Општата вештачка интелигенција ќе исплива за време на владеењето на Доналд Трамп

Во 2015 година, „Опен еј-ај“ (OpenAI) беше основана со амбициозна цел да развие општа вештачка интелигенција (од англиски: artificial general intelligence - AGI), технологија која може да извршува задачи на ниво на човечка интелектуална способност. Во тоа време, малкумина веруваа дека АГИ е можно, но Сем Алтман, заедно со Илја Сутскевер и другите пионери, опстојуваа. Како што подоцна напиша на неговиот блог „Рифлекшнс“ (Reflections), Алтман веруваше дека АГИ ќе биде „една од најважните технологии во историјата на човештвото“.

И покрај ограничените ресурси и првичниот скептицизам, тие се фокусираа на длабоко учење како основа за развој на вештачка интелигенција. Нивната визија почна да се остварува во ноември 2022 година, кога лансирањето на ЧетГПТ (ChatGPT) предизвика глобална револуција. ЧетГПТ стана глобален феномен во првите месеци, добивајќи над 100 милиони корисници.

Алтман, во интервју за „Блумберг“ и на неговиот блог, нагласи дека првично немале ниту бизнис модел, ниту инфраструктура за да се справат со побарувачката, но знаеле дека мораат да ризикуваат. Тој призна: „Знаевме дека вештачката интелигенција во одреден момент ќе достигне точка на пресврт, но не знаевме кога тоа ќе се случи“.

Неверојатен успех и конфликти во тимот

Корисниците го употребуваа ЧетГПТ за широк спектар на задачи, од пребарување информации до добивање медицински совет. Овој неочекуван успех ја принуди компанијата брзо да се приспособи, бидејќи истовремено мораше да изгради инфраструктура и да развие деловни модели. „Ние сме многу среќни што малата производствена компанија што ја започнавме е веројатно најбрзо растечката технолошка компанија досега - секако не е компанија што постои долго време“, рече тој за „Блумберг“. Но, сонот набрзо почна да бледнее.

Внатрешните тензии достигнаа врв во ноември 2023 година, кога Алтман ненадејно ја загуби функцијата извршен директор поради несогласувања со одборот околу рамнотежата помеѓу безбедноста и перформансите на АГИ. Тој беше вратен во рок од неколку дена, но компанијата мораше да ја обнови довербата и да го зајакне својот систем на управување.

Bloomberg

Тој го опиша овој период како „сон кој стана кошмар... сите овие луѓе за кои мислев дека ме поддржуваат... и го држат друштвото ги снема, а сега морам да го исчистам нивниот хаос. Всушност тоа се случуваше во ова време од годината (декември), кога се стемнува околу 16:45 часот, и е студено и врнежливо, а јас шетав низ мојата куќа ноќе, сам, *бено депресивен и уморен. Се ми излгедаше многу неправедно“, изјави тој за „Блумберг“. Алтман призна дека тоа се важни лекции за иднината на компанијата: „Вистинските одлуки не се секогаш очигледни, но неодлучноста често е поголема грешка од погрешниот избор“.

До 2024 година, „Опен еј-ај“ повторно се фокусираше на своите долгорочни цели, при што Алтман ја нагласи важноста од постепено воведување нови технологии за да му овозможи на општеството да се приспособи на нивното влијание. Тој верува дека до 2025 година, АГИ ќе достигне точка во која системите за вештачка интелигенција ќе бидат способни да извршуваат задачи на ниво на најдобрите човечки експерти, овозможувајќи забрзување на научните откритија и решавање на глобалните предизвици, напиша тој во блог-пост. Но, што е за него АГИ?

„Грубо, кога системот за вештачка интелигенција може да го направи она што можат да го направат висококвалификуваните луѓе на важни работни места - јас би го нарекол тоа АГИ. Потоа следуваат еден куп дополнителни прашања како - дали вештачката интелигенција би ја завршила целата работа или само дел од неа? Може ли да започне живот како компјутерска програма и да одлучи дека сака да биде доктор? Може ли да ја заврши работата како што би ја завршиле најдобрите професионалци во одредено поле? Колку е автономна? Се‘ уште ги немам подлабоките детални одговори, но доколку би можеле да ангажирате вештачка интелигенција како одличен софтверски инженер од далечина, мислам дека многу луѓе би рекле: „Во ред, тоа е слично на АГИ“.

Зошто е толку важна 2025 година?

Алтман во едно интервју рече дека наскоро ќе објават нов модел кој веќе ги има постигнато пресвртниците што ги поставија за наградата АРЦ-АГИ. „Тие сакаа да направат пресвртници за кои мислеа дека ќе биде навистина тешко да се постигнат. Тие рекоа ако можете да стигнете до 85 проценти од нив, ние ќе го сметаме тоа за „успех“. И нашиот систем - без посебна интервенција или дополнителна работа - има постигнато 87,5 проценти. Сè уште има многу ветувачки истражувања и подобри модели“.

За неговата поддршка за инаугурацијата на Доналд Трамп во износ од милион долари, тој рече дека ги поддржува САД и секој претседател кој сака да работи за доброто на земјата: „Мислам дека АГИ најверојатно ќе се развие во текот на мандатот на овој претседател и изгледа дека е многу важно тоа да се направи“.

Тој додава дека развојот на вештачката интелигенција бара огромни количини енергија и чипови, што носи логистички и еколошки предизвици. Тој ја гледа енергијата од фузија и развојот на сопствени чипови како решение, кое ќе ја намали зависноста од надворешни добавувачи. Алтман, исто така, нагласи во интервју за „Блумберг“ дека САД мора да останат лидер во развојот на вештачката интелигенција, преку инвестирање во инфраструктурата и намалувањето на бирократските пречки.

„Тоа е само Илон“

Тој беше подиректен за неговиот лош однос со Илон Маск: „Маск кажува и прави многу работи, ги започнува, ги менува, тужи, ја повлекува тужбата, влегува во конфликти со државата, државите почнуваат да го истражуваат. Тоа е само Илон. Прашањето беше дали ќе ја злоупотреби својата политичка моќ како копретседавач, или како и да се вика сега, за да се меша во работата на бизнис конкурентите?“.

Но, тој во основа мисли дека Маск нема да го стори тоа и дека имал позитивни искуства со него пред нивниот спор.

Depositphotos

Во исто време, „Опен еј-ај“ одржува силна посветеност на истражувањето. Алтман предупреди дека комерцијалните притисоци можат да ги засенат иновациите, но тој тврди дека компанијата мора да го заштити своето истражувачко јадро, бидејќи тоа е клучно за долгорочен успех. „Нашата визија нема да се промени, но тактиката ќе продолжи да се развива. „Опен еј-ај“ не само што развива технологија, туку и одговорна имплементација што ќе му користи на целото човештво. Тој признава дека изминатите две години биле исклучително стресни и полни со грешки, но нагласува дека овие искуства биле пресудни за напредок.

Во врска со доаѓањето на Доналд Трамп, тој рече дека се согласува со него за проблемот со градежништвото во САД, за кое се вели дека е премногу оптоварено со бирократија. Што предлага да направи? „Изградбата на нова инфраструктура е клучна. Но, што е со електраните, центрите за податоци и слично, за кои е потребно премногу долго време за да се добие документацијата. Разбирам како се акумулира бирократска конфузија, но тоа воопшто не е корисно за земјата. Тоа е особено не е корисно кога размислувате за тоа што треба да се случи за САД да водат во вештачката интелигенција“.

Во моментов нема коментари за веста. Биди прв да коментира...

Остави коментар