Маск објави дека неговиот стартап вградил мозочен имплант кај човек

Илон Маск објави дека прв пациент добил мозочен имплант од неговиот стартап „Неуралинк“ (Neuralink), што е значаен чекор напред за компанијата, која има цел еден ден да им овозможи на луѓето да ги контролираат компјутерите со својот ум.

Во објава на X, Маск соопшти дека пациентот добро закрепнува и дека првичните резултати од процедурата се ветувачки.

Мозочниот имплант на „Неуралинк“ првично има цел да им помогне на луѓето со трауматски повреди да ги контролираат компјутерите користејќи ги само своите мисли. Компанијата во мај објави дека добила одобрение од американската Администрација за храна и лекови да ги спроведе првите испитувања на луѓе. Кон крајот на минатата година, „Неуралинк“ соопшти дека за испитувањето собира пациенти со квадриплегија поради повреда на цервикалниот 'рбетен мозок или амиотрофична латерална склероза (АЛС).

Маск на X напиша дека првиот производ на „Неуралинк“ ќе се вика „Телепати“ (Telepathy). Тој ќе овозможи „контрола на вашиот телефон или компјутер, а преку нив речиси на секој уред, само со помош на мисли“, посочи Маск во понеделникот. Тој додаде дека првите корисници на производот ќе бидат луѓе што ја изгубиле употребата на екстремитетите. „Замислете Стивен Хокинг да може да комуницира побрзо од брза дактилографка или аукционер“, напиша тој. „Тоа е целта“.

 

 

Маск нагласи дека „Неуралинк“ има добри резултати за откривање нервронски шилци - што значи дека компанијата добива слики од мозокот на пациентот, рече Кип Лудвиг, кодиректор на Институтот за невроинженеринг на Универзитетот во Висконсин. „Сега ’Неуралинк’ треба да покаже дека може да направи повеќе од другите водечки компании во областа, како што се ’Блекрок невротек’ (Blackrock Neurotech) и ’Синкрон’“ (Synchron)“, рече тој.

Bloomberg

„Неуралинк“ веќе спроведе опширно тестирање на животни. Во тие тестови, мајмуните можеа да играат компјутерски игри користејќи го само својот мозок. Експериментите предизвикаа тревога кај некои групи за правата на животните, како што е Комитетот на лекари за одговорна медицина, поради работата на компанијата со приматите.

Маск веќе неколку години најавуваше дека е неизбежна имплантација на неговиот апарат кај човек. Во јули 2019 година тој предвиде операција кај човек до крајот на годината. Во меѓувреме други компании, како „Синкрон“, напредуваа со вградување на нивните уреди во човечкиот мозок, ставајќи ја „Неуралинк“ во позиција да заостане. Веста од понеделникот веројатно ќе ја затапи таа критика.

Долгиот распоред нагласува колку е тешка задачата што претстои за „Неуралинк“. Чиповите на стартапот имаат цел да навлезат неколку милиметри во мозокот. Тоа е уште подлабоко од многу други системи, како што е оној што го развива „Пресижн неуросајнс“ (Precision Neuroscience), кој се наоѓа на врвот на мозочното ткиво.

Вообичаено, првите испитувањата кај луѓе, што е тип на студија која штотуку ја започна „Неуралинк“, вклучуваат од пет до десет луѓе и траат околу шест месеци. Ако сè оди добро, „Неуралинк“ може да го започне она што е познато како студија за оправданост и, на крајот, клучна студија. Минатата година „Неуралинк“ соопшти дека очекува да изврши 11 операции во 2024 година.

Во моментов нема коментари за веста. Биди прв да коментира...

Остави коментар