.webp){kind=icon}
Луксузни колиби (Glamping pods) наскоро ќе почнат да се произведуваат за македонскиот пазар. Овие специјални куќи кои нудат погодности какви што постојат во хотелите со пет ѕвезди веќе им се нудат на заинтересираните купувачи на социјалната платформа Линкдин (LinkedIn). Почетната цена е 35.000 евра.
Како инвеститор на проектот се потпишува „Консалтинг Балкан“ (Consulting Balkan), македонска компанија чија главна дејност е консалтинг, проектен менаџмент и инвестиции во Југоисточна Европа.
„Блумберг Адрија“ стапи во контакт со одговорните лица за да дознаеме што точно им се нуди на потенцијалните сопственици. Оттаму велат дека станува збор за привремени живеалишта долги 8,4 метри, целосно функционални да служат и како мали домови. Местата каде што можат да се постават се неограничени.
Основната верзија вклучува главна спална соба со уште две дополнителни места за спиење, дневна соба со телевизор и простран поглед кон градината. Во секој објект е предвидено да има кујна со машина за миење садови, машина за перење алишта, ладилник со замрзнувач, туш-кабина и затворен тоалет.
Горан Петрушевски, експерт за логистика во компанијата, вели дека не се ограничени на сериско производство и дека секоја дополнителна желба на клиентот за нив е нова „почетна“ инвестиција.
Depositphotos
„Нашата идеја е на потенцијалните купувачи да им понудиме решение кое е функционално како класична викендица, но кое ќе биде спој на луксуз и едноставност и ќе овозможува еден поавтентичен пристап до природата“, вели тој.
Петрушевски открива дека поради природата на самиот објект, досега најголем интерес покажуваат клиенти кои се „камперски“ расположени, но дека последниов период се’ повеќе ги контактираат и коминтенти кои овој нивен концепт го преферираат како нешто прифатливо за подолг период.
Освен што имаат право на специфични барања за ентериерот, на оние со подлабок џеб им се дава можност да одлучат дали освен во луксузни елементи сакаат дополнително да инвестираат и во одржливи решенија за греење и ладење. Времето на производство е од 8 до 12 недели. Од „Консалтинг Балкан“ велат дека, за жал, во Македонија нема простор за реализација на ваков производствен проект поради репроматеријалот (дрвото) кое се користи.
Depositphotos
„За дизајнот ангажиравме неколку архитекти за внатрешно уредување. Идејата за основниот дизајн е од еден наш претходен проект, а тоа се премиум сауните на отворено (Barrel sauna) кој веќе функционира и имаме успешен пласман не само на домашниот, туку и на европоскиот пазар“, вели Петрушевски.
Ваков тип на објекти во светот веќе со години се користат за глампинг (луксузно кампување) кое денес на глобалниот пазар вреди 3,5 милијарди долари.
Уникатно искуство во природа, со помала доза на луксуз, од неодамна се нуди и кај нас. Пет монтажни прозрачни куполи (Grizzly igloos) неодамна беа поставени во околината на езерото Козјак. Според огласениот простор за изнајмување на „Ер-би-ен-би“ (Airbnb Inc.) за едно ноќевање ќе треба да платите околу 100 долари.
