.webp){kind=icon}
Глампинг-дестинациите се сè попопуларни низ светот и на патниците им овозможуваат уникатни и незаборавни искуства во природа со помала или поголема доза на луксуз. Овој тип одмор вклучува разни активности на отворено, како што се планинарење, возење кану, дегустација на храна и вино, како и некои креативни и неочекувани искуства. Исто така, многу глампинг-дестинации нудат дополнителни содржини, како што се базени, спа-центри, ресторани и простори за друштвени активности. Трендот стана популарен помеѓу 2000 и 2010 година, како одговор на индустријата на потребата на луѓето да избегаат од метежот и да се поврзат со природата.
Гламурозната сцена на кампување во пустина од хит-филмот „Сексот и градот 2“ од 2010 година придонесе за популаризација на глампингот иако прикажаниот камп беше фиктивен, направен за потребите на снимањето на филмот во Мароко. Сцената прикажува луксузно кампување во шатори со раскошен мебел, елегантен декор и трпеза на исто ниво со рестораните на „Мишелин“.
Денес глобалниот пазар на глампингот вреди 3,5 милијарди долари, при што Европа учествува со 35 отсто, а се очекува раст од 10,2 отсто до 2030 година. Глампингот привлекува различни видови посетители, најчесто на возраст помеѓу 35 и 59 години, како што се двојки што бараат романтично искуство, љубители на природата и одржливиот туризам, но и семејства, бидејќи овој концепт го олеснува престојот во природа со деца.
Глампинг-објектите не заостануваат по стандардот и цената во однос на најлуксузните хотели со пет ѕвезди. Концептот на глампинг-одморот се заснова на автентичност, па цената ја диктираат нивото на луксуз на сместувањето и дополнителните содржини, како и природните убавини, атракции и мир, кои го прават целото искуство уникатно.
Ова објаснува зошто цената на глампингот често е повисока во споредба со традиционалните луксузни патувања.
Еден од најскапите глампинг-концепти во светот е Белата пустина што се наоѓа на Антарктикот. Овој камп нуди врвно сместување во луксузни шатори, гурмански оброци, тури со хеликоптери и голем број авантуристички активности. Цената на престојот може да достигне и до 100 илјади долари за седум дена поради уникатната локација и понуда.
Кога станува збор за регионот, седумдневен престој во островскиот рај „Обоњан ајленд ресорт“ во Хрватска (www.obonjan.hr) бара издвојување од 1.000 евра. Сличен буџет е потребен за „Хупо глампинг енд адвенчрс“ на Скадарско Езеро во Црна Гора (www.hoopoeglamping.com), како и за „Багрем“ (@bagremglamping) на реката Јабланица во Босна и Херцеговина. Ноќевање во „Чоколејт вилиџ бај д ривер“ (https://chocolatevillage.eu/) во близината на Марибор, во Словенија, чини 400 евра по ноќ по објект, што ветува сладок престој во природа со изобилство природни и чоколадни атракции. „Хербал глампинг ресорт Љубно“ во Словенија (www.charmingslovenia.com/en/herbal-glamping-resort-ljubno), каде што куќичките се инспирирани од лековити билки, за седумдневен престој бара инвестиција од 2.000 евра.
Во елитното одморалиште „Валмар Истра премиум кампинг ресорт“ (https://www.valamar.com/) во Пореч, Хрватска, цената по камп-куќичка може да достигне и 500 евра за ноќевање. „Абеј мезон Златни Рат“ (www.abeillemaison.hr/) во Бол на Брач во Хрватска, единствениот објект „само за возрасни“ (Adults Only), чини 4.000 евра со вклучен попуст за неделно изнајмување.
Дали високите цени на сместувањето се оправдани во однос на вложувањето во глампинг-објекти? Тоа го прашавме сопственикот на реномирана ИТ-компанија од Белград, кој во потрагата по совршен одмор во природа го открил и се заљубил во глампинг-концептот, па дошол на идеја да изгради таков објект на своето земјиште во околината на Врдник, во Србија. Тој објаснува дека вредноста и атрактивноста на глампинг-објектот зависат од природното опкружување, како и од изгледот и квалитетот на камп-куќичките, чија цена може значително да варира. Трошоците за куќичките се движат од едноставни шатори, кои може да се најдат на кинескиот пазар за околу 5.000 евра, до луксузно дизајнирани и целосно опремени куќички, кои може да чинат и до 50.000 евра. Покрај трошоците за куќичките, важните фактори при планирањето на буџетот вклучуваат студија за оправданост, дозволи, инфраструктура како струја и вода, изградба на патишта, како и времето потребно за започнување на проектот и обработката на документацијата. Нашиот соговорник додава дека, иако изминатата година била посветена на подготовка на проекти и истражување, често се прашувал дали изградбата на едноставен хотел би била полесна и поевтина опција. Сепак, сè уште изградбата на глампинг-објект ја гледа како лично бегство од напорниот ритам на секојдневниот живот и како привлечна опција за сѐ поголемиот број вљубеници во овој концепт.
Растечкиот тренд на глампингот во туризмот го потврдија и водечките светски брендови. „Луј Витон“, на пример, во 2020 година им понуди на своите клиенти шатор „Монограм“ по цена од 109.000 долари. Дизајнерот Вирџил Аблох го создаде овој шатор со идеја гламурозно да го трансформира престојот дома, поточно во градина, за време на пандемијата, нудејќи значително поинакво искуство, кое ни овозможува во мир и во природа да ги истражуваме скриените делови од себе и околината. Зарем тоа не е суштината на глампингот?
*Доколку ви се допаѓа оваа содржина, имате идеја или коментар, пишете ни на luxury@bloombergadria.com
