„Енвидија“ на чекор до рекордна вредност од шест билиони долари

„Енвидија“ е на чекор да стане првата компанија чија пазарна вредност ќе достигне шест билиони долари, додека инвеститорите повторно се вртат кон производителот на чипови за вештачка интелигенција (ВИ).

Акциите повторно се на рекордно високо ниво откако компанијата изнесе силни прогнози за приходите и го најави најголемиот откуп на сопствени акции во историјата, користејќи ја предноста од процената на вредноста која е близу до повеќегодишен минимум. Тие два фактора - силниот раст и релативно ниската вредност - особено доаѓаат до израз во момент кога инвеститорите се соочуваат со високи каматни стапки и послаби економски показатели.

„'Енвидија' е привлечна и од аспект на растот и од аспект на вредноста, а изгледа и како засолниште од потенцијалната штета што повисоките каматни стапки би можеле да ѝ ја нанесат на економијата“, рече Џим Авад, висок извршен директор на компанијата КА (Clearstead Advisors), која поседува акции на „Енвидија“. „Поради сето тоа, компанија сега е многу привлечна инвестиција и бренд кон кој инвеститорите веројатно и понатаму ќе се вртат доколку се загрижени поради економските ризици.“

Акциите годинава пораснаа за 28 отсто, а тој раст ја зголеми пазарната капитализација на „Енвидија“ за 1,2 билиони долари, на нешто помалку од 5,8 билиони долари. Компанијата воедно далеку најмногу придонесе за растот на индексот S&P 500, кој годинава порасна за 14 отсто.

„Енвидија“ се приближува до рекордна пазарна вредност од шест билиони долари Bloomberg

Оттогаш расположението кон ВИ секторот целосно се промени, па во центарот на вниманието сега се егзистенцијалните прашања за потенцијалните закани што вештачката интелигенција ги претставува за човештвото. Во меѓувреме, ризиците од инфлација и можноста Федералните резерви (Фед) да ги зголемат каматните стапки ги направија големите технолошки компании како „Енвидија“ релативно сигурен избор за инвеститорите.

„Бидејќи стравувањата од зголемување на каматните стапки се остварија, парите почнуваат да се слеваат во овие големи технолошки компании, бидејќи тие се нешто поотпорни на растот на каматите“, вели Лари Тентарели од БЧД (Blue Chip Daily), додавајќи дека и секторот на полупроводници забележал закрепнување поттикнато од ВИ агентот Мјуз (Muse) на компанијата „Мета“ (Meta Platforms Inc).

„Парите во голема мера се враќаат во секторот на полупроводници и големите технолошки компании, а двата тренда ѝ одат во прилог на 'Енвидија'.“

„Енвидија“ стана уште попривлечна за инвеститорите откако компанијата одобри дополнителни 150 милијарди долари во рамките на постојната програма за откуп на сопствени акции. Извршниот директор Џенсен Хуанг рече дека таа одлука „ја одразува нашата доверба во долгорочниот потенцијал што е пред нас“. Претходно, тој ја опиша „Енвидија“ како „првата и единствена компанија чии акции истовремено нудат раст и вредност“.

Волстрит главно позитивно реагира на откупот на сопствени акции бидејќи тој претставува враќање на капиталот кон акционерите и го намалува бројот на акции во оптек, со што се зголемува заработката по акција. „Енвидија“ се издвојува по тоа меѓу големите технолошки компании, кои своите пари главно ги насочуваат кон инвестиции во ВИ, со исклучок на „Епл“ (Apple Inc).

„Тоа е токму она што инвеститорите сакаат да го видат“, напиша аналитичарот на „Мизухо“ (Mizuho Securities), Џордан Клајн, во белешка до клиентите на 28 септември, додавајќи дека компанијата на тој начин „го споделува со инвеститорите богатството што го создава благодарение на исклучително високите профитни маржи“.

Иако може да се тврди дека компаниите со откупот на сопствените акции само вештачки ја зголемуваат заработката по акција, без органски раст, тоа тешко може да се каже за „Енвидија“. Во претходниот извештај компанијата прогнозираше дека продажбата во фискалната 2028 година ќе ѝ порасне за 70 отсто, значително повеќе од претходно очекуваните 45 отсто.

„Таа може да си дозволи толку голем откуп на сопствени акции затоа што расте толку брзо што има повеќе пари отколку што би знаела што да прави со нив“, рече Авад од КА. „'Енвидија' и понатаму е на чело на ВИ револуцијата која не покажува знаци на забавување, а побарувачката што ја бележи изгледа отпорна на растот на каматните стапки, што дополнително ја зајакнува довербата во одржливоста на тој раст.“

Се очекува нето добивката на „Енвидија“ да се удвои во фискалната 2027 година, која завршува во јануари, додека приходите би требало да пораснат за 90 отсто. Една година претходно, двата показатела пораснаа за 65 отсто.

Сепак, и покрај сето тоа, „Енвидија“ годинава заостанува зад поширокиот сектор на полупроводници. Филаделфискиот индекс на полупроводници порасна за 86 отсто во 2026 година, предводен од компании како „Микрон“ (Мicron Technology Inc.), „Марвел“ (Marvell Technology Inc.) и „Интел“ (Intel Corp.), чии акции пораснаа за повеќе од 200 отсто, иако и понатаму се тргуваат под рекордните нивоа достигнати претходно оваа година.

Секако, дел од проблемот на „Енвидија“ едноставно произлегува од нејзината големина - таа сега е најголемата компанија во светот според пазарната капитализација и потребно е многу за значително да се поместат акциите кои веќе цела деценија убедливо се меѓу најуспешните во S&P 500. Прашањето е дали може и понатаму да остварува таков раст.

Токму поради тоа прашање, со акциите сега се тргува по цена од околу 17 пати очекуваната заработка во следните 12 месеци, што е близу до најнискиот однос во последните десет години и помалку од 19 пати, колку што изнесува вреднувањето на индексот S&P 500.

 „Акцијата на 'Енвидија' е евтина, но проблемот со кој се соочува компанијата е тоа што речиси е жртва на сопствениот успех“, рече Тентарели. „Потребно е навистина многу за работите значително да се поместат.“

Индексот Nasdaq со рекорден раст Bloomberg