Кортни Кардашијан изјави дека се откажала од кофеинот, вежбањето, алкохолот, шеќерот и сексот за време на детоксикацијата со ајурведата панчакарма, која своевремено ја спроведувала со сопругот Тревис Баркер со намера да ги подобри шансите за вештачко оплодување. Од друга страна, компанијата на Гвинет Палтроу, „Гуп“ (Goop), промовираше ајурведски спа-центар во Санта Моника. Ова се само два од многу примери на познати личности што ја прифатиле ајурведата како составен дел од одржувањето на физичката и менталната благосостојба.
Ајурведата, која има свои корени во хинду текстовите и се преведува како „наука за животот“, има долга историја, од илјадници години, што ја прави една од најстарите форми на алтернативната медицина. Приврзаниците се фокусираат на балансиран начин на живот, усогласување на енергијата, превенција од болести и хербални додатоци.
Денес терминот ајурведа вклучува сложени, а понекогаш и контрадикторни практики: домашни препарати, но и многу комерцијални производи; холистички промени во животниот стил и, од друга страна, брзи решенија во вид на додатоци во исхраната. Во регионот Адрија исто така многу луѓе во последно време зборуваат за растението ашваганда, тврдејќи дека тоа им помага да ја намалат анксиозноста и да имаат пријатен сон. Аптеките се тркаат да обезбедат билен екстракт од ашваганда во форма на масло, капсули или прав, а цената во српските аптеки за едно пакување се движи до 3.000 динари.
Во Индија тоа е сериозен бизнис. На пример, Клиниката за ајурведа во Керала била домаќин на многу познати личности од А-листата, вклучувајќи ги и членовите на британското кралско семејство, но и Наоми Кембел, Силвестер Сталоне, се наведува на официјалната веб-страница на клиниката. Кралицата Камила наводно успешно го решила проблемот со синусите со помош на ајурведски третман. Престојот во клиниката ја чинел 5.500 долари дневно.
„Во следните пет години се проценува дека индискиот пазар на ајурведски производи ќе надмине 20 милијарди долари, што е трипати повеќе од 2022 година“, известува Ени Маса за „Блумберг“. За споредба, на глобално ниво, велнес-индустријата вреди повеќе од пет трилиони долари. Ајурведата има сличности со традиционалната кинеска медицина, која често ги гледа болестите како манифестација на нарушена внатрешна рамнотежа на пациентот. Иако ајурведата го зема и го прокламира овој холистички пристап, критичарите и лекарите долго време тврдат дека на многу препарати им недостигаат ригорозни и силни клинички докази за потврда на нивната безбедност и ефикасност. Во западните земји, на пример, ниту еден ајурведски производ не е одобрен од страна на ФДА (FDA - од англиски: Food and drug administration agency) за превенција, третман, дијагноза или лекување на која било болест, а истата позиција ја држи и ЕМА (кратенка од: European medicine agency) за земјите од ЕУ. А во Индија, освен бизнисите што ги промовираат познатите јоги како Баба Рамдев и Садгуру, прашањето за регулација, пласирање и рекламирање на такви производи, покрај своевидна „војна“ на социјалните мрежи, стана и столб на политичкиот дискурс на критичарите на владата на премиерот Нарендра Моди. Дознајте повеќе во видеото.
.webp){kind=icon}