Пет вида богатство според Сахил Блум – и како можеме да ги имаме сите

Во време кога успехот се мери со титули, состојбата на банкарската сметка и бројот на следбеници што ја потврдуваат „продуктивноста“, американскиот автор и инвеститор Сахил Блум се појавува како глас на разумот – и на будењето. Додека многумина трчаат по следниот стартап, овој дипломец од Стенфорд реши да тргне по поинаков пат и да ја пронајде сопствената смисла.

Кариерата ја започнал во компанијата „Алтамонт капитал партнерс“ (Altamont Capital Partners) во Пало Алто, Калифорнија, каде што, како што самиот вели, успешно ги учел другите дека капиталот може да се зголемува, но сè повеќе сфаќал дека истото тоа не важи и за личното исполнување. Бизнис-аналитичарот, кој подоцна станал потпретседател на компанијата, вложувал во голем број индустрии, но се покажало дека неговата најпрофитабилна инвестиција допрва следувала – инвестицијата во идеи.

STET

Во 2020 година, кога светот беше затворен во карантин и препуштен на бескрајното „скролање“, Сахил Блум почна да објавува на мрежата Х (тогаш Твитер) за она што, според него, навистина вреди: финансиска писменост, навики и личен раст.

Неговата мисла за „сложената камата на карактерот“ – идејата дека она што сте има поголем принос од она што го заработувате – стана вирална, а неговиот билтен „Кјуриосити кроникл“ (The Curiosity Chronicle) се претвори во глобален феномен, кој денес го читаат повеќе од половина милион луѓе.

На тој бран тој ја основа инвестициската компанија „СРБ Венчерс“ (SRB Ventures), насочена кон стартапи и образование, како и „СРБ Холдингс“ (SRB Holdings), која денес управува со неговото растечко медиумско царство.

„Би сакал да верувам дека парите не ме променија. Мислам дека оние што најдобро ме познаваат би рекле дека во суштина сум истата личност. Парите се само алатка што може да помогне мојата работа да допре подалеку и да шири позитивни бранови преку споделување пораки со светот.“
–  Блум

Пролетоска Сахил Блум ја објави книгата „Пет вида богатство“, која кај нас штотуку ја издаде издавачката куќа СТЕТ (STET), а самиот милијардер Бил Акман ја препорача како „важна и беспрекорно напишана“.

Но, делото на Блум не е уште еден „прирачник за самопомош за богатите и за оние што со нетрпение сакаат да станат такви“ – тоа е повик да ја преосмислиме самата идеја за богатството.

Во светот на Блум, капиталот не е само парите на сметката туку и во времето, луѓето, мислите, телото и смислата.

Временското богатство, според него, значи многу повеќе од слободно време – тоа е способност да ја контролирате сопствената внимателност, да присуствувате во животот онака како што сакате и да не потпаѓате под постојаната трка со времето.

Социјалното богатство нè потсетува дека луѓето и квалитетните односи што ги градиме низ животот имаат подолготраен ефект врз нашата среќа и здравје од која било финансиска инвестиција.

Менталното богатство подразбира развивање свесност, цел и благодарност – препознавање на моментите што навистина нè збогатуваат и му даваат текстура на секојдневието.

Физичкото богатство, иако често гламуризирано на социјалните мрежи, во пристапот на Блум е едноставно: секојдневно движење, дури и само триесет минути прошетка или возење велосипед, придонесува за долговечност и енергија.

На крајот, финансиското богатство се гледа како алатка – средство што овозможува остварување на сите овие цели и поддршка на другите аспекти од животот, но никогаш како цел сама по себе.

Успехот во кариерата без рамнотежа носи празнина

Пристапот на Сахил Блум е резултат на лично преиспитување. На почетокот од својата кариера, овој триесет и четиригодишник, како што самиот признава, бил целосно фокусиран на постигнувања – на пари, титули и резултати. Но со текот на времето сфатил дека успехот без внатрешна усогласеност носи празнина.

