За успех во работата, усогласете ја позицијата со вашата личност

Некои работни места привлекуваат луѓе со одредени карактерстики. Менаџерите имаат тенденција да бидат спонтани, внимателни за детали и со почит кон авторитетите, слично како и фитнес инструкторите, стјуардесите и козметичарите. Индустриските дизајнери, креативните директори и извршните продуценти имаат тенденција да бидат одлични слушатели, со способност да ги разберат потребите и чувствата на другите.

Всушност, карактерот е во толку цврста корелација со работните места што може да влијае на изборот на работа многу повеќе отколку вештините, искуството или способноста, тврдат група истражувачи со седиште во Австралија. Тимот кој ги објави тие наоди во 2019 година сега се врати со уште едно откритие: усогласувањето на професијата со вашата личност води до среќа и исполнителност.

Ова е голема промена во размислувањето во однос на патот до успехот во кариерата. Иако оние кои се во „лов“ на највисоките деловни позиции добро ја знаат улогата на карактерот за остварување на нивните амбиции, остатокот од индустријата е пофокусиран на работните вештини и искуството, со посебен акцент на образованието, обуката и претходните занимања. 

„Ова отвора јасен пат за работниот ангажман низ призма на личноста, што е сосема нова перспектива за разбирање на економијата на пазарот на трудот“, вели Пол Мекарти, професор по компјутерски науки на Универзитетот во Нов Јужен Велс и главен автор на студијата.

„Само 11 отсто од работниците се на работни места кои совршено се вклопуваат со нивната личност; околу 25 отсто се на работни места кои 'не се многу лоши за нивниот карактер'“, вели Мекарти. Тоа остава 64 отсто од работната сила на помалку од идеална, па дури и многу лошо усогласена работа. „Во основа, половина од луѓето во западниот свет веројатно се на погрешна работна позиција“, објаснува професорот. Можеби не случајно, една неодамнешна анкета на „Галуп“ (Gallup) покажа дека 50 отсто од работниците се во фаза на „тивки откази“.

Прочитајте повеќе: Трендот на 'тивки откази' ги испаничи директорите

Истражувањето на Мекарти сугерира дека тивките откази можеби се само механизам кој го користат работниците за да се справат со нивото на стрес и исцрпеност што го предизвикува работната позиција врз нивната личност. Тој ги нарекува овие работници „заспани на воланот“, што не е одлично, но не е и толку проблематично колку 12 отсто од работниците кои се деструктивни на нивните позиции. „Тие се толку несоодветни што дури се и контрапродуктивни“, вели Мекарти, кој додава дека во таа категорија има „многу простор за подобрување“.

Во првичната студија, истражувачите подредиле 128.000 корисници на „Твитер“ на 3.500 работни места, користејќи софтвер за да ги анализираат личностите на корисниците врз основа на нивните објави на социјалната мрежа. За најновата анализа, тие презеле различна група од речиси 100.000 корисници на „Твитер“ во Австралија, венесувајќи ги нивните објави во софтвер кој напишаното го подредува во соодветни показатели за среќа и благосостојба. Тие, исто така, ги категоризирале луѓето според главните пет особини на личноста - согласност, совесност, екстровертност, невротичност и отвореност - користејќи информации од нивните профили.

Овој пат тие додале 25 дополнителни одредници за да дојдат до многу попрецизна слика за личноста. (Ако ви е сомнителна ефикасноста на софтверот за предвидување на личноста, можеби е добро да знаете дека истиот се покажал прецизен исто како и сопружниците во опишувањето на карактерот на нивните партнети, а бил многу попрецизен од впечатоците на пријателите и соработниците.) Потоа истражувачите ги вкрстиле сите овие податоци со работните места на испитаниците, создавајќи осум кластери на занимања кои привлекуваат луѓе со слични карактерни црти. На пример, уметниците, писателите, фотографите, дизајнерите и критичарите споделуваат особини на личноста кои вклучуваат отпор кон авторитет, високо ниво на имагинација и почит кон уметноста. Комичарите, графичарите, фризерите, гробарите и актерите се сочувствителни и со повисоко ниво на емотивна свест така што може да ги разберат трендовите, но и причините за одредено однесување и мотивите кај другите.

Анализата покажала дека луѓето чии личности силно се поврзани со нивните работни позиции покажуваат многу повисоки нивоа на исполнителност и повисоки нивоа на среќа. „Ова само покажува дека луѓето тежнеат кон одредени професии, не случајно, туку затоа што постојат биолошки предиспозиции кои ги тераат кон занимање каде што добро се вклопуваат“, вели биолошкиот антрополог Хелен Фишер, научна соработничка на Универзитетот Рутгерс, која пишува книга за невронауката и бизнисот, но не била вклучена во студијата. „Ова се многу корисни податоци кои можат да се употребат не само при регрутирање на работна сила и ублажување на исцрпеноста кај работниците, туку и за разбирање на соработниците и другите луѓе“, додава таа.

Мекарти првично пробил пат за ова истражување со анализа на истакнати развивачи на софтвер и тенисери; тој бил вчудовиден кога открил дека скоро сите членови на групите имаат слични карактеристики. Сепак, ова не значи дека луѓето чии личности се сериозно неусогласени со нивните работни позиции се осудени на пропаст. Светол пример за ова тврдење се појави на УС Опен. Тенисерите се типично екстровертни и со високо ниво на согласност, што ги прави способни да работат интензивно со тренерите, да ги апсорбираат нивните критики и соодветно да го модифицираат сопственото однесување. Тие се исто така многу совесни, што значи дека ќе вежбаат додека не ја доведат техниката до совршенство, но не се премногу отворени за нови искуства, што би значело дека се во ред со тоа да ја практикуваат истата техника 15 години.

Но, одеднаш се појави Ник Кириос. Тој не е тип што лесно се согласува со некого. Тој нема тренер. Исто така е нестабилен, познат по неговите испади. По неговиот загубен меч, тој уништи два тениски рекета удирајќи ги од земја. Ова беше откако извикуваше непристојни зборови за време на претходната победа на истиот турнир (УС Опен), што му донесе казна од 4.000 долари. Сепак, тој е рангиран на 20. место во светот. На мапата на карактерните особини на тенисерите, Кириос е точка далеку од останатите. Што значи дека неусогласеноста на личноста води до чести избувнувња и недоразбирања, што резултира со фрустрација за сите вклучени.

Што се однесува до канцелариските работници, еве неколку прашања што треба да се разгледаат: Дали сте на вистинската работа за вашата личност? Во кои други полиња би можеле да се префрлите? Засега, ќе треба да се задоволите со поглед на осумте кластери за кариера што истражувачите ги креираа за да помогнат во разјаснувањето на овие дилеми. Подоцна во текот на годината, тие ќе се здружат со Bloomberg News и ќе објават интерактивен квиз: „Работата за која не сте знаеле дека сте совршени“, кој ќе ви даде многу попрецизни одговори.