Денес секојдневно сме изложени на стрес, од деловни рокови до лични обврски. Сите сме свесни дека доколку не се препознае и не се регулира, стресот може да го загрози нашето ментално и физичко здравје. Многумина од нас се обидуваат да ги канализираат тензиите што нѐ смируваат на различни начини, без разлика дали станува збор за престој во природа, вежбање, трчање или едноставно за опуштање со чај и книга. Денес има многу нешта што може да ни помогнат, а сѐ повеќе се користат звучни терапии.
Звучната терапија е многу моќна алатка за враќање на рамнотежата, намалување на напнатоста и зголемување на внатрешниот мир. Медицината докажа дека нашето тело функционира како инструмент, а секој орган има своја фреквенција.
Звукот работи со менување на мозочните бранови, преминувајќи од состојба на активен стрес (бета-бранови) во состојба на длабока релаксација (алфа и тета-бранови).
Алма Лепир од Сараево, мајсторка по музика и звучна терапевтка практичарка на звучните методи на Питер Хес, за „Блумберг Адрија“ вели дека звукот е „лек на иднината“ и дека денес сѐ повеќе се користи во приватниот живот, здравствените институции, образованието и деловните средини.
„Звучната терапија помага во управувањето со стресот, го подобрува менталното здравје и ја подобрува општата благосостојба. Како холистички метод, таа ги користи фреквенциите и вибрациите на звукот за да им помогне на телото и на умот да се вратат во состојба на рамнотежа. Таа се заснова на идејата дека секој орган и клетка на телото имаат своја природна фреквенција“, вели Лепир.
Алма Лепир
Кога телото е под стрес или емотивно исцрпено, доаѓа до нерамнотежа на фреквенциите на телото. Гонгите, тибетските чинии и другите инструменти дејствуваат на телото и на умот со својот звук, враќајќи го во рамнотежа, помагајќи да се намалат напнатоста и анксиозноста и да се започнат природните процеси на регенерација.
Деловниот свет ги препознава придобивките
Сè повеќе компании ја препознаваат звучната терапија како ефективна алатка за управување со стресот. Звучните бањи и работилниците за вработените помагаат да се подобри концентрацијата, да се намали стресот и да се зголеми задоволството од работата. Со вградување на овие техники во работните процеси, компаниите придонесуваат за поздрава работна средина и поголема продуктивност.
Лепир потсетува дека во современото деловно опкружување стресот стана дел од секојдневието. Роковите, големите очекувања и постојаната комуникација често предизвикуваат пад на мотивацијата и на продуктивноста и зголемување на отсуствата поради здравствени проблеми.
„Звучната терапија нуди ефикасен начин тимовите да се поврзат, да се регенерираат и да најдат внатрешна рамнотежа, што директно влијае на подобра работна атмосфера и ефективност на тимот“, вели Лепир.
Зошто е ова важно? Кога вработените се под стрес, нивната креативност, фокус и меѓусебната соработка се намалуваат, што влијае на севкупниот успех на компанијата. Преку звучни бањи, работилници и програми за управување со стресот, компаниите можат да им обезбедат на своите вработени можност да се релаксираат и ресетираат. Резултатот е помотивиран тим, подобра комуникација и зголемена продуктивност.
Денес звучната терапија е предмет на голем број научни студии што го потврдуваат нејзиното позитивно влијание врз намалувањето на стресот, анксиозноста и несоницата, како и врз ублажувањето на хроничната болка и посттрауматскиот стрес. Се користи и кај лица со невролошки нарушувања и при работа со деца со тешкотии во развојот.
Алма Лепир
„Мислам дека тоа што звучната масажа на Питер Хес е комплементарен метод во официјалната медицина, а се применува во реномирани клиники повеќе од 30 години, е факт што ги потврдува и сериозноста и ефективноста на звучната работа. Низ практиката имам видено колку е корисен звукот во работата со деца со развојни тешкотии, помагајќи им да ги подобрат своите когнитивни и моторни функции, додека кај возрасните звучната терапија носи значително подобрување на несоницата, хроничниот замор и емоционалните блокади.
Питер Хес и тибетски чинии
Питер Хес, физичар и педагог, е основач на методот на звучна масажа. Хес ги истражува ефектите на звукот врз луѓето од раните 1980-ти. Звучната масажа на Питер Хес е една од најпопуларните кај нас. Според Лепир, оваа масажа користи тибетски чинии што се ставаат директно на телото и околу него. Со нежно звучење, вибрациите продираат во кожата, мускулите и во ткивата, помагајќи му на телото да ја ослободи напнатоста и да ги активира внатрешните процеси на заздравување.
Лепир објаснува дека овој третман е исклучително пријатен - клиентот чувствува длабока релаксација, а во некои случаи и емоционално олеснување. Звучните вибрации исто така помагаат да се балансираат енергетските текови, придонесувајќи за целокупното чувство на мир и ревитализација.
Во нашиот регион, според Лепир, сѐ уште постои одредена доза на скептицизам кон звучната терапија, бидејќи некои луѓе овој метод го поврзуваат со „алтернативни“ пристапи што не се добро познати.
Сепак, времињата се менуваат и сѐ повеќе луѓе го препознаваат неговиот потенцијал, особено преку работата на менталното здравје и управувањето со стресот. Лепир денес активно работи на демистификација на звучната терапија и нејзините конкретни резултати ги покажува преку индивидуални и групни сесии.
Алма Лепир
За разлика од регионот, во светот звучната терапија станува сѐ попопуларна како дел од велнес-програмите и превентивната здравствена заштита. Компаниите сѐ повеќе ја користат за подобрување на менталното здравје и продуктивноста на вработените, а здравствените институции ја користат во терапијата на пациентите.
Кај нас звучната терапија сѐ повеќе се препознава, но луѓето, како што тврди Лепир, сѐ уште се во фаза на истражување на нејзините придобивки. Тоа најмногу го забележува преку работилниците, звучните бањи и корпоративните програми што ги води.
„Забележувам дека интересот и отвореноста за овој метод растат - особено кај оние што бараат нови начини да управуваат со стресот и да останат здрави“, вели таа.
Треба да се напомене дека овој метод е генерално погоден за секого, но сè уште има исклучоци. Звучната терапија не се препорачува за трудници до третиот месец од бременоста, а претпазливост е неопходна и за луѓето со вграден пејсмејкер.
Што се однесува до цените, тие зависат од видот и времетраењето на сесијата. Лепир вели дека секогаш ги приспособува своите услуги на специфичните потреби на клиентите, бидејќи клучно е секоја сесија да дава максимален ефект.
Звучната терапија нуди безбеден и неинвазивен начин за опуштање и балансирање на телото, поради што Лепир наведува дека тоа е лекот на иднината.
„Како што се проширува свеста за холистичките пристапи кон здравјето, звучната терапија ќе станува сè поприсутна, не само како метод за релаксација туку и како дел од превентивната грижа и поддршка во лекувањето. Преку моето искуство, сведок сум како звукот ги трансформира животите, им помага на луѓето да се ослободат од напнатоста, да се поврзат со себе и да најдат внатрешна хармонија“, вели Лепир, додавајќи дека овој метод нуди не само моментална релаксација туку и долгорочни резултати во одржувањето на психофизичкото здравје.
.webp){kind=icon}
