.webp){kind=icon}
Барбара Милисент Робертс е целото име на Барби. Според достапните податоци, родена е на 9 март 1959 година во (фиктивниот град) Вилиож во Висконсин, САД. Партнерот Кен го запознала во 1961 година. Нејзина омилена боја е барби-розова (Barbie Pink - PMS 219). Барби има променето над 200 кариери: астронаутка, пилотка, пожарникарка, новинарка и претприемачка. Патувала во вселената во 1965 година, четири години пред човекот да стапне на Месечината. Во 1973 година спасила многу човечки животи како хирург, во време кога мал број жени биле дел од операционите сали. Сепак, во тие години, и покрај неверојатните придонеси за човештвото, феминистките не ја сакаа поради нереалните идеи за изгледот на телото, поддржувањето на родовите стереотипи и форсирањето на стандардната убавина што ја негира различноста. Во актуелниот филм на Грета Гирвиг, посветен на нејзиниот живот, интригата за влијанието што може да се создаде станува сè поголема.
Дали е таа само парадигма на одреден стил, симбол на значајни друштвени промени или полигон за остварување огромни заработки?
Малку е познато дека зад нејзиниот глобален успех стојат Рут Хендлер и нејзиниот сопруг Елиот, кои во 1945 година ја основале компанијата за играчки „Мател“ (Mattel), во работилница во гаража на југот на Калифорнија. Рут ја креирала кулата Барби по својата ќерка, која ја лансирала во 1959 година. Во интервју за Би-би-си (BBC) пет години пред нејзината смрт во 2002 година, изјавила дека претставувањето на нејзиниот изум наишло на поделени мислења. „Мажите сметаа дека жените не би требало да купуваат кукла со женско тело, со гради, тесен струк и тенки глуждови, кукла што изгледа како возрасна личност. Тие мислеа дека нивните сопруги не би сакале да ги купуваат куклите и, на крајот, дека тоа не е прикладно за деца, но згрешија. Жените веднаш се заљубија во куклата. Куклите не беа ни наредени на полиците, а веќе беа распродадени!“ Рут била пионерка во маркетинг-играчките и ја разбирала важноста на постојаните иновации, со додавање нови производи, што го отворило патот по кој „Мател“ оди до денес. Но нејзиното влијание не било ограничено само на светот на играчките. Кога во 1970 година ѝ бил дијагностициран канцер на дојка, по мастектомијата, се соочила со предизвик за пронаоѓање квалитетни протези за реконструкција. Таа ја основала „Рутхтон“ (Ruthton Corp), компанија што произведувала протези за реконструкција на дојка под името „Нирли ми“ (Nearly Me)“. Посветеноста, визионерството и храброста на Рут биле инспирација за жените низ светот да сонуваат големи соништа и да ги остварат своите цели, исто како куклата Барби, која не е само играчка туку е симбол што засекогаш го промени начинот на кој жените гледаат на себе и своите способности. Низ различните кариери што ги претставува Барби, од докторка до астронаутка, од адвокатка до претседателка, инспирирала многу девојчиња да веруваат дека можат да бидат она што ќе посакаат. Изгледот и модните патувања на Барби еволуираа, следејќи ги светските културолошки промени.
Прочитај повеќе
„Барби“ и „Опенхајмер“ како најпопуларна двојка за ова лето
„Барбенхајмер“ не е само мемe.
12.07.2023
Холивудските актери и сценаристи започнаа со заеднички штрајк
Штрајковите на актерите и сценаристите ќе ја запрат американската филмска и ТВ продукција, со исклучок на реалити програмите без сценарио
14.07.2023
Bloomberg Mercury
Барби ја играше клучната улога во промовирањето на различностите и инклузивноста, како и прифаќањето на идентитетот. Денес има кукли Барби во девет различни телесни типови и 35 бои на кожата, а пред извесен период се претставени и трансродова и Барби со Даунов синдром. Нејзините различни изданија се порака дека убавината доаѓа во различни облици, бои и полови. „Постои нешто искрено и носталгично во Барби, а феминистичкото влијание се чини дека е релевантно за денешната публика. На Кен, кој е претставник на застарени родови норми, во филмот му е доделена донекаде споредна улога, што драстично ја менува вообичаената холивудска динамика“, известува Андреа Фелстелд за „Блумберг опинион“ (Bloomberg Opinion). Дополнителен факт е дека многу од комбинациите на Барби и Кен се навраќаат во 1980-тите и 1990-тите години, што во емотивна смисла потсетува на носталгија. „Лудилото предизвикано од филмот ги натера потрошувачите повторно да ја откријат својата љубов кон светлите бои, како и кон дезените што костимографката Жаклин Дуран ги одбрала за облека на Барби во филмот“.
Какви се реакциите од модната јавност?
