Ненадејно затворена истрагата за тоа дали Ватсап има увид во приватни пораки

Американска владина агенција нагло ја затвори истрагата за наводите дека „Мета“ (Meta Platforms Inc.) може да пристапува до енкриптирани пораки на апликацијата Ватсап (WhatsApp), ставајќи му крај на процесот што потенцијално ја доведуваше во прашање приватноста на една од најкористените апликации за комуникација во светот.

Според информации на „Блумберг њуз“, истрагата била затворена кратко откако истражител од Министерството за трговија на САД испратил интерен извештај до други федерални институции, во кој ги сумирал своите првични наоди и побарал координација за понатамошни активности. Изворите, кои сакале да останат анонимни, велат дека одлуката за затворањето дошла од повисоки раководни структури и била донесена ненадејно.

Во текот на 2025 година специјалниот агент истражувал наводи дека одредени вработени и надворешни соработници на „Мета“ можеле да имаат пристап до содржината на пораки испратени преку Ватсап. Во е-пошта испратена во јануари, по десетмесечна истрага, тој тврдел дека компанијата „може и навистина ги складира и прегледува“ пораките во неенкриптирана форма.

Дополнително, агентот навел дека постои „систем на нивоа на дозволи“, преку кој различни лица, вклучувајќи и надворешни соработници и работници во странство, можеле да пристапат до одредени податоци.

Овие тврдења директно се косат со официјалната позиција на „Мета“, која долги години истакнува дека Ватсап користи енкрипција од крај до крај (end-to-end), што значи дека само испраќачот и примачот можат да ја видат содржината на пораките.

Портпаролот на „Мета“ остро ги негираше обвинувањата, нарекувајќи ги „целосно неточни“. Од компанијата повторуваат дека нивната технологија не дозволува пристап до приватните комуникации на корисниците.

Од друга страна, Бирото за индустрија и безбедност при Министерството за трговија, каде што работи агентот, соопшти дека наводите се „непотврдени“ и надвор од неговата надлежност. Институцијата исто така потврди дека во моментов не води истрага против „Мета“ или Ватсап.

Затворањето на истрагата остава повеќе неразјаснети дилеми, меѓу кои и тоа какви докази биле собрани и дали некоја друга институција ќе ја преземе понатамошната постапка. Не е јасно ниту дали контактите со други агенции, вклучувајќи ги и Комисијата за хартии од вредност и Федералната трговска комисија, ќе резултираат со нови активности.

Истрагата, позната како ОСЕ (Operation Sourced Encryption), беше поттикната од пријава на свиркач поднесена во 2024 година. Во минатото „Мета“ веќе се соочуваше со сериозни казни поврзани со приватноста, вклучувајќи ја и рекордната глоба од 5 милијарди долари изречена од Федералната трговска комисија во 2019 година.

И покрај тоа, компанијата и понатаму тврди дека приватноста на корисниците е нејзин врвен приоритет, додека експерти за сајбер-безбедност посочуваат дека евентуален „заден влез“ во енкрипцијата би било тешко да остане незабележан.

Случајот, иако затворен на институционално ниво, отвора поширока дебата за довербата во дигиталните платформи и транспарентноста на технолошките гиганти.