.webp){kind=icon}
Јапонскиот стартап „Гитаи“ (Gitai), кој собра нова рунда финансирања, се шири во САД бидејќи се обидува да создаде роботска работна сила што ќе ги намали трошоците и ризиците од работењето во вселената. Додека Илон Маск и Џеф Безос работат на ракети и на предизвиците за пристигнување во вселената, главниот извршен директор на „Гитаи“, Шо Наканосе, е фокусиран на трошоците за работна сила. Тој верува дека е премногу ризично и непрактично за луѓето да собираат и прегледуваат машини во вселената, додека опремата што сега се користи е премногу скапа.
„Тесното грло на вселенската индустрија брзо се менува. Огромните вселенски компании, како 'Спејс икс' (SpaceX) и 'Блу ориџин' (BlueOrigin), го решаваат проблемот со вселенскиот транспорт и сега тесното грло се префрли од транспортни трошоци во оперативни трошоци“, рече Наканосе утрово во интервју за ТВ „Блумберг“. Тој замислува вселенски роботи што можат да се справат со рутинска работа на Месечината или Марс по само мал дел од цената на постојните опции, слично како што „Спејс икс“ на Маск ги намали трошоците за испраќање ракети во вселената.
„Роботите на 'Гитаи' ќе обезбедат сигурна и прифатлива работна сила и ќе ги намалат оперативните трошоци за 100 пати“, рече тој.
„Гитаи“ со седиште во Токио штотуку го затвори кругот на финансирање од 30 милиони долари за да го забрза развојот на роботи управувани од далечина. „Компанијата ќе ги искористи парите за вработување во САД, каде што се проширува за да регрутира инженери и да ги подготви своите роботи за работа во вселената“, објасни Наканосе.
Роботските раце на седумгодишниот стартап можат далечински да вршат рутински градежни работи што се однесуваат на инсталација на соларни панели или на пример заварување, како и да ја проверуваат опремата и да вршат задачи за одржување и склопување. Но, за да успеат во вселената, тие исто така ќе треба да издржат и да ја ублажат изложеноста на радијација и да работат што е можно поефикасно.
„Ние дизајнираме и произведуваме вселенски роботи. Успешно ја спроведовме нашата прва технолошка демонстрација во Меѓународната вселенска станица во 2021 година“, рече Наканосе.
Вселенските стартапи низ светот се собираат во САД, привлечени од договорите на НАСА, кои сега се слеваат во приватните компании. НАСА се надева дека парите ќе ги креираат градежните блокови на тоа што еден ден ќе стане лунарна економија, иднина каде што вселенските летала носат луѓе и научна опрема на површината на Месечината и ја ископуваат Месечината за ретки метали и податоци.
„Јапонскиот вселенски пазар е ограничен. Решивме да го прошириме нашиот бизнис во САД“, рече Наканосе, говорејќи од својата нова база во Лос Анџелес.
Инвеститорите на „Гитаи“ вклучуваат филијали на „Глобал бреин“ (Global Brain Corp.), „Мицубиши“ (Mitsubishi UFJ Financial Group Inc.) и „Јамато“ (Yamato Holdings Co).