„На почетокот сè оптимизирав за постигнување, бидејќи светот ми велеше дека тоа е важно. Кога ги постигнав сите цели што општеството ги смета за значајни, почувствував празнина. Тогаш сфатив: растот не е само во тоа што градиш туку и во тоа кој стануваш додека градиш“, вели Блум во интервју за „Блумберг Адрија“. 

„Вредноста заснована на смисла потешко се мери, но е поважна – затоа што луѓето, довербата и верувањето не растат и не се множат лесно како парите.“

– Блум

Дури и кога ја објаснува својата концепција на „сложена камата на карактерот“, Блум тргнува од сопственото искуство.

„Почнав да забележувам дека вратите се отвораат не поради тоа што сум постигнал, туку поради тоа кој сум станал. Кога го одржуваш зборот и постапуваш исправно, дури и кога никој не гледа, се отвораат врати што парите не можат да ги купат“, објаснува тој.

Што ако исчезне мрежата Х

Неговата активност на поранешниот Твитер, денес познат како Х, како и на другите дигитални платформи, исто така го одразува овој принцип. Го прашавме што би се случило доколку оваа платформа – на која има повеќе од еден милион следбеници и над 70.000 објави што станаа неформална „глобална образовна платформа“ – едноставно исчезне.

„Платформите доаѓаат и си заминуваат. Она што останува се занаетот, љубопитноста и способноста да размислувам, да учам и да се поврзувам со луѓето преку идеи. Ако платформата исчезне, јас и понатаму ќе пишувам, ќе учам и ќе ги споделувам моите сознанија преку билтени, книги и јавни говори“, одговара Блум.

 

 

Во разговорот, Сахил Блум ја осветлува разликата меѓу успехот и исполнетоста – две „валути“ што, како што вели, многумина ги мешаат. Додека успехот е видлив, измерен преку показатели и награди, исполнетоста е тивка и доаѓа преку присутност, смисла и служба на другите.

Присутноста, според него, е уште еден аспект од животот што одбива да биде автоматски регулиран.
„Навиките и системите може да се оптимизираат и следат, но присутноста – да бидеш таму каде што се твоите стапала – не може да се автоматизира. Таа мора свесно да се избира секој момент“, вели Блум.

Понекогаш најнерационалната одлука го менува животот на подобро

Најдраматичната одлука во неговиот живот, како што признава, била заминувањето од светот на приватниот капитал.
„На хартија, тоа немаше никаква логика – стабилна патека, јасни награди, дефинирана хиерархија. Но нешто во мене беше неусогласено. Знаев дека ако останам, ќе продолжам да ја играм туѓата игра. Беше хаотично и неизвесно, но јасноста не секогаш доаѓа со контрола. Понекогаш мораш да ја запалиш старата мапа и да веруваш во себе дека ќе нацрташ нова.“

„Не дозволувај стремежот кон повеќе да ја засени убавината на она што веќе го имаш.“
– Блум

За големите животни, но и за сите други важни одлуки, Блум ја нагласува важноста на тишината и фокусот во свет преплавен со информации и бучава.
„Сигналот доаѓа од тишината. Колку повеќе растеш, толку погласна станува бучавата – повеќе мислења, повеќе можности што изгледаат како напредок, но те одвлекуваат од патот. Се навраќам на пишување, на прошетки, на размислување во тишина. Кога ќе забавиш – сигналот секогаш се враќа“, објаснува тој.

На крајот, неговиот поглед на животот е практичен, но длабоко филозофски.

Кога го прашавме што би му порачал на своето постаро јас, тој одговори:

„Добро ти оди. Престани да брзаш. Повеќето грешки се резултат на трчање низ сезони што требало да се поминат бавно. Каматата се пресметува само ако ѝ дадеш време.“

А бидејќи Блум е и страстен маратонец, кој во 2023 година истрча маратон за помалку од три часа – можеме да му веруваме на зборот.