„Епл“ (Apple Inc.), во обид да го одбрани бизнисот што генерира приближно 17 милијарди долари годишно, ќе се жали на забраната за продажба на неговите паметни часовници во САД откако Белата куќа одби да ја поништи мерката.
„Епл“ ќе ја оспори забраната - наметната од американската меѓународна трговска комисија (ITC) поради спор околу патент - пред Апелацискиот суд на САД. Во вторникот, компанијата исто така поднесе итен предлог за укинување на забраната за продажба на часовници додека судот ја разгледува нејзината жалба.
Спорот за патентирањето со производителот на медицинска технологија „Масимо“ (Masimo Corp.) во октомври утврди дека „Епл“ прекршил два патента на „Масимо“ преку сензорот за крв и кислород во неговите часовници. Белата куќа имаше рок од 60 дена да ја разгледа забраната за увоз, а одлуката беше во рацете на американската трговска претставничка Кетрин Таи. Рокот за тој преглед само што истече.
Прочитајте повеќе: Дали „Епл“ ќе мора да го повлече „епл воч“ од полиците?
„По внимателни консултации, амбасадорката Таи одлучи да не ја поништи определбата на ITC и одлуката на ITC стана конечна на 26 декември 2023 година“, се наведува во соопштението на Канцеларијата на трговската претставничка на САД во вторникот.
„Епл“ веќе престана да ги продава своите часовници од серија 9 (Apple Watch Series 9) и ултра 2 (Apple Watch Ultra 2) во својата онлајн продавница и малопродажните места во САД. Онлајн продажбата беше запрена на 21 декември, а последниот ден за купување нов часовник во продавницата на „Епл“ беше на 24 декември.
„Жестоко не се согласуваме со одлуката и наредбата за исклучување и ги преземаме сите мерки за да ги вратиме моделите серија 9 и ултра 2 до клиентите во САД што е можно поскоро“, рече портпаролката на „Епл“.
Bloomberg Mercury
Компанијата креира ажурирање на софтверот за епл воч, за кое верува дека ќе го ублажи проблемот. Таа го поднесе дизајнот на тоа ажурирање до американската царинска агенција и, во поднесокот од вторникот, посочи дека владата треба да одлучи на 12 јануари дали да ги одобри или отфрли промените. Пресуда во негова корист може да му помогне на „Епл“ да продолжи со продажбата на овие модели на часовници.
Наредбата против компанијата вклучува забрана за продажба преку сопствените канали за малопродажба, како и забрана за увоз на уредите во САД. Другите трговци на мало, како што се „Таргет“ (Target) и „Волмарт“ (Wallmart), можат да продолжат да ги продаваат производите - барем додека не се потрошат резервите.
Моделите серија 9 и ултра 2 учествуваат во најголем дел од продажбата на часовници на „Епл“. Послабиот епл воч СЕ (Apple Watch SE), кој не ја вклучува функцијата за крв и кислород, останува во продажба. „Епл“ минатата недела им порача на вработените дека поради правната битка не смеат да им кажат на клиентите дека ултра 2 и серија 9 остануваат во продажба преку неофицијални канали за малопродажба на „Епл“.
Главоболка за сопствениците на други модели на часовници од „Епл“, како што се серија 6, 7 и 8 - од кои сите ја вклучуваат функцијата за крв и кислород - е тоа што часовниците без гаранција нема да бидат подобни за хардверски поправки додека не се укине забраната.
Периодот во кој следува забраната значи дека мерката веројатно нема да има големо влијание врз резултатите од продажбата во празничната сезона. Повеќето луѓе го завршија купувањето пред Божиќ, а некои можеби побрзаа да купат часовници откако „Епл“ неодамна почна да предупредува дека забраната доаѓа.
.webp){kind=icon}
