Илон Маск го изгуби случајот против Сем Алтман за иднината на „Опен еј-ај“

Поротата ги отфрли тврдењата на Илон Маск дека „Опен еј-ај“ (OpenAI) под водство на Сем Алтман ја издала својата мисија да и користи на јавноста со тоа што се претворила во профитен бизнис, утврдувајќи дека тој чекал предолго за да ја тужи компанијата.

Пресудата донесена во понеделник во федералниот суд во Оукленд, Калифорнија, следува по судењето за горчливата расправија меѓу претприемачите кои работеа заедно за да го лансираат стартапот во 2015 година. „Опен еј-ај“ оттогаш еволуираше во една од највредните и најмоќните компании за вештачка интелигенција во светот.

„Мислам дека има значителен број докази што ги поддржуваат наодите на поротата“, рече окружната судијка на САД, Ивон Гонзалез Роџерс, кога го прифати едногласниот заклучок на деветчлената порота по околу два часа размислување.

Судењето со висок профил, во случај што ја воодушеви Силициумската долина откако Маск поднесе жалба во 2024 година, беше кулминација на години непријателство меѓу соосновачите на „Опен еј-ај“.

„Откритието на поротата потврди дека оваа тужба е лицемерен обид на лицемер да го саботира конкурентот и да ја надмине долгата историја на многу лоши предвидувања за тоа што бил и што ќе стане ‚Опен еј-ај‘“, изјави адвокатот на „Опен еј-ај“, Вилијам Савит, за новинарите.

Адвокатите на Маск ветија жалба, но не наведоа детали за тоа на што ќе противречат.

„Ова ме потсетува на клучните моменти во историјата на оваа земја, опсадата на Чарлстон, битката кај Банкер Хил“, рече адвокатот Марк Тобероф. „Ова беа големи загуби за Американците, но кој ја доби војната? Оваа не е завршена“.

Маск генерално има силно досие во судските битки, но имаше неколку значајни неуспеси во последната година. „Тесла Инк“, неговата компанија за електрични возила, беше погодена со пресуда од 243 милиони долари во август поради фатална несреќа, а Маск се соочува со отштета од дури 2,6 милијарди долари откако го изгуби судењето во март во случај покренат од инвеститори на „Твитер Инк“.

Поротата во Оукленд заклучи дека Маск имал доволно знаење за своите тврдења пред години за да треба да тужи порано од 2024 година. Како резултат на тоа, панелот не се осврна на централното тврдење на Маск дека „Опен еј-ај“ ги напуштил своите одговорности за развој на вештачка интелигенција во корист на човештвото со тоа што се насочил кон максимизирање на комерцијалната добивка.

Поротниците слушнаа сведоштва во текот на речиси три недели од Маск, Алтман, претседателот на „Опен еј-ај“, Грег Брокман и други ВИП личности кои имаа увид во нивната расправија што започна пред речиси една деценија.

Поротата, исто така, виде стотици размени на приватни пораки, записи во дневници и корпоративни документи што овозможија редок пристап до бурното внатрешно работење на производителот на ЧетГПТ во текот на изминатите 11 години, додека тој еволуираше од тромав стартап во компанија од речиси билион долари.

Маск и „Опен еј-ај“ прикажаа многу различни слики за таа трансформација во текот на судењето.

Адвокатот на Маск рече дека Алтман и Брокман „украле добротворна организација“ кога решиле да го реструктуираат „Опен еј-ај“ во профитен бизнис. Маск, исто така, го обвини „Мајкрософт“ за помагање на предавството со инвестирање на 13 милијарди долари во „Опен еј-ај“ од 2019 до 2023 година.

„Мајкрософт“ ја поздрави пресудата на поротата.

„Фактите и временската рамка во овој случај одамна се јасни и ја поздравуваме одлуката на поротата да ги отфрли овие тврдења како ненавремени“, рече портпарол на компанијата. „Остануваме посветени на нашата работа со ‚Опен еј-ај‘ за унапредување и скалирање на вештачката интелигенција за луѓе и организации ширум светот.“

Адвокатите на Маск го прикажаа Алтман како измамнички бизнис лидер. Тие накратко го разгледаа краткото разрешување на Алтман од функцијата извршен директор во 2023 година за да истакнат дека дури и одборот на „Опен еј-ај“ не му верувал.

Страната на Маск, исто така, го истакна огромното богатство што успехот на „Опен еј-ај“ го создаде за неговите основачи и рани инвеститори.

Брокман сведочеше дека неговиот удел е близу 30 милијарди долари, додека поранешниот главен научник Илја Сутскевер потврди дека неговиот капитал вреди околу 7 милијарди долари. Извршниот директор на „Мајкрософт“, Сатја Надела, сведочеше дека компанијата се стремила кон поврат од 92 милијарди долари од својата инвестиција. Од октомври, уделот на „Мајкрософт“ беше проценет на 135 милијарди долари.

Алтман нема директен удел во капиталот, но рече дека има удели во други компании кои соработуваат со „Опен еј-ај“, вклучувајќи удел од 1,7 милијарди долари во компанијата за фузиона енергија „Хелион Енерџи“ (Helion Energy Inc), удел од 633 милиони долари во процесорот за плаќања „Страјп“ (Stripe) и акции на полупроводничката компанија „Серебрас Системс“ (Cerebras Systems Inc) кои сега вредат околу 25 милиони долари.

Адвокатите на „Опен еј-ај“  го претставија Маск како љубоморен ривал кој го напуштил стартапот кога неговите соосновачи му ја одзеле целосната контрола врз иднината на бизнисот и на крајот ја лансирал конкурентската компанија, „Екс еј-ај“ (xAI), во 2023 година.

„Опен еј-ај“ соопшти дека преминувањето од непрофитна добротворна организација во комерцијален бизнис било клучно за обезбедување на огромната количина на средства што му се потребни за да ја исполни својата мисија за создавање вештачка општа интелигенција - или АГИ (AGI) - што ќе му користи на човештвото.

Алтман и Брокман ги опишаа загриженостите што ги имале во врска со ставот на Маск за лидерство „сè или ништо“. Го претставија како нестабилен и брз во лутење кога работите не одат по негово.

Брокман, исто така, го оцрни техничкото разбирање на Маск за технологијата на вештачка интелигенција.

„Видете, тој знае ракети, знае електрични автомобили“, рече претседателот на „Опен еј-ај“. „Тој не знаел - и верувам дека не знае - вештачка интелигенција.“

Други кои сведочеа во име на „Опен еј-ај“ рекоа дека нејзината основачка мисија е сè уште недопрена, дури и кога обемот и досегот на компанијата се зголемија. Тие истакнаа дека фондацијата „Опен еј-ај“ продолжува да управува со компанијата за јавна корист што беше основана минатата година.

Битките на Маск со „Опен еј-ај“ ќе продолжат.

Тој, исто така, ги обвини „Опен еј-ај“ и „Мајкрософт“t за создавање монопол преку нивното партнерство и вели дека непрофитната организација ги повикала своите инвеститори да не финансираат конкурентски стартапи за вештачка интелигенција - повредувајќи ги конкурентите како неговата „Екс еј-ај“. Овие тврдења се дел од истата тужба, но Гонзалез Роџерс одлучи да го подели случајот во повеќе фази.

Во средба со адвокатите по пресудата во понеделник, судијата рече дека „не ми е јасно дека тие се всушност добри тврдења“ затоа што „има многу конкуренција во таа конкретна индустрија“.

„Екс еј-ај“ на Маск, исто така, води одделни случаи со кражба на трговски тајни и антимонополски тврдења против „Опен еј-ај“.