Роналдо стана првиот фудбалер милијардер со големиот договор во Саудиска Арабија

Португалскиот фудбалер е при крајот на својата фудбалска кариера, но договорот со саудискиот клуб Ал Наср го издигна во елитната група на најбогатите спортисти во светот.

Фудбалската кариера на Кристијано Роналдо е исполнета со блескави првенства – од рекордниот трансфер во Реал Мадрид до повеќе постигнати голови во натпреварувања од кој било фудбалер во историјата. Сега, тој запиша уште еден историски успех надвор од теренот: стана првиот милијардер меѓу фудбалерите.

Во повеќе од две децении поминати во некои од најголемите европски клубови, меѓу кои Манчестер јунајтед и Јувентус, 40-годишниот Португалец никогаш не ја криел желбата да ја искористи својата популарност преку профитабилни соработки со брендови како „Армани“ (Armani) и „Најк“ (Nike).

Но токму сега, на залезот на својата кариера, Роналдо влезе во редот на најбогатите спортисти на светот, потпишувајќи во јуни нов продолжен договор со саудискиот клуб Ал Наср, вреден над 400 милиони долари, наведуваат медиумските извештаи.

Нетo-вредноста на Кристијано Роналдо сега достигна 1,4 милијарда долари, според индексот на милијардери на „Блумберг“, кој првпат ја пресметува неговата вкупна заработка - што го прави првиот фудбалер што ја има постигнато оваа бројка.

Долги години тој и Лео Меси, со кого Роналдо ја дели борбата за титулата најголем фудбалер во историјата, имаа слични примања. Но нивните патишта драстично се разидоа во 2023 година, кога Роналдо се пресели во Заливот, а Меси му се придружи на американскиот клуб Интер Мајами во Мејџор лига сокер (Major League Soccer).
Аргентинецот, сепак, треба да добие сопственички удел во американскиот клуб по завршувањето на кариерата, договор што би можел повторно да го изедначи со неговиот долгогодишен ривал.

Роналдо изненади многумина кога му се приклучи на релативно непознатиот саудиски клуб Ал Наср, изјавувајќи со карактеристична самоувереност дека бара нов предизвик, откако „ги освоил сите можни трофеи“ во Европа.

Иако некои го доведуваа во прашање неговиот натамошен натпреварувачки мотив, трансферот му донесе еден од најголемите договори во историјата на фудбалот и највисока просечна годишна плата за еден спортист. Саудиските приходи се ослободени од даноци, а договорот, според пишувањата, вклучува удел во клубот и пристап до приватен авион.

Мигел Маркеш, кој управува со дел од богатството на Роналдо преку лисабонската компанија „ЛМ капитал“ (LMcapital Wealth Management), одбил да коментира за неговата нето-вредност, исто како и една од надворешните пиар-агенции што го претставуваат фудбалерот.

Процената на „Блумберг“ ги вклучува вкупните заработки од кариерата, како и инвестициите и договорите за рекламирање, приспособени според тековните даночни стапки и пазарната состојба.

Скромни почетоци

Иако во последните години во фудбалот влегува незамисливо голем прилив на пари, финансискиот подем на Роналдо е неверојатен. Тој израснал во сиромашно семејство на островот Мадеира, а на 14-годишна возраст го напуштил училиштето за да му се посвети на фудбалот.
Откако се преселил на копното, стекнал локална слава со Спортинг Лисабон, пред да направи чекор кон европските гиганти и да стане еден од најплатените фудбалери на сите времиња.
Тоа вклучува и трансфер во Манчестер јунајтед во 2003 година, а потоа и во Реал Мадрид шест години подоцна, каде што потпиша еден од најголемите договори во историјата на фудбалот.

Музејот КР7 во Фуншал, на родниот остров на Роналдо — Мадеира. Фотограф: Павел Дудек / Alamy

Аурелио Переира, човекот што го открил Роналдо за Спортинг Лисабон, се сеќава на него како на срамежливо и слабичко момче, чиј вонземјански талент му го донел прекарот НЛО (UFO).

