Интервју со Четкар: Грижата за уметниците е државотворност, другите земји знаат како

Виртуоз на гитара, македонски а светски џез-музичар, чие автентично дело е инспиративен пример за тоа како се постигнува индивидуален успех во глобални рамки речиси единствено по своја заслуга, со многу вложена енергија и труд. Владимир Четкар не е само џез-гитарист, тој е аранжер, диригент, композитор и продуцент - целокупен музичар, кој паралелно живее и работи во САД и Македонија, а своите албуми ги снима исклучиво во САД, каде што и се школувал на престижниот музички колеџ „Беркли“. Тој е единствениот музичар од Македонија, кој излегува и од балканските граници без нашиот препознатлив 7/8 такт.

Четкар досега издаде неколку албуми, чии музички парчиња се вистински хитови со години, реализира светски турнеи, а некои од неговите синглови многупати се најдоа на првото место на светските музички листи. Последниот (нов) албум, кој првично беше издаден од јапонската музичка куќа „П-Вајн рекордс“ (P-Vine Records), веќе е продаден во неколку десетици илјади примероци само во Јапонија и Јужна Кореја, каде што Четкар неодамна реализира и промотивна мини-турнеја, а истото тоа летово го прави и во САД и Европа. Веќе во септември Четкар повторно ќе има концерт во Кјото, Јапонија.

 

„Владимир Четкар од Македонија е оригинален колку што е можно тоа!!! Сė што тој работи е направено комплетно од него, вклучувајќи го снимањето живи гудачки секции, клавијатури, гитари, текст и вокал, додека јас додадов малку продукциска магија”, напиша неодамна светски прочуениот диџеј и продуцент Доктор Пакер (Dr. Packer), кој направи ремикс на една од авторските композиции на Четкар (најавена е серија ремикси), издаден од австралиската музичка куќа „М2МР рекордингс“ (M2MR Recordings), а кој веќе го освојува врвот на топ листите.

Владимир Четкар

Во ова ексклузивно интервју на Владимир Четкар за „Блумберг Адрија“, освен за впечатоците по промоциите на последниот албум, зборуваме и за музиката како бизнис, кој сѐ работи со него, предизвиците на самостојните музичари, споредба на условите за музичарите во Македонија и другите земји, како и за тоа колку се значајни маркетингот и промоцијата во музичката индустрија.

Tokyo Tower Records

 

„Блумберг Адрија“ (ББА): „Let Us Be“ е новиот албум, повод и шанса да разговараме за музиката како бизнис. Сепак, да почнеме од албумот. Честитки! Вашите импресии по неговото лансирање и по неговата промоција низ светот?

Владимир Четкар: Искрено ви благодарам!

„Let Us Be“ е моето најзрело музичко остварување досега, во кое вложив огромен труд и посветеност, што на моменти се граничеше дури и со фанатизам.

Сите мои најдлабоки емоции, животни искуства, предизвици и инспирации се проткаени низ композициите, аранжманите, изведбата и текстовите на овој албум! Новиот албум, како и моите претходни студиски албуми, е издаден низ светот преку повеќе интернационални музички куќи, a само во Јапонија и Јужна Кореја преку „П-Вајн рекордс“ и „С и Л рекордс“ (C&L Records) моите албуми бележат физичка продажба од повеќе десетици илјади примероци, што е огромен успех, особено бидејќи денес музиката сите ја консумираат и слушаат директно од дигиталните музички платформи.

Фото: Драган Тасиќ

 

ББА: Вашите песни често се на светските топ листи, а многупати се на врвот. Многумина се обидуваат, на малкумина им успева. Очигледно вие знаете како. Што сака публиката?

Владимир Четкар: Мојата цел е публиката што има веќе изграден и софистициран музички вкус и која музиката ја гледа како уметност и дел од својот живот, а не само површно како моментална забава. 

Отсекогаш сум работел на долги патеки и бескомпромисно кога станува збор за квалитетот на финалниот музички производ, а визијата за тоа каде би ја пласирал мојата музика отсекогаш ги надминувала балканските граници и токму затоа верувам дека моите авторски дела си го најдоа патот до светските радиостаници и музички листи. 

ББА: Индустријата е немилосрдна и често се вели дека многу околни фактори се пресудни за успехот на еден музичар наспроти самиот талент. Вие несомнено одамна си го трасиравте патот до ѕвездите на музичката сцена, но неминовно е потребен тим за да се постигне сето тоа. Што сѐ е потребно и колкумина работеа и работат со вас и околу вас (во сенка) за да ја стекнете и, што е уште поважно, потоа да ја задржите славата?

Владимир Четкар: Музичкиот естаблишмент никогаш не бил фер спрема артистите, кои речиси без исклучок низ историјата биле финансиски злоупотребувани.

Иако дигиталната револуција драстично го промени начинот на правење, дистрибуирање и слушање музика, ќе треба да помине уште долго време и многу работа за да се воспостави еден фер модел во кој уметниците конечно ќе го добиваат својот заслужен дел.

Фото: Maya Chose

Јас имам блиски соработници што ми помагаат и силно веруваат во мојата музика, но, сепак, најголемиот дел од работата го работам самиот, бидејќи доколку сакаш да ги зачуваш своите права на твоите авторски дела и да ја зачуваш слободата на уметничкиот израз во најчиста форма, тогаш иднината е единствено самоменаџирањето.

