Пазарот на туристички патувања ќе достигне вредност од 15 билиони долари до 2040 година.

Не ви требаат статистики за да знаете дека аеродромите и авионите се значително пополни отколку порано. Но, извештајот на компанијата „Бостон консалтинг груп“ јасно покажува колку брзо расте индустријата за патувања. Нивната глобална анализа на туристичките патувања, базирана на анкета со речиси 5.000 патници, проценува дека годишната потрошувачка на потрошувачите за патувања ќе се зголеми трикратно – од 5 билиони долари во 2024 година на 15 билиони долари до 2040 година. Со тоа, оваа индустрија ќе ја надмине дури и фармацевтската и модната индустрија.

SeongJoon Cho/Bloomberg

Овој замав, како што се наведува во извештајот, не доаѓа од САД или Европа.

„Земјите во развој навистина ќе бидат главните двигатели на растот – како Кина, Индија и Саудиска Арабија“, вели Лара Кослоу, виша партнерка во „Бостон консалтинг груп“ и една од авторките на извештајот. Во разговор за „Блумберг“, Кослоу објаснува дека растот на средната класа во тие земји создава нова група потрошувачи заинтересирани за туристички патувања – слично како што растот на средната класа во САД пред неколку децении доведе до развој на „ресорт“ културата. Кина е на пат да стане земја со најголема потрошувачка на туристички патувања, со годишен раст од над 10 отсто.

SeongJoon Cho/Bloomberg

„Сите знаеме дека туристичките патувања се во пораст и дека тој тренд трае веќе подолго време“, вели Кослоу. Но, таа посочува дека била изненадена од податокот дека дури 70 отсто од патниците од земјите во развој на деловните патувања додаваат и туристички дел – што е многу поретко во САД.

Патувањата во рамките на сопствената земја сè уште претставуваат најголем дел од побарувачката. Сепак, меѓународните туристички патувања растат побрзо. „Бостон консалтинг груп“ предвидува дека тие ќе се зголемат повеќе од трипати – од 424 милијарди долари во 2024 година на 1,4 билиони долари до 2040 година.

Се разбира, индустријата за патувања е тешко прецизно да се квантифицира. Повеќето процени, како оние на Светскиот совет за патувања и туризам, вклучуваат трошоци за ресторани или индиректни ефекти што вработените во угостителството ги имаат врз локалната економија; во април, Светскиот совет за патувања и туризам процени дека оваа индустрија до крајот на годината ќе достигне 11,7 билиони долари, што е 10,3 отсто од глобалниот БДП. „Бостон консалтинг груп“ користи слична методологија. Нивните податоци ги следат промените во шемите на патувања во 68 земји од 2014 до 2024 година, а анкетирани се и патници од 11 земји чии жители често патуваат или се очекува да почнат да патуваат.

SeongJoon Cho/Bloomberg

Значајно е што истражувањето на „Бостон консалтинг груп“ не ги зема предвид тековните ризици од трговските војни или геополитичките конфликти што би можеле да го нарушат патувањето низ цели региони, како Блискиот Исток. Кослоу вели дека овие ситуации „се многу неизвесни“ во моментот.

Сепак, индустријата за патувања покажала отпорност, вели Кослоу – што се совпаѓа со прогнозите на Светскиот совет за патувања и туризам. А сè поголемата желба на потрошувачите за патувања довела до тоа сè повеќе луѓе да резервираат патувања во последен момент, и покрај економската неизвесност.

„Луѓето сè повеќе сакаат да уживаат во искуства и да не ги пропуштат можностите – carpe diem“, вели таа. „Сè почесто гледаме дека, кога ќе им се укаже можност, луѓето ја користат до максимум“.

Во моментов нема коментари за веста. Биди прв да коментира...

Остави коментар