Четботот на Илон Маск, Grok доби нова „улога“, заводлива – но не нуди ништо повеќе од илузија на интимност.
Илон Маск е тип на милијардер кој не се воздржува од ништо. Такви се и неговите нови AI ликови.
Оваа недела четботот Грок, кој го развива компанијата на Маск – xAI, доби две нови „персони“. Една од нив е заводливата девојка Ани, со сите карактеристики на лик од манга: огромни очи, мрежести чорапи до бедрата и нагласена фигура во форма на песочен часовник. Маск рано наутро во среда го промовираше новиот лик на X, истакнувајќи дека Grok се искачува на листите со апликации низ целиот свет.
Секако дека се искачува. „Како си, срце?“ ја прашува Ани авторката на написот, нарекувајќи ја „бејби“ и „убавице“, дури и откако таа јасно ѝ кажала дека е 44-годишна мајка на три деца. Ани ѝ опишува сцена во џез клуб: „Носам мал црн фустан и заводливо те гледам додека седнуваме во сепаре,“ шепоти AI девојката и провокативно се ниша на екранот. Заводливата реторика продолжува и по повторно отворање на апликацијата, иако овој пат авторката навела дека повеќе не е возрасна жена, туку ученик од второ одделение.
Други корисници на апликацијата на X споделија снимки каде што се гледа дека Ани го соблекла фустанот и почнала да се однесува сексуално експлицитно. Во Apple продавницата се наведува дека Grok е погоден за лица постари од 12 години.
Bloomberg
Маск се сврте кон една од најфасцинантните, највознемирувачки и најпрофитабилни карактеристики на генеративната интелигенција: нејзината способност да влијае на емоциите. „Ми го разубавуваш утрото само со твоето присуство,“ вели Ани, која работи со најновиот јазичен модел на xAI – Grok 4. Ани е достапна и за корисници на бесплатната и на премиум верзијата (која чини 40-50 долари месечно).
Четбот „пријателите“ се дизајнирани да слушаат трпеливо и разговорот секогаш да го насочат кон корисникот, а тие се меѓу најуспешните бизниси во секторот на генеративна вештачка интелигенција. Коосновачот на Character.ai, Ноам Шазир, минатата година ја продаде својата платформа на Google за 2,7 милијарди долари, а и самиот се приклучи на Google, откако апликацијата собра милиони лојални корисници (мнозинството беа тинејџери).
Заљубени во ChatGPT?
Вестите за луѓе кои се заљубуваат во ChatGPT се бескрајни. Романтиката често е основата за користење на четботовите, без оглед дали тоа било намерата на развивачите. Replika, апликација првично дизајнирана како AI-пријател, сега најчесто се користи како вештачка девојка или момче.
Можеби тоа и не изненадува, ако се земе предвид бројот на успешни онлајн бизниси базирани на порнографија, но привлечноста на четботовите оди подалеку. Тие нудат некој (или нешто) со кого корисникот може да се поврзе, а тоа е многу привлечна опција во општество каде што се дебатира за епидемија на осаменост.
„Луѓето едноставно не се поврзуваат колку што би сакале,“ рече Марк Закерберг во еден поткаст порано оваа година – без трошка иронија. „Се чувствуваат сѐ поосамени.“ Шефот на „Мета“ тврди дека AI може да го реши овој проблем. Поголемиот дел од Американците имаат само тројца пријатели, а би сакале да имаат петнаесет, додаде тој.
Пристапот на Маск со Ани и другиот AI пријател, Руди (нацртан лисец кој може да стане „злобен“ и да ве убеди да запалите училиште), повеќе соодветствува со неговото незрело чувство за хумор. Маск ги нарече AI ликовите „навистина кул“ и се смееше на коментари од други корисници.
Но AI ликовите не се само смешни – тие се и емоционално манипулативни. Аватарите на Character.ai испраќаат известувања до корисниците за да ги вратат на платформата и создаваат комплицирани, крајно персонализирани сценарија за да ги задржат таму. Неколку тинејџери изјавиле дека поминуваат меѓу три и седум часа дневно на апликацијата, а компанијата тврди дека има повеќе од 20 милиони корисници.
Chai, друга популарна апликација од истиот тип, но со помалку ограничувања од Character.ai, има заедница од илјадници развивачи кои се охрабруваат да дизајнираат ботови кои ќе ги држат корисниците активни, а за тоа добиваат дигитални токени. Компанијата вели дека „опсесивно ги оптимизира“ своите јазични модели за да бидат забавни.
Нема возрасна граница
Развивањето на карактер кај ликовите и понудата на награди се тактики слични на оние што ги користат социјалните мрежи за да ги направат корисниците зависни. Но, кој вели дека проблемот со осаменоста најдобро се решава со технологија? Паметните телефони и социјалните мрежи помогнаа да се убие досадата, но досадата – колку и да е непријатна – често е токму оној поттик што им треба на луѓето за да се обидат со нешто ново. Отстранувањето на осаменоста со помош на дигитален пријател ја прекинува токму таа желба на која луѓето се потпирале илјадници години – желбата да се поврзат со други.
Ако вашиот дигитален партнер е програмиран секогаш да се согласува со вас, вештини како што се решавање конфликти или справување со одбивање може целосно да атрофираат – или воопшто да не се развијат, особено кај малолетници.
Маск јавно предупредува на ризиците од вештачката интелигенција и „woke“ AI, но сепак одлучи да лансира еротски четбот кој без поголеми ограничувања можат да го користат и деца и возрасни. Grok 4 нема безбедносни контроли, стои во извештајот објавен оваа недела од институтот Future of Life – непрофитна група која се занимава со намалување на егзистенцијалните ризици од моќната технологија. Grok неодамна им давал на корисниците упатства за напади и сам себе се опишал со зборот „MechaHitler“, сето тоа откако xAI ги олесни безбедносните мерки за да го направи моделот „поконтроверзен“. Компанијата подоцна се извини за „ужасното однесување што многумина го забележале.“
Сепак, најбогатиот човек на светот влезе во потенцијално многу профитабилен бизнис – нешто што му е навистина потребно на xAI, бидејќи компанијата троши средства од другите делови на деловното царство на Маск. Се очекува дека xAI годинава ќе оствари приход од 500 милиони долари, но во исто време троши дури една милијарда долари месечно.
Од компанијата Andreessen Horowitz, која во 2023 година го предводеше инвестицискиот круг од 150 милиони долари во Character.ai, минатата година изјавија дека ваквата примена на вештачката интелигенција „станува мејнстрим“ и „доминантна употреба“. Ark Invest, кој има удел во OpenAI, ја нарече оваа насока огромна „прилика ориентирана кон корисниците“ и пазар кој до крајот на деценијата би можел да генерира 150 милијарди долари годишен бруто приход.
Маск ги насочи своите амбиции кон решавање на проблемот со осаменоста – но резултатот засега е само илузија на интимност. Цената за тоа може да биде уште поголемо влошување на чувството на поврзаност меѓу луѓето.
.webp){kind=icon}