Јас никогаш не влегувам во студио како бизнисмен со однапред искалкулирани статистики и клишеа што би ги запалиле масите, туку влегувам да ги преточам страста, љубовта и позитивната енергија во музика што ќе биде вечна, искрена, длабока и рамо до рамо со истата онаа безвременска музика што ме инспирирала уште како дете. Овој начин на работа секогаш носи огромен ризик, но јас никогаш не одам по линија на помал отпор и силно верувам дека судбината им помага на храбрите!

ББА: Настапувате буквално низ целиот свет. Каде е Македонија во споредба со државите од светот кога станува збор за можностите за музичарите?

Владимир Четкар: Можностите самите си ги создаваме, а тоа особено важи за независните музичари како мене, бидејќи јас не работам во никаква државна институција и сѐ што правам и постигнувам е мој личен резултат и труд.

Некои држави многу инвестираат во своите уметници и им помагаат да бидат покомфорни и порелаксирано да можат да создаваат, но тие држави веќе одамна сфатиле дека на нивното конто одат сите успеси на нивните уметници. Таквата стратегија, која треба да биде надвор од сите политички игри, се вика државотворност.

Концерт на Владимир Четкар во Јужна Кореја Фото: Maya Chose

ББА: Живеете и работите и во САД и во Македонија, па, оттука, релевантно е да ги споредиме условите за работа за музичарите во овие две земји. Опишете ги предностите и слабостите во двете земји кога станува збор за вашата работа.

Владимир Четкар: Америка е огромен музички пазар, но со сурова конкуренција, особено доколку ги работиш интернационалните музички жанрови. Оваа реалност создава еден страшен предизвик, кој за да се издржи, покрај врвниот талент, потребно е уметникот да поседува и рој други квалитети, како харизма, интелигенција, издржливост и огромни количества енергија. Македонија, од друга страна, е премногу мал пазар за квалитетните македонски авторски уметници да можат да просперираат и нивната уметност да се чуе во светот. Истовремено, модерната музичка уметност и традиционалниот фолклор во Македонија се екстремно загрозени поради контаминираноста од кичот во форма на турбофолкот и поп-фолкот што ни доаѓаат од соседните земји и, за да биде уште поиронично, овие жанрови соседните земји ги извезуваат единствено во Македонија, која е нивниот главен печалбарски терен.

Исто така, за разлика од Македонија, САД имаат многу високопрофесионални музички студија со фер цени, најквалитетна опрема и искусни музички инженери, кои ги ценат твоето време и труд, па добиваш максимум за тоа што си платил. Поради гореспоменатото, јас сите мои студиски албуми ги снимам и продуцирам во САД, а мојот начин на работа, според многу музички критичари, може да се спореди со органскиот начин на работа од 1970-тите години, бидејќи работам исклучиво со живи гудачки, дувачки и ритам-секции, па сето тоа дополнително заинтригира некои од најголемите светски диџеј/продуцентски имиња да направат повеќе ремикс-изданија од моите авторски песни.

Владимир Четкар

 

ББА: Маркетингот и промоцијата се многу значајни како во другите дејности, така и во музичката индустрија. Вие сте многу активен на социјалните мрежи. Дали е тоа сопствена волја или е дел од смислена стратегија за самопромоција во јавноста?

Владимир Четкар: Честопати сакам да се изразам креативно и надвор од границите на музиката. Преку социјалните мрежи сите уметници и воопшто јавни личности треба да се потрудат да влијаат позитивно врз луѓето, но и да го кажат свој искрен став, критика или пофалба кон многу сфери од животот.

Некако ми доаѓа природно да го користам хуморот за да искажам некои мои подлабоки размислувања со кои сакам да го стимулирам здравиот разум кај луѓето. Со други зборови, целта не ми е да бидам што попопуларен, туку што поинспиративно да дејствувам врз луѓето за сите заедно да изградиме една подобра средина на живеење. 

Фото: Maya Chose

ББА: Може ли еден музичар да живее само од музика? Колку е профитабилен бизнисот?

Владимир Четкар: Сигурно дека не е лесно доколку сте музички уметник што работи исклучиво авторска музика, но доколку сте максимално посветен, сите ќе ги добиеме своите пет минути! Јас долго време работев систематски и пополека ги градев мојата интернационална кариера и публика... Сето тоа денес ми го овозможува мојот начин на живот и да имам концерти низ светот. Музичкиот бизнис може да биде профитабилен доколку се работи мудро, но најголемата сатисфакција на вистинскиот уметник се неговите авторски дела и насмевката што тие ја прават на лицата на луѓето.

ББА: Вие сте „школа“ на Џорџ Бенсон. Колку тоа ви помогна да го најдете патот до успехот?

Владимир Четкар: Џорџ Бенсон е еден од моите најголеми гитарски и музички гуруа. Тој е господин од старата школа, кој нуди бескомпромисен квалитет, органска и креативна генијалност од која секогаш ќе се инспирирам и усовршувам. Истовремено не застанувам тука, бидејќи освен гитарист, јас сум и аранжер, диригент, композитор и продуцент, а овие мои дополнителни музички страни ги учев од други генијалци на таа ера, како Патрис Рушен, Квинси Џоунс, Мауро Малавази, Патрик Адамс, Давиде Романи итн.

Сите горенаведени инспирации дестилирани преку мојот креативен музички систем, во комбинација со мојот оригинален музички израз, се финалниот продукт што мене ме дефинира како комплетен музички автор. 

 

Во моментов нема коментари за веста. Биди прв да коментира...

Остави коментар