„Барбикор“ (Barbiecore) стана вирален моден феномен уште во моментите кога Маргот Роби се појави во тизер-кампањата за филмот за омилената кукла од детството, носејќи впечатлива креација во розова боја. Сега хаштагот Барбикор бележи повеќе од 500 милиони прегледи на Тикток, засенувајќи го својот долгогодишен моден ривал „Квает лакшри“ (Quiet luxury). Да потсетиме, тоа е тренд што се залага за суптилна елеганција, без истакнати брендови и светли бои, а служи како бренд за членовите на моќен и софистициран клуб, што дополнително ја зголемува популарноста на серијата „Сукцесија“ (Succession), која го отсликува начинот на живот на богатите и моќните. Модната лудост на Барби, позната и како „допамин“, не е нов тренд и е поврзана со теории што го нагласуваат влијанието на светлите бои врз нашето расположение и лачењето на хормоните на среќата. Со годинашната колекција на Диор инспирирана од живописните бои на Индија и хит-бојата на сезоната од работилницата на „Пантон“ (Pantone), наречена вива магента (Viva Magenta), беше јасно дека многу брендови ќе го искористат овој бран и ќе го истакнат „Барбикор“. Сведоци сме и дека многу познати личности храбро го прифатија трендот на црвениот тепих.
Колкаво ќе биде влијанието на „Барбикор“, колку ќе трае и дали овој тренд е временски ограничен? Сопственичката на луксузниот бренд „Лавишли апоинтед“ (Lavishly Appointed), Мери Раденковиќ од Лондон, смета дека моменталната доминација на трендот на допамин е одраз на потребата преку модата во форма на уметност да се изрази несогласувањето со стереотипите и ограничувањата. „Познато е дека кралицата Елизабета за јавни настапи избираше креации во смели бои на виножитото. ’Никогаш не можам да носам беж, бидејќи тогаш никој нема да знае која сум’ е нејзината легендарна изјава. Секогаш беше елегантна во розова, портокалова, фисташка неонскозелена и светлосина боја. И навистина, таа можеше да го разубави дождливиот ден и беше олицетворение на беспрекорна елеганција и стил. Многумина велат дека бојата е тесно поврзана со кодексот на облекување и се смета дека само класичните смирени нијанси носат порака дека вредиме, дека сме сериозни и не сме подлегнале на ’трендот’. Не сметам дека тегет, сива и беж нијанса не се инспиративни бои, но модата е вид уметност, која би требало да биде надвор од правилата на поставените норми. Боите се еден од начините личноста да го изрази својот идентитет. За некои луѓе носењето светли бои може да биде начин да се истакнат во групата, да покажат храброст и самодоверба, со што се ослободуваат од нормите што се наметнуваат за воздржување и неутралност во облекувањето. На тоа гледам како на позитивен сигнал дека луѓето сакаат да излезат од монотонијата на црното и намалувањето на неутралните нијанси - тренд што ги ’обои’ нашите денови за време на пандемијата. Во оваа смисла допаминскиот ефект на светлите бои е повеќе од минлив тренд“, заклучува Раденковиќ.
Bloomberg Mercury
Што покажуваат бројките?
За модните брендови: Можете да купите облека и додатоци за Барби во продавници како „Гап“(Gap Inc) и „Примарк“ (Primark), малопродажен синџир со седиште во САД, во сопственост на „Асошиејтед бритиш фудс“ (Associated British Foods Plc ). Може да најдете и козметика „Барби“ под брендот NYX, кој е во сопственост на „Лореал“ (L'Oreal SA). Има и палта за кучиња од Барби, килими и ролери. Колекција на обувки „Алдо“(Aldo Group Inc.) во моментов е најбараната колекција во соработка со Барби, според „Луст“ (Lyst), пренесува „Фелстед“ (Felstead).
За производителот на Барби, „Мател“, филмот е од големо значење пред сè за продажбата на куклата Барби и нејзините придружни додатоци. „Побарувачката за играчки порасна за време на пандемијата, но како што се олеснија забраните и се интензивираа инфлацијата и економската криза, индустријата забави. Сепак, успехот на филмот има пошироко значење. ’Мател’ соработува со повеќе од 100 компании“, велат од „Фелстед“ за „Блумберг опинион“.
Барбиманијата е широкораспространета и во други бизниси. „202 кичен“(202 Kitchen) во Манчестер е објект што изгледа како сет од споменатиот филм: со соба за фотографии, кутија за кукли Барби и куќа од соништата. „Вистинските домаќинки на Чешир“ (Real Housewives of Cheshire) веќе снимаа таму, а познатите личности побрзаа да резервираат маса за своите прослави. „Ворлд оф Барби“ (The World of Barbie) во Санта Моника, Калифорнија, наплаќа 34 долари за да се нурнете во светот на Барби, каде што може да се видат од реплики на нејзината вила од соништата и камп, изградени во природна големина, па до стилисти што прават фризури на Барби по желба. Толку чини и влезот во кафулињата „Малибу Барби“ (Malibu Barbie) во Њујорк и Чикаго, релаксиран ресторан што покрај специјалното мени за Барби нуди ексклузивен асортиман на сувенири и различни интерактивни моменти за обожавателите. Како дел од маркетинг-стратегијата за промоција на филмот, во Малибу беше создадена вистинска куќа за Барби, која може да се изнајмува на Ербиенби (Airbnb). И додека Барби е на пат, гостите ги пречекува Кен.
Bloomberg Mercury
