.webp){kind=icon}
Во 2023 година над една третина (36 проценти) од луѓето во ЕУ на возраст од 16 до 74 години ги смениле поставките на интернет-прелистувачот за да ја спречат или ограничат употребата на колачиња. Само 21 процент користеле софтвер што ја ограничува можноста за следење на нивните активности на интернет, покажуваат новите податоци на Евростат објавени по повод Денот на побезбеден интернет, кој се одбележува на 6 февруари.
Кога станува збор за менувањето на поставките на интернет-прелистувачот за да се спречат или ограничат колачињата, најголем процент на корисници на интернет, споредено со просекот во ЕУ, е забележан во Финска (66 проценти) и во Холандија (56 проценти), по што следуваат Луксембург (47 проценти), Данска (46 проценти) и Германија (45 проценти).
Спротивно на тоа, помал дел корисници на интернет презеле таква акција во Романија и Бугарија (и двете по 12 проценти), Кипар (20 проценти), Словенија (26 проценти) и во Италија (27 проценти).
„Меѓу земјите на ЕУ, речиси половина од корисниците на интернет во Белгија беа претпазливи во врска со онлајн следењето, при што 49 проценти користат софтвер за ограничување на способноста за следење активности преку интернет. По нив следуваат корисниците во Малта (38 проценти), Холандија и Хрватска (и двете по 32 проценти) и во Естонија (31 процент)“, соопшти Евростат.
Спротивно на тоа, најмал удел на корисници што користат ваков вид софтвер има во Кипар (3 проценти), Бугарија (7 проценти), Романија и Италија (и двете по 12 проценти) и во Летонија (13 проценти).
Луѓето на возраст од 25 до 34 години забележале највисок просек (45 проценти) од оние што ги промениле поставките во нивниот интернет-прелистувач за да спречат или ограничат колачиња. Употребата на софтвер што ја ограничува можноста за следење на активностите на интернет е највисока (24 проценти) кај луѓето на возраст од 16 до 24 години.
