегантно лежерниот ентериер и терасата“.
„Навистина ретка успешна приказна, која континуирано ја збогатува домашната кулинарска понуда и ја промовира нашата земја на меѓународен план“, коментираат од пицеријата.
Оваа пицерија се издвојува и по изборот на пиво, со наградата „перони настро азуро“ (Peroni Nastro Azzurro).
Словенија
„Поп пица“ (Pop's Pizza) во Љубљана годинава е на 30-то место, додека лани беше на 40-то.
„Ние се наоѓаме во Љубљана, точно во срцето на пешачкиот остров. Декорот е доста раскошен, одговара на просторот на два ката, со голем лустер што доминира во просторијата и прекрасен добро снабден бар. Пицата е во неаполски стил , исклучително добро направено, како по вкусот на долго ферментираното тесто направено од природен квасец, така и по прецизното печење во прекрасна печка на дрва украсена со златни тули.
Состојките се исто така одлични и автентично италијански. Пицата пенелопе со врвна варена шунка од Фриули мора да се проба. Меѓу деликатесите, вреди да се проба баскискиот чизкејк. Менито за пијалаци е обемно, со значителен избор на фино виски и добро приготвени коктели. Цените се просечни за градот, но квалитетот е супериорен, со исклучително пријателска услуга“.
Грег Јуркович, соосновачот на „Поп пица“, вели дека ваквите награди придонесуваат за меѓународна видливост. Минатата година, кога се најдоа на 40-то место на листата, забележаа раст на посетителите меѓу 10 и 15 проценти, а се смета дека скокот се должи на голем број фактори, вклучувајќи ги импресиите од гостите, присуството во медиумите и на социјалните мрежи и соработката со спонзори.
Грег Јуркович/Поп пица
„Не се оценува само пицата туку и целата атмосфера, услуга, амбиент, список со вино, коктели... Испраќаат и тајни инспектори, слично на ’Мишелин’“, вели тој.
Тој додава дека оние што првпат ќе ја посетат љубљанската „Поп пица“ треба да пробаат маргарита, бидејќи тоа е вистинскиот начин да се запознае пицерија. „Ако не е добра маргаритата, не е добра пицеријата. По тоа, пробајте го остатокот“, додава Јуркович.
Србија
„Пиетра“
„Пиетра“ (Pietra) за првпат ја престигна белградската пицерија „Мајсторот и Маргарита“ (Majstor i Margarita) и со тоа стана најдобрата српска пицерија. Годинава го зазеде 32-то место на листата на најдобри европски пицерии.
„Доколку сакате да го откриете вкусот на неаполската пица, направена според класичните правила потврдени со официјалните упатства, ова е местото за вас. Преливот, автентично италијански, се истакнува и му дава одличен вкус и задоволство на вешто направеното тесто. Елегантното, но неформално опкружување, кое вклучува затворени простории и простор надвор, е дизајнирано да ги подобри различните моменти од денот, а изборот е погоден за секоја возраст и пригода. Местото изгледа како некое каде што би направиле пауза за да пиете еспресо , капучино, коктел или чаша добро вино, секогаш дочекани со професионализам, енергија и топла, секогаш присутна насмевка“.
„Мајсторот и Маргарита“ (Majstor i Margarita)
Пицеријата „Мајсторот и Маргарита“ помина малку полошо отколку во 2003 година, кога беше 33-та на листата – сега е на 37-то место, кое го дели со берлинската пицерија „Фјучр наполитан пица“.
„Прекрасниот и внимателен избор на италијански состојки го зголемува трудот за тестото и прецизното печење, заедно со доброто маслиново масло, што го потврдува квалитетот на пицата од година на година. Пицата пристигнува на трпезата убава, мирислива, богата и примамлива и се јаде со големо задоволство.
Доматите што се користат во сосовите, свежи и сушени, се многу интересни. Светлото дрво и мебелот со чисти линии ја прават трпезаријата пријатна; пријатен е и просторот за седење на отворено.
Повикувањето на насловот на романот на Булгаков ’Мајсторот и Маргарита’ му додава литературна привлечност на објектот“.
Топ 10
Првото место го зазеде лондонската пицерија „Наполи он роуд“ (Napoli On The Road), каде што можете да пробате неаполска пица со современ пресврт. Потоа следуваат „Сарториа Пантиери“ (Sartoria Panatieri) во Барселона и „Виа Толедо енопицериа“ (Via Toledo Enopizzeria) во Виена. Во првите десет завршија дури четири шпански и две лондонски пицерии.
Некои други пицерии од регионот, кои не завршија во топ 50, беа оценети како одлични. Покрај гореспоменатите, тоа се „Баста“ во Хрватска (Загреб) и „Вераче“ во Словенија (Нова Горица).
Во септември на победниците на светската листа на најдобри пицерии ќе им бидат доделени награди во Неапол.
.webp){kind=icon}
Во моментов нема коментари за веста. Биди прв да коментира...