Синот на милијардерот кој стои зад „Шанел“ гради компанија вредна 110 милиони долари

Додека огромното богатство на луксузниот бренд „Шанел“ преминува на четвртата генерација, синот на еден од сопствениците гради тим кој ќе му помогне да води нов проект - фирма со приватен капитал. Дејвид Вертхајмер (37), чиј татко Џерард е еден од браќата милијардери зад брендот на скапи чанти и одела од твид, минатата година ја лансираше компанијата „1686 Партнерс“ со седиште во Луксембург со намера да инвестира во мода, козметика и други лајфстајл производи. Компанијата, која собра повеќе од 110 милиони долари заклучно со декември, ги зголеми вработувањата во последните месеци.

Андреас Ернст, поранешен менаџер на фондот „Скопос импакт“ (Skopos Impact), се приклучи како партнер, според неговата страница на „Линкдин“. Џонатан Фаруџа е директор за инвестиции во приватниот фонд, Џулиен Ербрех е оперативен менаџер и Џереми Лоти е шеф на партнерства и стратегија, според нивните профили на споменатата платформа.

Претставник на „1686 Partners“ одби да коментира. Тимот ќе биде лоциран во Европа и Азија, а повеќе детали ќе бидат откриени подоцна оваа година, објави компанијата на својата веб-страница.

Таткото на Вертхајмер и неговиот вујко Ален поседуваат еднаков број акции во сопственоста на „Шанел“, кои ги наследија како внуци на еден од оригиналните деловни партнери во парфемската операција на француската модна дизајнерка Габриел „Коко“ Шанел. Браќата, кои се во своите 70-ти години, имаат заедничка нето вредност од околу 106 милијарди долари, според индексот на милијардери на „Блумберг“.

Првите три инвестиции на „1686 Партнерс“ беа во европски бренд за облека за скијање, потоа во продажба на нови и користени луксузни часовници и, конечно во компанија која се фокусира на управување со залихи и прогнозирање на побарувачката за брендови и трговци на мало, рече Дејвид Вертхајмер во изјавата во декември. Тој не ги идентификуваше овие компании.

Наведената цел на приватната компанија е да ги поддржи иновативните компании во области како што се накит, гурманска храна, облека и мириси, според нејзината веб-страница. Нејзиниот фокус ќе биде на одржливи материјали и еколошки одговорни канали за дистрибуција, како и одговорно производство, одржливост и пристап до суровини.

Од 2020 година, Вертхајмер помага во управувањето на фондот за иновации и влијание на животниот стил „Мирабауд Асет Менаџмент“ (Mirabaud Asset Management) кој инвестираше во некои од истите сектори, вклучувајќи го производителот на вештачки дијаманти „Диам концепт“ (Diam Concept), брендот за електрични велосипеди „Мејт“ (Mate) и производителот на спортски патики „Кариумa“ (Cariuma).

Во декемвриската најава, тој ја нарече „1686 Партнерс“ сопствена франшиза на фондот „Мирабауд“ која ќе ги собере стратешките, институционалните, семејните и меѓународните инвеститори „посветени на проект што ја надминува чисто финансиската логика“.

Во моментов нема коментари за веста. Биди прв да коментира...

Остави коментар