Преговарачите на Европската Унија го поддржаа планот за поставување дополнителни ограничувања на најголемите системи за вештачка интелигенција според претстојниот закон за вештачка интелигенција (AI Act).
Претставниците од Европската комисија, Европскиот парламент и земјите на ЕУ разговараат за пристап што би се однесувал на загриженоста од моќните големи јазични модели - технологијата што ги поткрепува четботовите со вештачка интелигенција - како што е ГПТ-4 (GPT-4) на „Опен еј-ај“ (OpenAI), додека исто така ќе се погрижи новите стартапи да не бидат преоптоварени со регулативата, изјавија лица запознаени со ова прашање. Договорот е прелиминарен, сè уште не е ставен во писмен нацрт и може да се промени, велат изворите, кои побарале да останат анонимни бидејќи станува збор за приватна дебата.
Станува збор за сличен пристап на ниво на неодамна објавениот Закон за дигитални услуги на ЕУ (Digital Services Act). Додека ДСА бара од сите платформи и веб-локации да преземаат активности за заштита на податоците на корисниците и следење за нелегални активности, најстрогите контроли се резервирани за најголемите, вклучувајќи ги „Алфабет“ (Alphabet Inc.) и „Мета“ (Meta Platforms Inc).
ЕУ би можела да стане првата западна власт што ќе постави задолжителни правила за вештачката интелигенција. Според предложениот закон, компаниите за вештачка интелигенција ќе мора да вршат процени на ризик и да означуваат дипфејк-содржини, што е само дел од барањата. Преговарачите сакаат да го финализираат законот до крајот на годината и имаат цел да го усовршат договорот на следниот состанок на 25 октомври.
Сè уште има голем број клучни прашања што остануваат, вклучувајќи и како точно да се регулира генеративната вештачка интелигенција и дали целосно да се забрани скенирањето на лица во толпа. Европскиот парламент ја поддржа целосната забрана на овој биометриски надзор - нешто што многу земји од ЕУ рекоа дека ќе го отфрлат.
.webp){kind=icon}
