Зошто хотелите „само за возрасни“ наеднаш станаа толку популарни?

Расте побарувачката за хотели наменети само за возрасни во светски рамки. Овие сместувачки капацитети кои на гостите им гарантираат мир и приватност стануваат голем тренд во патувањето. И покрај високата инфлација, интересот не бил никогаш поголем за овие претежно луксузни места кои се издвојуваат по софистицираниот пристап и персонализираните услуги. Понудата е богата и разновидна-од базени на кров, спортски терени, спа-центри за подмладување и ресторани со врвна храна, до тематски вечери со богата ноќна програма и казина.

Подалеку од хаосот кој често го поврзуваат со семејните одморалишта, на ваков одмор се одлучуваат и се’ повеќе Македонци, а тоа го покажуваат раните резервации за ова лето во поголемите туристички агенции што ги контактиравме.

Depositphotos

Од „Фибула“ велат дека патниците веќе добро ги препознаваат предностите на овие хотели за кои втора сезона по ред владее огромен интерес и во туристичката агенција „Савана“. Оттаму, пак, истакнуваат дека за вакви аранжмани особено се интересираат оние клиенти кои практикуваат таканаречен ДИНК* начин на живот.

Нашите соговорници кои со децении се вклучени во хотелиерскиот бизнис велат дека глобалната експанзија на овие одморалишта само навидум е резултат на ограничувањето на возраста и дека главната причина за овој неочекуван тренд во травел-индустријата се всушност зголемените очекувања.

„Патниците во 2025-та не бараат само место за престој. Тие инвестираат и во искуство кое е во согласност со нивниот животен стил, менталното здравје кон кое тежнеат и комфорот кон кој се стремат“, велат тие.

Директорот на „Фибула“, Асим Меџедовиќ, истакнува дека примарната цел на овие хотели е токму тоа, да одговорат на специфичните вкусови и желби на гостите. Според него, овие ресорти во исто верме се идеална дестинација и за двојки кои размислуваат каде да го поминат медениот месец и за повозрасни партнери кои не сакаат многу гужви и гласна музика.

„Дел од овие места се создадени за љубители на активен одмор со дневни и ноќни забави, а дел се со порелаксирачки анимации и пасивен одмор во однос на дневните содржини“, вели тој за „Блумберг Адрија“.

Од „Савана“, пак, посочуваат три клучни фактори поради кои хотелите за возрасни наеднаш станале екстремно популарни: 

- Приватност и тишина (совршена релаксација или романтичен одмор).

- Персонализирана услуга (велнес ритуали, фајн дајнинг и сигничр коктели).

- Слободна забава (сансет лаунџис и тематски вечери без ограничувања што ги носи семејниот концепт).

 

Аранжмани за сечиј џеб

Пакетите кои им се нудат на македонските туристи зависат од потребите. Од агенциите појаснуваат дека цените се креираат во зависност од категоријата на хотелот, терминот и должината на престојот, а на нивните веб-страници може да добиете прецизна пресметка за аранжманот за кој што сте заинтересирани. Она што веднаш се забележува е дека хотели само за возрасни на Балканот може да си приуштат оние со подлабок џеб, додека во останатите летувалишта низ Европа тие се стандард и разликата во цена не е толку изразена.

Depositphotos

„Фибула“ во моментов располага со триесетина такви хотели и е фокусирана на три земји-Турција, Египет и Грција. Анталија доминира во нивната понуда со сместувачки капацитети кои во најголем дел се наоѓаат во Сиде и Аланија. Споредивме две одморалишта во оваа област по случаен избор - „Roma Beach Resort и Adam & Eve“ и во зависност од собата што ќе ја одберете, шест ноќевања во висока сезона може да ве чинат од 900 до 1.500 евра по лице со вклучен авионски превоз. За ист таков „ол инклузив“ аранжман за двајца во „Caves Beach Resort“ во Хургада ќе треба да одвоите околу 640 евра по лице. Толку ќе ве чини и полупансион со рана резервација во „Domes Noruz Kassandra“ во Ханиоти, ресорт кој е особено популарен кај нас во последните две години.

И „Савана“ соработува со овие три земји, а кај нив може да резервирате ваков тип на хотели и во Шпанија и Тунис. Од нивната понуда особено се издвојува суперлуксузниот ресорт („Stella Island Luxury resort & Spa - Adults Only“) кој се наоѓа на Крит. Овде, во зависност од сместувањето што ќе го одберете, за шест ноќи во првата половина на јули ќе треба да одвоите и до 3.000 евра по лице. Сепак, има и значително поевтини опции за оние кои не бараат ексклузивност и на кои единствено им е важно да престојуваат во објект кадешто влезот за деца е забранет. Во познатото шпанско летувалиште Лорет де Мар, за истиот период во јули, шестдневен престој во „Guitart Rosa - Adults Only“, хотел со три ѕвездички, ќе ве чини околу 360 евра по лице.

Без деца и на јадранското крајбрежје

И на хрватското и црногорското приморје се’ повеќе хотели нудат мир и приватност без деца, луксузни содржини и услуги адаптирани исклучиво за возрасни. За овие одморалишта расте интересот и кај нас, иако на прсти се бројат оние што ги нудат домашните агенции. „TUI BLUE Adriatic Beach“ во Макарска и „Vivid Blue Serenity Resort“ во Будва се единствените поатрактивни ресорти само за возрасни од регионот Адрија кои туристичката агенција „Савана“ моментално им ги нуди на македонските туристи. Истите се достапни и на „Букинг“, па проверивме колку чинат. Во првиот, за едно ноќевање во јули со сите вклучени оброци ќе треба да платите околу 350 евра за двајца, а вториот нуди само појадок и ќе ве чини околу 100 евра помалку за истиот период.

„За сезоната 2025-2026 планираме да додадеме уште поголем број хотели, како и неколку бутик 18+ капацитети на Хвар и во Которскиот Залив, за уште поголем избор за идеален одмор на Јадранот“, ни рекоа од „Савана“ кога ги прашавме дали планираат соработка со повеќе такви места на јадранското крајбрежје.

На истото прашање, од „Фибула“ ни одговорија дека во моментов немаат готов концепт за овие дестинации, но дека во иднина планираат да ја збогатат понудата.