Македонски стартапи освојуваат инвеститори со апликации за попусти и за разубавување

Два македонски стартапа преку својата дејност се трудат да им го олеснат секојдневието на граѓаните. Тие се развиваат брзо, а преку нивните онлајн услуги сега постои можност да заштедите не само време туку и пари.

Зошто си дал толку пари кога истиот производ во другиот маркет е на акција? Кога цените постојано растат, а секој денар е важен, веројатно често се соочувате со ваква реакција од најблиските. Живееме динамично, па не стигнуваме да ги прелистаме промотивните летоци на маркетите. Очигледно, на жените им е уште потешко кога освен за пазарење, во текот на денот треба да одвојат време и за своите ритуали во салоните за убавина. 

Ѓорѓи Филиповски вложил приближно 50.000 евра во апликацијата „Бадијала“, која на едно место и во реално време ги прикажува сите акции и попусти на производи во поголемите македонски маркети и дрогерии. Црпејќи идеја од лични искуства и набљудувања, тој препознал можност да развие решение што може да направи значајна разлика.

„Можеби не знам што ќе се случи во наредните десет години, но знам што нема да се случи, а тоа е дека луѓето нема да престанат да бараат и да купуваат производи на попуст, промоција или акција“, вели Филиповски за „Блумберг Адрија“.

Апликацијата со која, според него, може и сериозно да се заштеди, содржи корисни филтри според потребите и желбите на корисниците. Освен што купувачите можат да одберат маркет, категории на производи и денови во неделата со промоции, постои опција да додадат конкретен производ во листа на омилени, па кога истиот тој повторно ќе биде на промоција секогаш да добиваат известување.

„Од нашето иницијално лансирање на 21 септември 2023 година, собравме над 15.000 преземања, а половина од нив се регистрирани клиенти за помалку од седум месеци. Нашите корисници се задржуваат на апликацијата во просек 4 минути и 29 секунди по сесија. Овој број на преземања нѐ позиционира на врвот на листата на топ бесплатни апликации во Македонија во категоријата ’Лајфстајл’, истовремено и на ’Ап стор’ (App Store) и на ’Гугл плејстор’ (Google Play store). Тоа никогаш не се случило во нашата земја и доволно зборува за нашето влијание и за релевантноста“, вели тој.

Компанијата има големи планови за развој и е во потрага по разни фондови, бизнис-ангели и акцелератори. Купувачите во иднина може да очекуваат нови додадени вредности при користењето, како што се ексклузивни зделки, картички за лојалност и награди за честа употреба на апликацијата. За трговците, пак, се планираат подобрени промотивни алатки како можност за целно рекламирање, кое ќе им помогне поефикасно да стигнат до целната публика.

„Дополнително, ќе развиеме нов сегмент во дигиталниот свет досега непознат кај нас, а тоа е ’афилиејт’ (од англиски: affiliate - додавање луѓе или личности кон матичната компанија), програма што ќе ја зголеми нашата стабилност“, завршува Филиповски.

Ефективни практики за подобра организираност нуди и онлајн платформата Common.mk. На овој сајт граѓаните може да се информираат за сите поволности и попусти што ги нудат македонските салони за убавина пред да си резервираат термин. Клиентите имаат можност да ја оценат услугата и да остават коментар или рецензија, но софтверот им го овозможува тоа само на оние што ќе ја реализираат онлајн резервацијата. Овде корисниците веќе можат да собираат поени за лојалност, со кои се добива дополнителен попуст по одреден број третмани во поединечен салон.

Руски педикир, трајна шминка на уста, масажа со чоколаден пилинг, јапонско исцртување веѓи и фризура и шминка за табло се дел од услугите што се нудат во моментов. Славчо Темелковски, кој е соосновач на платформата, вели дека на корисниците им се овозможува да изберат датум, време, салон и услуга за просечно време од само 37 секунди. „Само треба соодветно да ги изберат полињата и на екранот веднаш ќе им се појават сите субјекти што ги исполнуваат тие услови“, вели тој.

Идеја за ваков стартап добил за време на пандемијата на ковид-19. Иако во тој период овој сектор претрпе сериозен удар, со партнерот воочиле потреба на пазарот токму од ваков бизнис. На почетокот имале идеја за унифицирана платформа за резервации, но сфатиле дека трошоците би биле доста поголеми, па се фокусирале на индустријата за убавина. Тие конкурирале на натпреварот „Лонгест пич маратон“ (Longest Pitch Marathon) и во конкуренција со повеќе од сто стартапи од целиот свет успеале да ја добијат премијата од 20.000 евра.

„Немаме агресивен маркетинг и речиси сите досегашни 7.000 корисници за нас дознале по допрен глас. Во август ќе славиме две години на пазарот и досега имаме реализирано 25.000 резервации. Нашите услуги се бесплатни за граѓаните, така ќе остане и во иднина. Целосната заработка ни доаѓа од претплатата која ја добиваме од салоните за убавина“, вели Темелковски за „Блумберг Адрија“.