Денес островот Мадеира се гордее со меѓународниот аеродром „Кристијано Роналдо“, музејот КР7 (CR7) и хотелот „Пестана КР7“ (Pestana CR7).

Фудбалерот Роналдо, кој го добил името по поранешниот американски претседател Роналд Реган, заработил повеќе од 550 милиони долари во плати помеѓу 2002 и 2023 година. Дополнително, потпишал десетгодишен договор со „Најк“ (Nike) вреден речиси 18 милиони долари годишно, како и други спонзорства со брендови како „Армани“ (Armani) и „Кастрол“ (Castrol), кои му донеле уште над 175 милиони долари.

Неговиот трансфер во 2023 година во Ал Наср му обезбеди околу 200 милиони долари годишно во плата и бонуси ослободени од даноци, плус дополнителни погодности, вклучувајќи бонус од 30 милиони долари.

Според индексот на богатство на „Блумберг“, Меси во својата кариера заработил над 600 милиони долари во бруто-плата, вклучувајќи гарантирани 20 милиони долари годишно од 2023 година. Тој, наводно, има и договор за учество во приходите со „Епл“ (Apple).

Гарантираната заработка на Меси во последните две сезони е само околу една десеттина од приходите на Роналдо во истиот период.

И двајцата фудбалери профитирале од огромниот раст на платите во спортот, кој далеку ги надминува животните заработки на претходните ѕвезди како Дејвид Бекам, кој пред пензионирањето во 2013 година заработил околу 100 милиони долари.

Кога станува збор за управување и инвестирање на богатството, Роналдо се потпира на Мигел Маркеш, кој претходно работел во швајцарска банка, а сега води канцеларија над продавницата на „Луј Витон“ (Louis Vuitton) на луксузната Авенида да Либердаде во Лисабон.

Неговата компанија „ЛМ капитал“ управува со средства во вредност од 1,4 милијарда евра од основањето во 2018 година.

Фудбалските копачки „португал КР7“  на Роналдо. Фотограф: Алекс Пантлинг / УЕФА / Гети имиџис

Роналдо најмногу инвестира во својата татковина, внимателно оценувајќи ги бизнисите заедно со тесен круг пријатели и советници, при што лојалноста ја смета за највредна доблест. Така, тој размислувал да купи удел во лисабонскиот клуб Сити оф падел – спорт што самиот го практикува и понекогаш присуствува на натпревари.

Неговиот долгогодишен пријател Мигел Паишо душ Сантуш учествувал во помали португалски инвестиции, меѓу кои и преземањето на спортскиот комплекс „Лисбоа ракет центар“ (Lisboa Racket Center) во 2024 година.

Иако Роналдо има повеќе бизниси – меѓу кои брендот КР7, синџир хотели, вежбалници и медиумски бизнис – тие не претставуваат главен извор на неговото богатство.

Познат по тоа што ретко дава интервјуа, Роналдо во 2016 година предизвика внимание кога го фрли микрофонот на новинар во езеро, под притисок од слабиот настап на Европското првенство таа година – турнир што Португалија подоцна го освои.

Неколку години подоцна, во 2023 година, тој им се приклучи на група инвеститори што го купија медиумот Си-ем ТВ (CMTV), истата телевизија чиј новинар тогаш го испровоцира.

Роналдо за време на претставувањето на неговата машка колекција на долна облека КР7 во палатата Сибелес во Мадрид, во октомври 2013 година. Фотограф: Карлос Идалго / ЕПА / Шатерсток

Роналдо исто така поседува импресивно портфолио од недвижности, меѓу кои вила на Мадеира и пентхаус во Лисабон, кој поставил рекорд по највисока цена платена по квадратен метар во португалската престолнина.
Во моментов тој го довршува својот имот во Квинта да Мариња, луксузен голф-ресорт на периферијата на Лисабон, чија изградба, според извештаите, чини околу 20 милиони евра.

