„Амазон“ (Amazon.com Inc) се здружува со единица на „Де Бирс“ (De Beers Group) за одгледување вештачки дијаманти, обложувајќи се дека изработените скапоцени камења може да помогнат во еволуцијата на компјутерските мрежи.
Одделот на„Де Бирс“, „Елемент сикс“ (Element Six), ќе работи на проектот со Центарот за квантно вмрежување на веб-услуги на „Амазон“ (АВС), оддел што бара нови и револуционерни начини за безбедно пренесување податоци на подолги растојанија.
Квантното вмрежување користи субатомска материја за пренесување податоци на начин што ги надминува денешните системи со оптички влакна. Дијамантите би биле дел од компонента што им овозможува на податоците да патуваат подалеку без да губат од квалитетот.
Конвенционалните репетитори на сигнали не можат да се справат со информации во оваа форма, познати како кубити (анг. qubits). На крајот, оваа опрема би можела да заврши во мрежите што ги користи АВС, провајдер за облак што придонесува за најголемиот дел од профитот на „Амазон“.
„Сакаме да ги направиме овие мрежи за АВС“, вели Антиа Ламас-Линарес, која го води Центарот за квантно вмрежување. Таа проценува дека тоа кога оваа технологија ќе стане применлива е прашање „на години, а не на децении“.
„Амазон“ опслужува огромен дел од складирањето компјутерски податоци и информации во светот, па затоа се стреми да биде носител на секоја технологија што може да му даде предност пред конкурентите „Мајкрософт“ (Microsoft Corp.) и „Алфабет“ (Alphabet Inc.).
Од „Елемент сикс“ се надеваат дека ќе најдат нова примена за индустриските дијаманти, кои се ценети поради нивната цврстина и способност да функционираат како леќа. Нивното користење во квантното пресметување - нова технологија што ветува дека ќе ги направи податоците побезбедни - носи голема можност.
Широката примена на квантно вмрежување ќе бара огромно количество компоненти, вклучувајќи и специјализирани дијаманти. „Елемент сикс“ неодамна отвори фабрика во Орегон што е способна да произведува дури два милиона единици такви компоненти годишно користејќи техника наречена хемиско таложење на пареа.
Дијамант е цврста форма на елементот јаглерод. Неговата кристална структура го прави најтешкиот и термички најспроводлив материјал застапен во природата. Дијамантите исто така природно собираат ограничен број нечистотии, како што се азотни атоми, кои им даваат боја.
Тие нечистотии може да бидат предност кај вештачки изработените дијаманти. Преку создавање скапоцени камења со прецизно исти нечистотии - и нивно обликување да се усогласат на ист начин - тие можат да работат како репетитори во квантна мрежа.
На крајот, тие исто така би можеле да помогнат квантното пресметување да има пошироко влијание. Таква опрема ќе биде потребна за поврзување на компјутери што се засновани на истата технологија, дозволувајќи мрежи на квантни компјутери, што долго се сметаше само за научна фантастика, да станат реалност, велат истражувачите.
.webp){kind=icon}