Новата куќа привлече внимание и кај локалното население и кај туристите, кои често се собираат околу клуб-куќата и паркингот на голф-теренот „Оитавос дјунс“ (Oitavos Dunes Golf Course), сместен на рид со поглед кон имотот на фудбалерот.

Сопственикот на клубот Мигел Шампалимауд, кој му ја продал парцелата на Роналдо, дури морал да ги одбива посетителите што се обидувале да фрлат поглед на новиот дом на ѕвездата.

Што следува

Роналдо е најпопуларната личност во светот на Инстаграм, со повеќе од 660 милиони следбеници – факт што сигурно не им е непознат на саудиските власти, кои се обидуваат да ја промовираат земјата како нова привлечна туристичка дестинација.

Обожаватели на Роналдо го фотографираат својот идол пред финалето на Суперкупот на Саудиска Арабија меѓу Ал Наср и Ал Ахли на стадионот во Хонгконг, на 23 август. Фотограф: Евроазија спорт имиџис / Гети имиџис

Неговото пристигнување во Саудиска Арабија предизвика огромна еуфорија – илјадници навивачи присуствуваа на неговото деби, а натпреварите што следуваа редовно беа распродадени. Роналдо брзо стана најдобар стрелец на Ал Наср.

Сепак, почетниот ентузијазам со текот на времето ослабна, па на некои натпревари бројот на гледачи значително се намали. На еден натпревар кон крајот на сезоната, кој можеше да биде негов последен домашен настап пред обновувањето на договорот, присуствувале помалку од 6.000 гледачи, според медиумите.

Роналдо ја брани Саудиската професионална лига, тврдејќи дури дека таа е поквалитетна од француската Лига 1.
Тој често ги фали безбедноста и убавината на Саудиска Арабија, редовно споделувајќи на Инстаграм делови од својот живот таму, особено фотографии и видеа од Црвено Море.

Богатството на Роналдо е релативно поинакво од она на другите спортисти милијардери со кои сега се наоѓа во истата класа, бидејќи најголемиот дел од неговата заработка потекнува од плата.

За споредба, најголемиот дел од богатството на Роџер Федерер произлегува од уделот што го стекна во брендот за спортска опрема „Он холдингс“ (On Holdings AG) како дел од спонзорски договор, покажува индексот на богатство на „Блумберг“.

Легендата на кошарката Мајкл Џордан, пак, заработил помалку од 100 милиони долари во текот на кариерата, при што најголемиот дел од неговото богатство доаѓа од долгогодишниот договор со „Најк“ и уделот во кошаркарскиот клуб Шарлот хорнетс од НБА.

За Роналдо сè поактуелно станува прашањето што ќе следува по крајот на неговата кариера. Тој е еден од највозрасните активни професионални фудбалери, а изјавил дека очекува да се пензионира во Ал Наср.
Негова долгорочна амбиција е да стане сопственик на повеќе фудбалски клубови, следејќи го примерот на Дејвид Бекам, кој е сопственик и косопственик на Интер Мајами.

Роналдо по постигнат гол за Ал Наср во финалето на Суперкупот на Саудиска Арабија против Ал Ахли на стадионoт во Хонгконг на 23 август. Фотограф: Ју Чун Кристофер Вонг / Евроазија спорт имиџис / Гети имиџис

Дел од таа негова желба веќе се остварил, откако, според медиумските извештаи, Роналдо добил 15 отсто сопственички удел во Ал Наср како дел од продолжувањето на неговиот договор.
Со оглед на нивото на богатство што го гради во моментов, во неговото портфолио веројатно ќе му се отворат многу нови можности кога конечно ќе ги закачи копачките на клинец.

Во моментов нема коментари за веста. Биди прв да коментира...

Остави коментар